შს მინისტრის ყოფილი მოადგილე გელა ხვედელიძე დანაშაულს აღიარებს.
გიორგი ფარესიშვილის პირადი ცხოვრების ამსახველი ვიდეომასალის გავრცელების გამო შინაგან საქმეთა მინისტრის პირველი მოადგილე გელა ხვედელიძე დაკავებულია. როგორც დღეს გამართულ საგანგებო ბრიფინგზე შს მინისტრმა ირაკლი ღარიბაშვილმა განაცხადა, ეს საქმე გახსნილია. მინსიტრის განმარტებით, დადგინდა, რომ აღნიშნული მასალა გადაღებულია წინა ხელისუფლების პირობებში კონსტიტუციური უსაფრთხოების დეპარტამენტის მიერ და მიზანი იყო ფარესიშვილის დაშანტაჟება, მასზე ფსიქოლოგიური ზემოქმედება და მათ სამსახურში ჩაყენება იძულებითი გზით.
"ახალი ხელისუფლების მოსვლის შემდეგ, ეს და სხვა კადრები მიკვლეული იქნა და დაილუქა დადგენილი წესით. თუმცა არ გვაქვს იმის გარანტია, რომ წინა ხელისუფლების ხელში არ არის მათი ასლები. ამ და სხვა უკანონო კადრების უსაფრთხოების უზურნველყოფა მინდობილი ჰქონდა სხვებთან ერთად ჩემს ყოფილ მოადგილეს, გელა ხვედელიძეს. ჩემთვის არასასიამოვნო ფაქტია, მაგრამ ჩემმა პირველმა მოადგილემ, გელა ხვედელიძემ სამწუხაროდ ჩაიდინა არა მხოლოდ დანაშაული, არამედ შსს-ს თანაშრომლისთვის შეუფერებელი საქციელი. მან არაადეკვატურად და მტკივნეულად მიიღო მის მიმართ მედიით გავრცელებული სრულიად უსაფუძვლო ცილისმწამებლური განცხადებები და ფარესიშვილზე შურისძიების მოტივით ინტერნეტსივრცეში დამოუკიდებლად გაავრცელა. მისი ფიქრით, ამგვარი ხერხით, შეწყდებოდა მის მიმართ წარმოებული ეს ცილისმწამბელური კამპანია", - განაცხადა მინისტრმა.
***
შინაგან საქმეთა მინისტრის ყოფილი მოადგილე, დაკავებული გელა ხვედელიძე დანაშაულს აღიარებს. ამის შესახებ ნათქვამია შინაგან საქმეთა სამინისტროს მიერ გავრცელებულ განცხადებაში. მათივე ინფორმაციით, საქართველოს შინაგან საქმეთა სამინისტროს გენერალურმა ინსპექციამ, გელა ხვედელიძე საქართველოს სისხლის სამართლის კოდექსის 157-ე მუხლის მე-2 ნაწილით გათვალისწინებული დანაშაულის ჩადენისთვის დააკავა.
"გამოძიებით დგინდება, რომ გელა ხვედელიძემ, პირადი მოტივით, ჟურნალისტ გიორგი ფარესაშვილს ინტერნეტ-ქსელში უკანონოდ გაუვრცელა ამ უკანასკნელის პირადი ცხოვრების ამსახველი ვიდეომასალა. დაკავებული აღიარებს ჩადენილ დანაშაულს", - ნათქვამია შსს-ს განცხადებაში.