ეროვნული ბანკის დიდი პროკურატურიზაცია იწყება?!
ეროვნული ბანკის დიდი პროკურატურიზაცია იწყება?!
14-05-2012
ეროვნულ ბანკს  ბევრი უკანონო კანონი მოარგეს

ბიძინა ივანიშვილის ქართულ პოლიტიკაში გამოჩენამ ხელისუფლება ააფორიაქა. "ნაცმოძრაობის" ლიდერები კანონს კანონზე ცვლიან და როგორც საზოგადოების ნაწილი ამბობს, კანონმდებლობას ახალ-ახალი აბსურდებით ავსებენ. ამჯერად პარლამენტმა სასწრაფო წესით ცვლილებები შეიტანა "საქართველოს ეროვნული ბანკის შესახებ" საქართველოს ორგანულ კანონში. ცვლილებები ისევ და ისევ ივანიშვილს უკავშირდება.

2012 წლის 30 აპრილამდე ეროვნული ბანკის საბჭოს წევრები შეიძლებოდა ყოფილიყვნენ "საქართველოს ან უცხო ქვეყნის მოქალაქეები, პროფესიონალები ეკონომიკის ანდა ფინანსების დარგში და გამორჩეულნი პატიოსნებით". 30 აპრილის ცვლილებით კი "ეროვნული ბანკის საბჭოს წევრები შეიძლება იყვნენ საქართველოს ან უცხო ქვეყნის მოქალაქეები, პროფესიონალები ეკონომიკის, ფინანსების ან სხვა შესაბამის(?!) დარგში, გამორჩეული პატიოსნებით.ეროვნული ბანკის საბჭოს შემადგენლობაში სხვა შესაბამისი დარგის პროფესიონალთა რაოდენობა არ უნდა აღემატებოდეს ორს".
დავინტერესდით, რომელია "ეკონომიკისა და ფინანსების შესაბამისი დარგი" და რომელი კლასიფიკაციით არის ეს განსაზღვრული? ვინ უნდა განსაზღვროს ეკონომიკის შესაბამისი დარგები, მაგრამ განმარტება, კანონი ან ნორმატივი ვერსად აღმოვაჩინეთ.

დემურ გიორხელიძე, ექსპერტი: "რომელია ეკონომიკისა და ფინანსების შესაბამისი დარგი? ნამდვილად ვერ გიპასუხებთ. ასეთი კლასიფიკაცია არ არსებობს. ეს არის სპეციალურად გაკეთებული ჩასწორება იმისათვის, რომ ეროვნული ბანკის საბჭოში სასურველი პირები შეიყვანონ. ეროვნული ბანკი რეალურად არც არსებობს. მას არავინ არაფერს ეკითხება და არც ეკონომიკურ პოლიტიკას განსაზღვრავს. ისეთ მნიშვნელოვან საკითხს, როგორიც ბანკის მართვაა, იოლად წყვეტს იმ პირთა ჯგუფი, რომელსაც წარმოდგენა არა აქვს იმ საქმეზე, რასაც ეროვნული ბანკი უნდა აკეთებდეს. აშკარაა, სასურველი ხალხის ჩასმა აქვთ განზრახული. ეჭვი მაქვს, ამ ცვლილებით ეროვნული ბანკის შიდა სტრუქტურასაც დაუქვემდებარებენ ძალოვანი უწყებების კონტროლს".

დემურ გიორხელიძის მსგავსად ამ კითხვაზე ვერც ერთმა ექსპერტმა, ეკონომისტმა და იურისტმა პასუხი ვერ გაგვცა. ბევრი რომ აღარ გავაგრძელოთ, როგორც ჩანს, ეროვნული ბანკის პროკურატურიზაცია მიმდინარეობს. საქართველოს პრეზიდენტმა უკვე წარუდგინა პარლამენტს კანდიდატურები პროკურატურიდან. სხვათა შორის, პარლამენტს შეუძლია არ დაამტკიცოს თუნდაც პრეზიდენტის მიერ წარდგენილი კანდიდატურა, მაგრამ საქართველოს პარლამენტის კომიტეტებისა და ფრაქციების თავმჯდომარეებს აპარატის უფროსმა დავით ჯანიაშვილმა ოფიციალური წერილები უკვე მისწერა პროკურატურის მაღალჩინოსნის ვაჟა ჯანყარაშვილისა და ასევე პროკურატურის წარმომადგენლის ნიკოლოზ გონგლიშვილის ეროვნული ბანკის სამეთვალყურეო საბჭოს წევრის თანამდებობაზე დანიშვნის (და არა არჩევის) მოთხოვნით.

ამ ორი კანდიდატურის წარდგენამდე ეროვნული ბანკის სამეთვალყურეო საბჭოს ორი წევრი - მიხეილ თოქმაზიშვილი და სიმონ გელაშვილი  თანამდებობებიდან გაათავისუფლეს. კონფიდენციალური წყაროს ინფორმაციით, ისინი არასანდო პირების კატეგორიაში მოხვდნენ, რადგან "ქართუ ბანკის" პრეზიდენტისა და სამეთვალყურეო საბჭოს თავმჯდომარე ნოდარ ჯავახიშვილის თანაკურსელები აღმოჩნდნენ. ბოროტი ენები ამბობენ, პროკურატურიდან მოსულ, მაგრამ სპეციალობით ეკონომისტ ეროვნული ბანკის პრეზიდენტს - გიორგი ქადაგიძეს ჯანყარაშვილი და გონგლიაშვილი ზურაბ ადეიშვილმა მაკონტროლებლად გამოუგზავნა, რადგან თავად ქადაგიძეც ნოდარ ჯავახიშვილის ნათესავია. ჩვენ ინფორმაციის გადამოწმების მიზნით  მივმართეთ ნოდარ ჯავახიშვილს:

- ამბობენ, რომ მიხეილ თოქმაზიშვილი და სიმონ გელაშვილი თქვენი თანაკურსელები იყვნენ და სწორედ ამის გამო გაათავისუფლეს.
- რატომ გაათავისუფლეს ვერ გეტყვით, ჩემი თანაკურსელები კი ნამდვილად იყვნენ.

- ქადაგიძეც თქვენი ნათესავია?
- გიორგი ქადაგიძის მამიდაშვილი ჩემი ძმისშვილია.

გიორგი ცაგარეიშვილი, პარლამენტარი: - პარლამენტს პირდაპირ პროკურატურიდან წამოყვანილი
ორი კაცი დაანიშვნინეს ეროვნული ბანკის საბჭოში (არჩევის პრაქტიკა კარგა ხანია წარსულს ჩაჰბარდა). ამიტომაც დაამატეს ეს უაზრო ჩანაწერი კანონში. ქვეყანაში ჩრდილოვანი მმართველობაა. ქვეყანას მართავენ არა ის პირები, რომელთაც ჩვენ ვხედავთ და მთავრობა გვგონია, არამედ ჩრდილოვანი მთავრობის რუხი კარდინალები, -  შინაგან საქმეთა და იუსტიციის მინისტრები. ქვეყანაში რეალურად ორი მინისტრი გვყავს, რომელთაც დანაწილებული ფუნქციები და თავიანთი საკურატორო სფეროები აქვთ. მაგალითად, ეროვნულ ბანკს, ფინანსთა სამინისტროსა და შემოსავლების სამსახურს ზურაბ ადეიშვილი აკონტროლებს. შინაგან საქმეთა სამინისტრო კი - ენერგეტიკის, გარემოს დაცვის სამინისტროებს, ხეტყის ბიზნესს. ეროვნულ ბანკში იუსტიციის მინისტრის პირდაპირი მითითებით ნიშნავენ კადრებს. ალბათ, ყველას ახსოვს, რომ გიორგი ქადაგიძე, ეროვნული ბანკის დღევანდელი პრეზიდენტიც, პროკურატურის კადრია.

მაშინ ეროვნულ ბანკს რომან გოცირიძე ხელმძღვანელობდა. მას კანონიდან გამომდინარე ვერ ხსნიდნენ. სამაგიეროდ, 2008 წელს ბანკების ზედამხედველობის ფუნქცია, რომელიც ეროვნული ბანკის სისხლხორცეული ფუნქციაა,  ეროვნულ ბანკს ჩამოართვეს, ქადაგიძეს კი  სპეციალური სამსახური შეუქმნეს და ეს ფუნქცია მის სამსახურს გადასცეს. როგორც კი გოცირიძეს პრეზიდენტობის ვადა ამოეწურა, ეროვნული ბანკის პრეზიდენტად გიორგი ქადაგიძე დანიშნეს, კანონი ისევ შეცვალეს და კომერციული ბანკების ზედამხედველობის ფუნქცია ისევ ეროვნულ ბანკს დაუბრუნეს. ბანკები კანონით გახადეს ვალდებული, კომერციული საიდუმლოება გადასცეს ეროვნულ ბანკს, მან კი ინფორმაცია  პროკურატურას მიაწოდოს.

დიმიტრი გაბუნია, იურისტი: ეკონომიკისა და ფინანსების "შესაბამის დარგზე" არაფერი მსმენია. არც კანონი ვიცი მსგავსი ჩანაწერით და არც ნორმატიული აქტი. როგორც ჩანს, ეს ისეთივე მორგებული კანონია, როგორიც ყველა სხვა. ეროვნულ ბანკს ამ ბოლო დროს ბევრი უკანონო კანონი მოარგეს. თავის დროზე უმრავლესობის ინიცირებული კანონპროექტი, რომელიც საბანკო ანგარიშების მონიტორინგს შეეხებოდა, სხვა არაფერი იყო, თუ არა სიტუაციაზე მორგებული კანონპროექტი, რომელიც მალე კანონად იქცა.

ეს ცვლილებები მოახლოებულ საპარლამენტო არჩევნებს უკავშირდება. სისხლის სამართლის საპროცესო კოდექსსაც ახალი მუხლი დაუმატეს. ამ მუხლით პროკურატურას საბანკო ანგარიშების მონიტორინგის უფლება მიენიჭა. კანონის მიხედვით, თუ არსებობს დასაბუთებული ვარაუდი, რომ პირი დანაშაულებრივ ქმედებას საბანკო ანგარიშის გამოყენებით სჩადის, პროკურორი უფლებამოსილია საქართველოს მთავარი პროკურორის ან მისი მოადგილის თანხმობით, შუამდგომლობით მიმართოს სასამართლოს საბანკო ანგარიშების მონიტორინგის შესახებ განჩინების გაცემის თაობაზე. ყველამ კარგად ვიცით, რომ ეროვნული ბანკი მონიტორინგს უწევს კომერციულ ბანკებს, კარგად ვიცით ისიც, რომ თუ არსებობდა დასაბუთებული ეჭვი ოპერატიული სამძებრო-საქმიანობის კანონიდან გამომდინარე, ისედაც შეეძლოთ ბანკიდან ინფორმაციის გამოთხოვა, მაშინ რა საჭირო იყო ეს? სინამდვილეში ამ კანონპროექტით დააკანონეს საგამოძიებო ორგანოების ფარული ქმედებანი. ეს არის საჯაროდ გაცხადებული ზეწოლა, ვისაც ეხება იმათ საყურადღებოდ - არ გაბედოს ვინმემ თანხის გადარიცხვა  ოპოზიციურად განწყობილი ძალებისათვის, თორემ ჩვენ ვიცით და ჩვენმა ბიჭობამო!  ეროვნულ ბანკში პროკურატურის კადრების შეყვანა ეროვნულ ბანკზე სრული კონტროლის დაწესებას გულისხმობს!

ვინ არის ვაჟა ჯანყარაშვილი

ვაჟა ჯანყარაშვილმა 1979 წელს დაამთავრა თბილისის ივანე ჯავახიშვილის სახელობის უნივერსიტეტის იურიდიული ფაკულტეტი. 1984-1989 წლებში მუშაობდა საქართველოს სსრ პროკურატურაში სხვადასხვა პოზიციაზე, დაწყებული თანაშემწით, დამთავრებული პროკურორით. 90-იან წლებში ჯანყარაშვილი წითელწყაროს პროკურორად, ხოლო 1995-2000 წლებში საქართველოს პროკურატურისა და შს ორგანოებში გამოძიების კანონიერებაზე ზედამხედველობის სამმართველოს უფროსის მოადგილედ მუშაობდა. 2001-2003 წლებში გენერალური პროკურატურის გენერალური ინსპექციის უფროსი იყო. ვაჟა ჯანყარაშვილი არც ვარდების ხელისუფლებას დაუწუნია კომუნისტური ან შევარდნაძისეული "ბნელი" ეპოქის გამო. "ვარდების რევოლუციის" მამებმა ის გენერალური პროკურატურის უკანონო შემოსავლის ლეგალიზაციაზე სისხლისსამართლებრივი დევნის სპეციალური სამსახურის უფროსად დანიშნეს.
2004-2007 წლებში გენერალურ პროკურატურაში უკანონო შემოსავლების ლეგალიზაციაზე სისხლისსამართლLებრივი დევნის სპეცსამსახურის უფროსის მოვალეობის შემსრულებელია, 2007-2008 წლებში კი საქართველოს გენპროკურატურაში შს სამინისტროს ტერიტორიულ ორგანოებში გამოძიების საპროცესო ხელმძღვანელობის დეპარტამენტის უფროსის მოადგილე.

2008-2009 წლებში მთავარ პროკურატურაში შს სამინისტროს ტერიტორიულ ორგანოებში გამოძიების საპროცესო ხელმძღვანელობის დეპარტამენტის უფროსის მოადგილედ მუშაობს, 2009-2010 წლებში კი საქართველოს მთავარი პროკურატურის სამსახურებრივი ინსპექტირების დეპარტამენტის უფროსის მოადგილედ.

2010 წლიდან დღემდე  საქართველოს მთავარ პროკურატურაში საპროკურორო საქმიანობის კონტროლისა და საქართველოს იუსტიციის სამინისტროს გენერალურ ინსპექციაში გამოძიების საპროცესო ხელმძღვანელობის სამმართველოს უფროსია.

ვინ არის ნოკოლოზ გონგლიშვილი

ნიკოლოზ გონგლიშვილმა 1990 წელს დაამთავრა საქართველოს ტექნიკური უნივერსიტეტი ელექტროქიმიურ წარმოებათა სპეციალობით. 1997 წელს დაამთავრა თბილისის დამოუკიდებელი უნივერსიტეტი "აჭარა" ფინანსებისა და კრედიტის სპეციალობით.
2005-2006 წლებში იყო თბილისის მერიის კულტურის სამსახურის აღრიცხვა-ანგარიშგების განყოფილების უფროსი. 2006 წელს გადაიყვანეს გენერალური პროკურატურის ეკონომიკური დეპარტამენტის უფროსის მოადგილედ.

2006-2008 წლებში ეკავა საზოგადოებრივი მაუწყებლის ფინანსური დირექტორის თანამდებობა. 2008 წლიდან დღემდე კი საქართველოს ფინანსური მონიტორინგის სამსახურის უფროსის მოადგილეა.
ყოფილი პროკურორი
24 დეკემბერი 2013 22:41
ვაჟა ჯანყარაშვილი არის ღირსეული პიროვნება. უაღრესად პატიოსანი, კვალიფიციური იურისტი. ივანიშვილმა როგორც აღნიშნა ადეიშვილიც კვალიფიციური იურისტიაო. ისინი რომ ემსახურონ ქვეყანას არა სააკაშვილის ბოროტი არამედ ლიბერალური ანუ დღევანდელი მთავრობის პირობებში უკეთესია. ჯანყარაშვილი მსახურობდა როგორც პროკურატურის ძველი ისე ახალი მმართველობის პირობებში. ეს ნიშნავს, რომ კვალიუფიციური და პატიოსანი კადრი ყველა მთავრობაში იყო და არის და ასრულებენ მოვალეობებს. მასზე რაიმე კომპრომატი არ არსებობს. ესეც მიუთითებს, ჯანყარაშვილის დიდ პროფესიონალიზმზე და პატიოსნებაზე.
გია ნიშნიანიძე
24 დეკემბერი 2013 22:32
ვაჟა ჯანყარაშვილი სსრკ პროკურატურის დანაშაულის შემსწავლელ საკავშირო ინსტიტუტის დასწრებულ ასპირანტურაში სწავლობდა, სადაც კრიმინოლოგიაში მოამზადა და დაიცვა საკანდიდატო დისერტაცია.წითელ დიპლომზე დაამთავრა თბილისის სახელმწიფო უნივერსიტეტის იურიდიული ფაკულტეტი და გაგზავნილი იქნა აღნიშნული კრიმინოლოგიის ინსტიტუტის მიზნობრივ ასპირანტურაში.
1983 წლიდან მუშაობს პროკურატურის ორგანოებში ხელმძღვანელ თანამდებობებზე. არის უაღრესად პატიოსანი და კვალიფიციური იურისტი. ამიტომაც შემოტჩა სისტემას, საიდანაც დაითხოვეს უმრავლესი პროკურორები. არის დედოფლისწყაროდან. ირაკლი ღარიბაშვილიც ამ რაიონიდანაა. ასეთ კადრს ენდო დასწორადაც მოიქცა.
სხვა სიახლეები
რუსეთის პრეზიდენტმა ვლადიმერ პუტინმა წლის შემაჯამებელი პრესკონფერენცია გამართა, როემლზეც ძირითადად ქვეყანაში შექმნილ ვითარებაზე ილაპარაკა. განიხილა ქყვეყნის ეკონომიკა, ისაუბრა რუბლის ინფლაციაზე და უკრაინაში მიმდინარე მოვლენებზე.

რუსეთის პრეზიდენტის ვლადიმერ პუტინის განცხადებით, რუსეთში შექმნილი ეკონომიკური ვითარება არ არის ყირიმისთვის საფასური.
მისივე განცხადებით, უფრო სწორი იქნება იმის თქმა, რომ ეს არის ფასი რუსეთის ბუნებრივ სურვილზე, შეინარჩუნოს საკუთარი სახელმწიფო, ცივილიზაცია და სუვერენიტეტი. "იქნებ ჩვენს დათვს მშვიდად ჯდომა სჭირდება. იქნებ არ უნდა გოჭებისა და საღორის მართვა ტაიგაზე? იქნებ თავი დაანებონ ჩვენს დათვს? მაგრამ არ დაანებებენ. ყოველთვის ეცდებიან მის ჯაჭვით დაბმას. როგორც კი ამას მოახერხებენ, მაშინვე კბილებსა და ფრჩხილებს დააგლეჯენ." - განაცხადა ვლადიმერ პუტინმა.

"რუსეთის ეკონომიკა გამოვა ამ მდგომარეობიდან დაახლოვებით 2 წლის განმავლობაში, ეკონომიკა განიცდის ადაპტაციას, ის ზრდის მაჩვენებელს დაუბრუნდება, ეს გარდაუვალი." - განაცხადა რუსეთის პრეზიდენტმა, რომელმაც ქართველი ჟურნალისტის შეკითხვაზე, თუ რა დამოკიდებულება აქვს პუტინს საქართველოსთან დაკავშირებით და მიიღებს თუ არა ის საქართველოს პრეზიდენტს მოსკოვში, მან უპასუხა, რომ ის თავის დროზე ეუბნებოდა საქართველოს ექსპრეზიდენტ მიხეილ სააკაშვილს, რომ არ დაეწყო საომარი მოქმედებები,რომელიც ჯერ დათანხმდა ამ წინადადებას, მაგრამ მაინც დაიწყო. პუტინმა გაიხსენა 1918 წელი, როცა რუსეთის იმპერია დაიშალა და საქართველო გახდა დამოუკიდებელი სახელმწიფო, მაშინაც აფხაზებმა მოინდომეს რუსეთთან ყოფნა. პუტინის თქმით, მოლაპარაკება აუცილებელია. "პოლიტიკური მოლაპარაკება უნდა შედგეს საქართველოს მთავრობასა და რუსეთს შორის, ძალიან რთულია ამის გაკეთება, მაგრამ აუცილებელია პირდაპირი კონტაქტი, საქართველომ ნაბიჯი გადმოდგა და ჩვენ გავუხსენით რუსული ბაზარი. რაც შეეხება პრეზიდენტის მიღებას მოსკოვში, თუ საქართველოს მთავრობა საჭიროდ მიიჩნევს, ჩვენ დიდი სიამოვნებით შევხვდებით საქართველოს პრეზიდენტს და მთავრობის ხელმძღვანელებს მოსკოვში." - განაცხადა პუტინმა.
დაწვრილებით...
"რუსულ-აფხაზური მოკავშირეობა ძალაში შედის და "ენეგურჰესი" პირველი ნაბიჯია..." "ენგურჰესის მფლობელად აფხაზური მხარე უნდა გამოცხადდეს"

"აფხაზებს შეუძლიათ საქართველოსკენ არ გამოუშვან გამომუშავებული ელექტროენერგია, თუმც, ასეთ სისულელეზე არ წავლენ, რადგან მაშინ საერთოდ გაჩერდება "ენგურჰესი"

"ჩერნომორენერგოს" ხელმძღვანელი ბაღაფში იყო, შემდეგ ბაღაფშის კლანს ანქვაბი მფარველობდა, ამიტომაც დაერია "ჩერნომორენერგოს" მაშინდელ ხელმძღვანელობას ხაჯიმბა
დაწვრილებით...
თეთრ სახლში ბუშების დინასტიის კიდევ ერთი წარმომადგენელი შევა?!
დაწვრილებით...
მარგველაშვილმა, როგორც ჩანს, მთავარობა კიდევ ერთხელ დააყენა ფაქტის წინაშე...

"ყოველივე ამის შემდეგ კი ექსპრემიერი ბიძინა ივანიშვილი ალბათ კიდევ ერთხელ იტყვის, რომ პრეზიდენტ მარგველაშვილს ვიზიტები და სკანდალები ძალიან უყვარს..."
დაწვრილებით...
"ერთ-ერთი ძმა, რომან ჩხენკელი, თავის დროზე  "ქართუ" ბანკის გაკოტრების სქემის შექმნა-განხორციელების გამო დაპატიმრებულიც კი იყო. ასე რომ, დასკვნა საზოგადოებამ გააკეთოს, ეკონომიკურ საკითხებში გამოუცდელი პირი რატომ გახდა პრემიერ-მინისტრის მთავარი საყრდენი ფიგურა."

"ის, რომ სახელისუფლებო წრეების ზოგიერთი წარმომადგენელი ბიზნესწრეებზე გავლენას დღემდე ინარჩუნებს, იმითაც გამოჩნდა, თუ როგორ უცებ აღმოჩნდნენ საპარლამენტო უმრავლესობის ზურგის გამმაგრებლებად სწორედ ის დეპუტატები, რომლებიც ბიზნესს ფლობენ."
დაწვრილებით...
"ვინმემ გააგებინოს გუბერნატორებს, რომ ფეოდალებივით ნუ იქცევიან"

"სადამდე მიიყვანენ რეგიონებს უუნარო მმართველები, ძნელი წარმოსადგენი არ არის"
დაწვრილებით...
"ჭიკაიძეს აუცილებლად გაუშვებენ, მაგრამ ჯერ არა"

ორი კვირის განმავლობაში მოწმენი ვიყავით, მთავრობის მეორე ეშელონის წარმომადგენლები ერთმანეთის მიყოლებით როგორ ტოვებდნენ თანამდებობებს.
დაწვრილებით...
წინა კვირას ხელისუფლებიდან ისეთი ადამიანები წავიდნენ, რომელთა მეშვეობით ღარიბაშვილი სხვადასხვა უწყებას აკონტროლებდაო.
დაწვრილებით...
"მივმართავ საქართველოს ხელისუფლებას, გამოიყენოს ისტორიული შანსი და რუსეთსა და თურქეთს საქართველოს ტერიტორიაზე გაზსადენის გაყვანა შესთავაზოს", - ამ წინადადებით  ხელისუფლებას "დემოკრატიული მოძრაობა - ერთიანი საქართველოს" ლიდერმა ნინო ბურჯანაძემ მიმართა.
დაწვრილებით...
ეს თუ მართლაც ასე მოხდა, ეს ნამდვილი ნონსენსი იქნება, რადგან ერთ ქვეყანაში დამნაშავედ გამოცხადებული და სისხლის სამართლებრივი დევნის ობიექტი პირი, მეორე ქვეყანაში დამნაშავეთა დევნას განახორციელებს.
დაწვრილებით...
50 კვ.მ. ასევე მცირე დროით საბურთალოზე,მეტროსთან ახლოს...
1-ოთახიანი, 34 კვ.მ. მ"სამგორიდან" 5-7 წუთის ...
ფასი: ...
ფასი: ...
მამულ-დედული
Notice: Undefined index: a in /var/www/html/www.kvirispalitra.ge/modules/mod_ads/helper.php on line 92 Notice: Trying to get property of non-object in /var/www/html/www.kvirispalitra.ge/modules/mod_ads/helper.php on line 22 Notice: Trying to get property of non-object in /var/www/html/www.kvirispalitra.ge/modules/mod_ads/tmpl/default.php on line 12 Notice: Trying to get property of non-object in /var/www/html/www.kvirispalitra.ge/modules/mod_ads/tmpl/default.php on line 16