”ხელისუფლებამ ამ დაკავებით ქვეყნის მართვაში შექმნილი პრობლემების გადაფარვა სცადა”
უმცირესობის ლიდერ დავით ბაქრაძესთან ინტერვიუ უკვე ჩაწერილი გვქონდა, როდესაც ვანო მერაბიშვილისა და ზურაბ ჭიაბერაშვილის დაკავების თაობაზე გავრცელად ინფორმაცია. თუმცა ინტერვიუს დასაწყისში სწორედ ამ საკითხზე მის მოსაზრებას გთავაზობთ:
- ვანო მერაბიშვილისა და ზურაბ ჭიაბერაშვილის დაკავებით აშკარაა, რომ ახალმა ხელისუფლებამ ქვეყნის მართვაში შექმნილი პრობლემების გადაფარვა სცადა. ბოლო კვირების განმავლობაში არაერთი სკანდალი ვნახეთ, ეს შეეხებოდა 80 მილიონი ლარის გაფლანგვას, რაზეც სოფლის მეურნეობის სამინისტროს მაღალჩინოსნები არიან დაკავებულნი, შინაგან საქმეთა მინისტრის მოადგილესთან დაკავშირებული სკანდალი, როდესაც მან ადამიანის პირადი ცხოვრების ამსახველი კადრები გამოაქვეყნა, ის ეჭვები, რაც ამ ხელისუფლების რიგი წარმომადგენლების კორუფციულ სქემებში მონაწილეობაზე გამოითქმის და ბოლოს 17 მაისის აქცია, როდესაც ხელისუფლებამ ვერ მოხერხა ძალადობის აღკვეთა. გასაგებია, რომ გამოძიება მიმდინარეობდა, მაგრამ ახლა ეს დაკავება სწორედ ამ ყველაფრის გადაფარვას ემსახურება, მით უფრო, რომ ვანო მერაბიშვილს, რომელსაც რას აღარ აბრალებდნენ, რეალურად წაუყენეს ბრალი იმისთვის, რომ 22 000 ადამიანს ხელფასს უხდიდა. ეს ბუნებრივად წარმოშობს ეჭვს, რომ ამ პროცესების ამოცანა მართლა სამართლიანობის აღდგენა კი არ არის, არამედ კონკრეტული ადამიანების პოლიტიკური დევნა და დასჯა. ეს ყველაფერი კი აუცილებლად ძალიან მძიმედ აისახება ქვეყნის საერთაშორისო იმიჯზე.
- ბატონო დავით, როგორ შეაფასებთ 17 მაისს თბილისში მომხდარ არეულობას?
- რაც მოხდა, ეს ძალიან მნიშვნელოვანი ტესტი იქნება ხელისუფლებისთვის. მთავრობის ვალდებულებაა, აღკვეთოს ქვეყანაში ძალადობა და არ დაუშვას ამგვარი დაპირისპირებები. თუ მომხდარზე სწორი რეაგირება არ იქნება, ეს ყველა იმ ადამიანს წაახალისებს, რომელიც ფიქრობს, რომ განსხვავებულად მოაზროვნეს თავში სკამის ჩარტყმით უნდა გაუსწორდე, ასეთ შემთხვევაში ქვეყანა მართლაც 90-იან წლებში დაბრუნდება. როგორც არ უნდა მოგვწონდეს ვინმე, უნდა შევიგნოთ, რომ ამ ადამიანებსაც აქვთ არსებობის უფლება.
- ბატონო დავით, არაერთი ადამიანისგან მოვისმინე, რომ მომხდარით სწორედ ”ნაციონალური მოძრაობა”იყო დაინტერესებული, რომ ჰომოფობიის საწინაარმდეგო აქციას სწორედ თქვენ დაუჭირეთ მხარი და ამით საზოგადოების გარკვეულის ნაწილის პროვოცირება სცადეთ...
- თუ ლაპარაკია ლიბერალური ღირებულებების დაცვაზე, ”ნაციონალური მოძრაობა”ყოველთვის იცავდა ამ ღირებულებებს, თუმცა არც ამ და არც სხვა ამგვარი ტიპის აქციასთან არანაირი შეხება არ გვქონია. მიმაჩნია, რომ როგორიც არ უნდა იყოს საზოგადოების განწყობა იმ წუთში, პოლიტიკოსს არ უნდა შეეშინდეს თავისი პოზიციის გამოხატვის. ვფიქრობ, ჩემი, თქვენი და ჩვენი შვილების თავისუფლებისთვის უმნიშვნელოვანესია, რომ განსხვავებულად მოაზროვნე ადამიანებს ჰქონდეთ საკუთარი აზრის გამოხატვის საშუალება. მე, როგორც პოლიტიკოსს, რაც არ უნდა მინდოდეს, ვასიამოვნო იმ ადამიანებს, რომლებიც რუსთაველის გამზირზე გამოვიდნენ და უმრავლესობას წარმოადგენდნენ, ამას არ გავაკეთებ, განსხვავებით უმრავლესობაში მყოფი ზოგიერთი კოლეგისაგან, რომლებმაც სამარცხვინო კომენტარები არიგეს. მე ვარ ტრადიციულ ოჯახში გაზრდილი, მართლმადიდებელი ადამიანი, მაგრამ მიმაჩნია, რომ ამ ქვეყანაში ყველას გამოხატვის უფლება უნდა იყოს დაცული. ”ნაციონალური მოძრაობა”ადამიანის უფლებებს დაიცავს მომავალშიც, თუმცა, ვიმეორებ, ”იდენტობის”აქციასთან არანაირი შეეხება არ გვქონია, ამას კატეგორიულად ვაცხადებ. ესეც იმ ადამიანების ფანტაზიის ნაყოფია, რომლებიც ცდილობენ ყველაფერი ”ნა-ციონალურ მოძრაობას”დააბრალონ.
- თქვენ განსხვავებული აზრის მიუღებლობაზე ლაპარაკობთ, ოპონენტები აუცილებლად გაგახსენებენ 7 ნოემბერს და 26 მაისს, როდესაც თქვენი ხელისუფლება ადამიანებს სწორედ განსხვავებული აზრის გამო გაუსწორდა სასტიკად.
- შეიძლება ვიკამათოთ იმაზე, რამდენად სწორი იყო სახელმწიფოს მიერ გამოყენებული კონკრეტული ზომები თქვენ მიერ ნახსენებ დღეებში, მაგრამ დიდი განსხვავებაა, როდესაც ძალას იყენებს სახელმწიფო და როდესაც ძალას იყენებენ ცალკეული არასახელმწიფოებრივი ჯგუფები. შეიძლება ვიდავოთ ანაც მივიღო თქვენი პრეტენზიები, მზად ვარ, ამაზე კრიტიკაც მოვისმინო, მაგრამ როდესაც ადამიანების ერთი ჯგუფი ძალადობს მეორეზე და პოლიცია ამის აღკვეთას ვერ ახერხებს, ეს ბევრად უფრო საშიშია სახელმწიფოსთვის.
- ”ნაციონალური მოძრაობის”პრაიმერში მიიღებთ მონაწილეობას?
- გვინდა, რომ ეს იყოს გამჭვირვალე პროცესი. რაც შეეხება კანდიდატებს, ჯერჯერობით მათგან მხოლოდ ორის დასახელება შემიძლია, ესენია: გია ბარამიძე და ზურა ჯაფარიძე. მომავალ საპრეზიდენტო არჩევნებში ჩვენი კანდიდატის ბედს და ზოგადად ”ნაციონალური მოძრაობის” მომავალს მნიშვნელოვნად განსაზღვრავს ის, თუ როგორ მოიქცევა პარტია, რომელიც წარმოადგენს საპარლამენტო ოპოზიციას. ამიტომ ჩემი პირადი განწყობა მკარნახობს, რომ უმჯობესია მუშაობა სწორედ პარლამენტში გავაგრძელო. თუმცა არაერთი ჩემი თანაგუნდელი მიიჩნევს სხვანაირად, მათ სურთ, რომ მე ამ პრაიმერში მონაწილეობა მივიღო. რა თქმა უნდა, მათ აზრსაც გავითვალისწინებ, თუმცა გადაწყვეტილებას უფრო ჩემი შეხედულებისამებრ მივიღებ.
- კარგა ხანია, მითქმა-მოთქმაა იმაზე, რომ აპირებთ დატოვოთ ”ნაციონალურ მოძრაობა”, მეტიც, თითქოს საერთოდ გეგმავთ პოლიტიკური ასპარეზიდან წასვლას…
- უახლოეს მომავალში ნამდვილად არ ვაპირებ პოლიტიკიდან წასვლას. სიმართლე გითხრათ, ჩემი პირადი განწყობა, კარგა ხანია, იმგვარია, რომ ოდესმე ნამდვილად სიამოვნებით გადავალ სადმე უფრო წყნარ, აკადემიურ სფეროში სამოღვაწეოდ. მიუხედავად ამისა, ვფიქრობ, რომ ჯერ-ჯერობით არც პოლიტიკურ გუნდს შევიცვლი და არც პოლიტიკიდან წავალ.
- როგორ აფასებთ ”ქართული ოცნების”საპრეზიდენტო კანდიდატს და რას ფიქრობთ თქვენი პოლიტიკური ძალის მომავალ კანდიდატსა და მის შანსებზე?
- უპირველესად ვიყოთ ობიექტურები და ვაღიაროთ, რომ ”ქართული ოცნების”კანდიდატს გამარჯვების დიდი შანსი აქვს, გამომდინარე საზოგადოების იმ მხარდაჭერიდან, რაც ამ კოალიციას, უფრო სწორად კი მის ლიდერს, ბიძინა ივანიშვილს გააჩნია. ვინც უნდა დაესახე-ლებინათ, ის აუცილებლად იქნებოდა ერთ-ერთი ძლიერი კონკურენტი და მოგების პრეტენდენტი. რაც შეეხება გიორგი მარგველაშვილს, მისი კანდიდატურა ნამდვილად მოულოდნელი იყო, ის არ ასოცირდებოდა აქტიურ პოლიტიკასა და საპრეზიდენტო ამბიციასთან. ზოგადად, საინტერესო ადამიანია, განათლების სფეროში მას ძალიან კარგი გამოცდილება აქვს, თუმცა იმ კონკრეტულ მიმართულებებში, რაზეც პასუხისმგებელი იქნება ახალარჩეული პრეზიდენტი, მარგველაშვილი არა მგონია, მაინცდამაინც ძლიერი იყოს. უპირველესად ვგულისხმობ ქვეყნის უსაფრთხოებას, საგარეო პოლიტიკასა და დიალოგს აფხაზებთან და ოსებთან ამ სფეროებში მისი გამოცდილების შესახებ ნამდვილად არაფერი გამიგია. აი, ირაკლი ალასანიაზე ამ თვალსაზრისით ბევრი რამ ვი-ცით, ირაკლი ნამდვილად ძალიან გამოცდილი ადამიანია და, განსხვავებით მარგველაშვილისგან, მასთან კითხვები არ ჩნდება. მარგველაშვილს მოუწევს გვაჩვენოს, რომ მისი ღირსება მხოლოდ ის კი არ არის, რომ ჭკვიანი ადამიანი და პრემიერის მეგობარია, არამედ ისიც, რომ მას შეუძლია ამ ყველაფერზე აიღოს პასუხისმგებლობა.
- თქვენი ხელისუფლების პირობებში მუდმივად იყო ეჭვი, რომ ადამიანებზე ტოტა-ლური თვალთვალი ხორციელდებოდა. ახალი ხელისუფლება აცხადებს, რომ ამგვარად მოპოვებული მასალის მთელი არქივი არსებობს. თქვენ პარლამენტის თავმჯდომარეობისას გაგჩენიათ ამგვარი ეჭვი?
- არა, არავითარი დადასტურებული ან დაუდასტურებელი ინფორმაცია არც ჩემთან დაკავშირებით და არც ამ ტოტალურ თვალთვალზე არ მქონია. დღეს ლაპარაკობენ იმაზე, რომ რაღაც არქივები არსებობს, ეს არის სრულიად უკანონო და მიკვირს, რომ მხოლოდ ხელისუფლებაში მოსვლიდან შვიდი თვის თავზე დაიწყეს ლაპარაკი ამ არქივის განადგურებაზე. თუ ამგვარი არქივი რეალურად არსებობს, ეს პირველივე წუთებში უნდა განადგურებულიყო, როგორც კი ახალმა ხელისუფლებამ აიღო ხელში ძალაუფლება. მანამდე არ გაახსენდათ ეს, ვიდრე ასეთი სკანდალი არ აგორდა და ვიღაცის პირადი ცხოვრების შესახებ ინფორმაცია ასეთი საშინელი გზით არ გამოქვეყნდა. რვა თვე სრულიად საკმარისი უნდა ყოფილიყო ამ საქმის გამოსაძიებლად. თუ დასაბუთებლად იტყვიან, რომ ეს თვალთვალი რომელიმე კონკრეტული ადამიანის დაკვეთით ხდებოდა, ვინც არ უნდა იყოს ის, ჩემგან მის დასაცავად ერთ სიტყვასაც კი ვერ მოისმენთ.
ნათია დოლიძე (სპეციალურად საიტისთვის)