"კარაქა": "ჩემთვის "სნეგუროჩკა" მაინც არავის დაურქმევია, როგორც ოქრუაშვილს შეარქვა კოკოითმა" (ექსკლუზივი) - კვირის პალიტრა

"კოხტა": "ოქრუაშვილი გამოვიდა და პირველკლასელივით ილაპარაკა! მაგას მერად კი არა, ბრიგადირადაც არავინ აირჩევს"

ვინ არიან ოქრუაშვილის მიერ "გორის მამებად" მიჩნეულები - "კარაქა", "ჟანგიანი", "კულა" და "კოხტა"

"გორის არჩევნები ჩემთვის არის მესამე ლიგის თამაში. ეს არის გარკვეულწილად თავის ატკივება, მაგრამ მაინც მივიღე გადაწყვეტილება, რომ ამ ქალაქში ბევრი რამ შემეცვალა... ეს ქალაქი კლანების მეშვეობით იმართებოდა 2003 წლამდე. 2004 წელს მე ეს კლანები მთლიანად დავშალე, სააკაშვილმა კი, ჩემთან დაპირისპირების შემდეგ ისევ მოაბრუნა ისინი და მათზე გააკეთა დასაყრდენი. ეს კლანები ამ ხელისუფლების პირობებშიც ისევ ადგილზე სხედან. "ქალაქის მამები" - "კარაქა", "ჟანგიანი", "კულა", "კოხტა" - კლანების წარმომადგენლები არიან " - განაცხადა ინგა გრიგოლიას გადაცემაში სტუმრობისას ყოფილმა თავდაცვის მინისტრმა ირაკლი ოქრუაშვილმა,.

ჩვენ დავინტერესდით, ვინ არიან ეს ადამიანები და რატომ მიაქცია მათ ყურადღება ყოფილმა თავდაცვის მინისტრმა... აღმოჩნდა, რომ "ჟანგიანი", ანუ თეიმურაზ ნაოჭაშვილი, ქალაქ გორის საკრებულოს დეპუტატია. როგორც გვითხრეს, ის ორი დღით გასულია ქალაქიდან, მაგრამ ყველანაირ კომენტარზე უარს ამბობს.

ტელეფონი გამორთული აქვს "კულას", ანუ ალეკო გოგლიძეს, გორის სოდ-ის ყოფილ უფროსს, ხოლო "კოხტა", იგივე გია დურგლიშვილი ამბობს, რომ არც ამ ხალხს იცნობს და არც ირაკლი ოქრუაშვილს:

- ირაკლი ოქრუაშვილის ნათქვამს პასუხის ღირსადაც არ მივიჩნევ, რადგან გამოვიდა და პირველკლასელივით ილაპარაკა! თუმცა, ერთი რამ დანამდვილებით ვიცი: მას გორისათვის კარგი არაფერი გაუკეთებია, ამიტომ, მერად კი არა, ბრიგადირადაც არავინ აირჩევს. სხვათა შორის, ძალიან მინდა კენჭი იყაროს, მაშინ უკეთესად გამოჩნდება, რა კაციც არის, თუმცა, ხალხმა ეს ისედაც მშვენივრად იცის. ადამიანი ბოროტი არ უნდა იყოს - სხვას ვერაფერს გეტყვით!

ერთადერთი, ვისაც კომენტარზე უარი არ უთქვამს, "კარაქა", ანუ დათო წეწვაძეა, რომელიც "თავისუფალი დემოკრატების" გორის გამგეობის წევრი გახლავთ:

- როგორ ფიქრობთ, რატომ დაგასახელათ ირაკლი ოქრუაშვილმა "გორის მამებს" შორის?

- აბა რა გითხრათ? - ეტყობა ჩემი მეტსახელი მოეწონა და ამიტომაც ამირჩია. ეს მეტსახელი ბავშვობის მეგობრებმა შემარქვეს, ყოველ შემთხვევაში ჩემთვის "სნეგუროჩკა" არავის დაურქმევია, როგორც ირაკლი ოქრუაშვილს შეარქვა თავის დროზე კოკოითმა. ეს იყო გაბოროტებული ადამიანის გამოსვლა, - ადამიანისა, რომელსაც არანაირი იმედი არა აქვს, რომ გაიმარჯვებს. მას ერთპროცენტიანი შანსიც კი არა აქვს, რომ გორის მერი გახდება, თუნდაც იმიტომ, რომ არაერთი ბოროტება აქვს ჩადენილი ამ ქალაქის წინაშე. ამ ადამიანს გორისათვის ცუდის მეტი არაფერი მოუტანია - არც მას და არც მისი გუნდის წევრებს.

- რას ფიქრობენ გორელები ირაკლი ოქრუაშვილის მერობაზე?

- მგონი აქ არავის აინტერესებს ოქრუაშვილი სხვებზე რას იტყვის, ეს ადამიანი არის პოლიტიკური გვამი, რომელსაც ჩვენს ქალაქში არანაირი ავტორიტეტი არა აქვს, ჯერ კენჭი არ უყრია და გორს "მესამე ლიგას" და თავის ტკივილს ეძახის. ყველას ახსოვს, ის და მისი თანამოაზრეები როგორ შედიოდნენ სახლებში, ქალებს აწიოკებდნენ, ორი კოლოფი სიგარეტისათვის ხალხს ჩხრეკდნენ და ამცირებდნენ... ამ დროს თვითონ "კამაზებით" გამოჰქონდა სიგარეტი ერგნეთის ბაზრობიდან და მილიონები იშოვა. 2003-2004 წლებში ოქრუაშვილს აქ თავისი კლანი ჰყავდა მიხეილ ქარელის თამადობით, მოიკითხეთ მისი ანგარიშები და ნახავთ რა თანხა აქვს ნაშოვნი, ან საიდან იშოვა - რასაკვირველია, წართმეული ბიზნესებიდან და წართმეული ერგნეთის ბაზრობიდან. მერე კი, ხმები გავრცელდა, რომ პრეზიდენტობას აპირებდა, სააკაშვილმაც აითვალწუნა და უკვე ვეღარ ბედავდა ამდენს.

- რაც შეეხება "კულას", "კოხტას" და "ჟანგიანს"...

- სამივეს მარტო სახით ვიცნობ, მათთან საერთოდ არა მაქვს არანაირი ურთიერთობა. "კულა", რომელიც მან ჩემთან ერთად დაასახელა, "სოდ"-ის უფროსი იყო და დასაჭერად დამდევდა. ზოგ-ზოგიერთებმა ჩემი მეტსახელის გამო კანონიერ ქურდადაც კი მომიაზრეს, მაგრამ მათ უნდა ვუთხრა: გორში მეტსახელი თითქმის ყველას ჰქვია, არ ღირს ამის გამო ადამიანის კანონიერ ქურდად შერაცხვა.

ხათუნა ჩიგოგიძე (სპეციალურად საიტისთვის)