გია ბარამიძე: "საბურთალოზე ჟვანია გარდაცვლილი ვნახე, მანამდე რა მოხდა, მხოლოდ მკვლელმა იცის" (არქივიდან) - კვირის პალიტრა

გია ბარამიძე: "საბურთალოზე ჟვანია გარდაცვლილი ვნახე, მანამდე რა მოხდა, მხოლოდ მკვლელმა იცის" (არქივიდან)

"ბარამიძის უნამუსობით გაცეცხლებული ბუსა ჟვანია, ამდენი უსამართლობის მოსმენის ფონზე მდგომარეობიდან გამოდის და ბარამიძეს თავ-პირს უერთიანებს"

"არც ჩვენი ხელისუფლებიდან უმტკიცებია ვინმეს, ჟვანია უბედური შემთხვევის გამო დაიღუპაო. გამოძიება მუშაობდა, რომ დაედგინა, რა მოხდა იმ დღეს."

გავრცელდა ინფორმაცია, რომ რამდენიმე დღის წინ, ბათუმში ზურაბ ჟვანიას ვაჟი - ბესარიონი, იგივე ბუსა, გია ბარამიძეს ფიზიკურად გაუსწორდა - ამის შესახებ გაზეთი "ალია" წერს.

"გია ბარამიძე და ბუსა ჟვანია ბათუმის ერთ-ერთი სასტუმროს ჰოლში შეხვედრიან ერთმანეთს, ბარამიძე ჟვანიას ვაჟთან მიდის და იწყებს საუბარს: "მე მამაშენის ყველაზე ერთგული მეგობარი ვიყავი, მისი სულის წინაშე მართალი ვარ, ჩემი გაზრდილი ხარ და მინდა ეს იცოდე, მამაშენისთვის არ მიღალატია"... ბარამიძეს მონოლოგი უგრძელდება, ბუსა ჟვანია ცდილობს ბარამიძე ძალიან ზრდილობიანად მოიცილოს თავიდან, ხმადაბლა და მოკრძალებით პასუხობს: საკმარისია, დაასრულე საუბარი... მაგრამ ბარამიძე ძალ-ღონეს არ იშურებს ბუსა დაარწმუნოს, რომ ვაჟკაცია... ბარამიძის უნამუსობით გაცეცხლებული ბუსა ჟვანია, ამდენი უსამართლობის მოსმენის ფონზე მდგომარეობიდან გამოდის და ბარამიძეს თავ-პირს უერთიანებს. ბუსა ჟვანიას ბარამიძისთვის თავში ისე ჩაურტყამს, რომ სისხლიც კი წამოსვლია. ბოლოს კი სულ პანჩურით გაუგდია ბუსას" - ნათქვამია სტატიაში.

ბუსა ჟვანია

გამოცემას ნინო ჟვანია - ქადაგიძემ დაუდასტურა, რომ მსგავსი ინციდენტი, თუმცა, დეტალებზე საუბრისგან თავი შეიაკავა.

მოგვიანებით გია ბარამიძემ "ფეისბუქგვერდზე" დაწერა: "სახელისუფლებო არხებით გავრცელებულ ინფორმაციაზე, ჩემი და ჩემი უახლოესი მეგობრისა და ლიდერის შვილთან, (რომელიც ჩემს თვალწინაა გაზრდილი) ბუსასთან დაკავშირებით, მინდა ვთქვა, რომ ისევე როგორც ზურას ოჯახის სხვა წევრებთან (რომლებიც პირველყოვლისა, არიან ზურას გარდაცვალებით გულმოკლულები) დაპირისპირება არასდროს მქონია და არც მექნება. მე ზურას საქმესთან დაკავშირებით პირველყოვლისა ის მაღელვებს, რომ კვლავ გრძელდება ზურას სახელით სპეკულაცია და მისი ხსოვნის შეურაცხყოფა."

გთავაზობთ გია ბარამიძის ინტერვიუს ნაწილს, რომელიც მან "კვირის პალიტრას" 2013 წელს მისცა:

"საბურთალოზე ჟვანია გარდაცვლილი ვნახე, მანამდე რა მოხდა, მხოლოდ მკვლელმა იცის"

ახალი ხელისუფლება საზოგადოებას დაჰპირდა, რომ მალე გახდება ცნობილი, რა მოხდა 2005 წლის 3 თებერვალს. საზოგადოება ინტერესით ელოდება, ვინ უღალატა პრემიერ-მინისტრს, ძველმა თუ ახალმა მეგობრებმა, თუ ყველამ ერთად? ამის შესახებ კომენტარი ზურაბ ჟვანიას მეგობარსა და თანაგუნდელ გიორგი ბარამიძეს ვთხოვეთ, რომელიც ჟვანიას მკვლელობის ერთ-ერთ თანამონაწილედაც კი სახელდება.

- გავრცელებული ინფორმაციით, პრემიერ-მინისტრი შავნაბადაზე პრეზიდენტისა და შს მინისტრის თვალწინ მოკლეს. შემდეგ ცხედარი საბურთალოზე ტელევიზორის ყუთით გადაიტანეს. ამ საქმეში თქვენი სახელიც ფიგურირებს.

- როგორ უნდა დაიჯეროს ადამიანმა ვიღაცების ნაბოდვარი, რომ ჟვანია მოკლეს და მერე ყუთით სადღაც ბარამიძემ მიიტანა. ეს რომ მონაბოდია, მთავარმა პროკურორმაც დაასაბუთა. გამოძიების დასრულებას მოუთმენლად ველოდები, შემდეგ ბევრ რამეზე შეგვიძლია ვისაუბროთ.

- კბილაშვილმა "ასავალ-დასავალის" ინფორმაცია არ დაადასტურა, თუმცა არც ის უთქვამს, რომ ჟვანია უბედურ შემთხვევას ემსხვერპლა.

- არც ჩვენი ხელისუფლებიდან უმტკიცებია ვინმეს, ჟვანია უბედური შემთხვევის გამო დაიღუპაო. გამოძიება მუშაობდა, რომ დაედგინა, რა მოხდა იმ დღეს.

- როგორ არ უთქვამთ, ჟვანიას გარდაცვალებიდან რამდენიმე საათში მერაბიშვილმა საჯაროდ განაცხადა, საქმე უბედურ შემთხვევასთან გვაქვსო. სააკაშვილსაც არაერთხელ უთქვამს ეს.

- ისინი მაღალი თანამდებობის პირები იყვნენ და მეტი ინფორმაცია ჰქონდათ, ამიტომ აძლევდნენ თავს უფლებას, ასეთ დეტალებზე ესაუბრათ. მე თუ მკითხავთ, მსგავსი განცხადებების გაკეთება არასწორი იყო, რისთვისაც დასავლეთისგან საყვედური არაერთხელ მიგვიღია.

- სახლში, სადაც გარდაცვლილები იპოვეს, უსუფოვის ცალი ფეხსაცმელი არ იყო. ეჭვს ბადებს ჯერ ექსპერტ ლევან სამხარაულის მკვლელობის ამბავი, შემდეგ კი მკვლელის თვითმკვლელობა, რომელმაც ორი იარაღით მოიკლა თავი. ბუნდოვანია ფედერალური საგამოძიებო ბიუროს დასკვნაც, რომ ორგანიზმში აღმოჩენილი მომწამლავი ნივთიერება სასიკვდილო არ იყო. ეს კითხვები არასდროს დაგისვამთ პრეზიდენტისთვის ან მერაბიშვილისთვის?

- ამის გამო მივედი დასკვნის გასაცნობად. არასდროს მიმტკიცებია, რომ ეს იყო უბედური შემთხვევა, თუმცა არც იმის საფუძვლიანი ეჭვი მქონია, რომ ვინმესთვის ხელი დამედო. ეს სულაც არ ნიშნავს იმას, რომ სხვა ვერსიას კატეგორიულად გამოვრიცხავ. საბურთალოზე ჟვანია გარდაცვლილი ვნახე, მანამდე რა მოხდა, ეს მხოლოდ მკვლელმა იცის. თუმცა ის საკითხები, რაც ეჭვს ბადებს, შეიძლება სულაც არ უკავშირდებოდეს მკვლელობის ვერსიას.

- აქვს თუ არა არსებობის უფლება იმ ვერსიას, რომ სააკაშვილის მთავრობაში გავლენიანმა პირმა, გიორგი ბარამიძემ სიმართლე იცის ჟვანიას გარდაცვალებაზე?

- რატომ უნდა დამემალა ეს? რატომ უნდა მიმეცა ვინმესთვის უფლება, ჩემი საუკეთესო მეგობარი მოეკლა?

- თუ არ ჩაერთვებოდით ამ საქმეში, შესაძლოა თქვენც საფრთხე შეგქმნოდათ.

- ჩემი შეშინება ასე ადვილი არ არის და ნურავინ იფიქრებს, ბარამიძე მეგობარს სიკვდილის პირისპირ მიატოვებდა. ყველა ომში ვარ ნამყოფი, რომელიც ქვეყნის დამოუკიდებლობისთვის გამართულა და არაერთხელ ჩამიგდია სიცოცხლე საფრთხეში. შიში ვერ

გახდებოდა იმის მიზეზი, რომ პირში წყალი ჩამეგუბებინა და ჩემი მეგობრის მკვლელობა მეპატიებინა ვინმესთვის. ბოლოს და–ბოლოს, გავიქცეოდი სადმე, სადაც ვიტყოდი, პრემიერ-მინისტრი თავისივე გუნდმა მოკლა-მეთქი. მე ხომ ვიცი, არავისთვის ხელი არ დამიფარებია. არასდროს ზურას საწინააღმდეგოდ არაფერი გამიკეთებია. მხოლოდ ჩემი სიმართლე ვიცი დაზუსტებით და სხვებზე პასუხისმგებლობას ვერ ავიღებ. გუნდში იდეალური სიტუაცია იყო და ვერ წარმომიდგენია, ვინმეს ზურას სიკვდილი ნდომებოდა. ახალი ხელისუფლება იძიებს ამ საქმეს და ყველაფერი გახდება ნათელი, რა მოხდა იმ ღამით. ამის შემდეგ სად წამივა ის ხალხი, რომლებიც ცდილობენ, ზურას მეგობრებს ცილი დასწამონ და ამით პოლიტიკური დივიდენდები მიიღონ.

იხილეთ სრულად