"არავისთვის შეურაცხყოფის მიყენება არ მიფიქრია" - გოგი თოფაძე ბოდიშს იხდის - კვირის პალიტრა

"არავისთვის შეურაცხყოფის მიყენება არ მიფიქრია" - გოგი თოფაძე ბოდიშს იხდის

საქართველოს პარლამენტის წევრმა გოგი თოფაძემ გუშინ პარლამენტში თავის გამოსვლასთან დაკავშირებით დღეს განცხადება გაავრცელა.

განცხადებაში ნათქვამია, რომ გოგი თოფაძე თავისი განცხადებით არავისთვის შეურაცხყოფის მიყენებას არ ფიქრობდა და თუ საზოგადოების ნაწილის მხრიდან დეპუტატის სიტყვები ამგვარად იყო აღქმული, ამისთვის მათ წინაშე ბოდიშს იხდის.

ამას გარდა, თოფაძემ მოუწოდა საქართველოს პრეზიდენტს, რომ მანაც მოიხადოს საზოგადოების წინაშე ბოდიში იმ სიტყვებისთვის, რომლითაც მან ქართველი ერი შეურაცხყო.

"გუშინდელ ჩემს გამოსვლას არაერთგვაროვანი შეფასება მოყვა საზოგადოებაში და ჩემი სიტყვები არასწორედ იყო აღქმული. მე მხოლოდ მოვახდინე გიორგი მარგველაშვილის სიტყვების ციტირება, რომელიც ჟურნალ "დრო მშვიდობა"-ში სათაურით "ნიჩურტა! - მე ქართველი ვარ" იქნა გამოქვეყნებული და მივუთითე, რომ მსგავსი განცხადებების გაკეთება ქართველ კაცს არ ეკადრება და იმ შემთხვევაში თუ ბატონი პრეზიდენტი ქართულ საზოგადოებას ამგვარ შეფასებას აძლევს, მაშინ მას ამ ქვეყნის პრეზიდენტობაც არ უნდა ეკადრებინა. ჩემთვის, როგორც საზოგადოების ნაწილისთვის მარგველაშვილის ამგვარი სიტყვები შეურაცხმყოფელია.

არავისთვის შეურაცხყოფის მიყენება არ მიფიქრია და თუ ჩვენი საზოგადოების ნაწილის მხრიდან ჩემი სიტყვები ამგვარად იყო აღქმული, რა თქმა უნდა, ამისთვის მათ წინაშე ბოდიშს ვიხდი.

აქვე მოვუწოდებ საქართველოს პრეზიდენტს, რომ მანაც მოიხადოს საზოგადოების წინაშე ბოდიში იმ სიტყვებისთვის, რომლითაც მან ქართველი ერი შეურაცხყო.

ჩემთვის საზოგადოება არის ერთიანი და მის დიფერენციაციას არ ვახდენ," - ნათქვამია განცხადების ტექსტში.