"ნურავის მოვეჩვენები ფანატიკოსად!.." - კვირის პალიტრა

"ნურავის მოვეჩვენები ფანატიკოსად!.."

"როგორც არ უნდა ვიკამათოთ მე და გიორგი მარგველაშვილმა სხვადასხვა საკითხებზე, გნებავთ ძირეულ იდეოლოგიაზე, ნურავინ ელოდება აქ სეირს ჩემგან მის ღალატს ან დაპირისპირებას. რაში ვერ გაუგეს ერთმანეთს გიორგიმ და ბიძინამ, საერთოდ არ მაინტერესებს. გიორგის თითოეული გამარჯვება ჩემი გამარჯვებაა, მარცხი კი - ჩემი მარცხი"

პარლამენტში ინიცირებულია საკანონმდებლო პაკეტი "ოჯახში ძალადობის აღკვეთის, ოჯახში ძალადობის მსხვერპლთა დაცვის და დახმარების შესახებ". პაკეტის ერთ- ერთი მუხლი სოციალურ მუშაკს აძლევს უფლებამოსილებას, მიიღოს გადაწყვეტილება, ბავშვის ან არასრულწლოვნის მოძალადე მშობლისგან გამოცალკევების შესახებ. ბიზნესმენი ლევან ვასაძე ამ ჩანაწერში და ზოგადად, იუვენალურ იუსტიციაში (სამართლის სისტემა, რომელიც არასრულწლოვანთა საქმეებზე ახორციელებს მართლმსაჯულებას) ოჯახური კულტურის წინააღმდეგ მიმართულ საფრთხეს ხედავს და აცხადებს, რომ ამის შესახებ წლების წინ საუბრობდა თავის წერილებში.

- სამი წლის წინ, თქვენი გაზეთის მეშვეობით, ჩემს სტატიაში "ერი და სახელმწიფო" (იხილეთ), მე ვაფრთხილებდი მკითხველს, რომ საქართველოში დაიწყებოდა ლიბერალური ტოტალიტარიზმის კიდევ ერთი, ახალი ფორმის შემოღება - გაძლიერება, რომელსაც იუვენალური იუსტიცია ჰქვია. ასევე შარშანაც, თქვენივე გაზეთი მეშვეობით, ჩემს სტატიაში "გარყვნილების პროპაგანდის ანატომია" (იხილეთ) მე საკმაოდ ვრცლად და დეტალურად ვისაუბრე იუვენალური იუსტიციის შენიღბულ რაობაზე და მის საფრთხეებზე ოჯახური კულტურის მიმართ. ეს ორივე სტატია თქვენს საიტზე დევს დღესაც.

ვერ ვხედავ აზრს უკვე ნათქვამის გამეორებისა, არც იმის სურვილი მაქვს, თავი მოვიწონო, როგორც რაღაც ცრუ წინასწარმეტყველმა. უბრალოდ ვიტყვი, რომ ძალიან სამწუხაროა, რომ ჩვენი პარლამენტი აგრძელებს ასეთ ბრმა, უფიქრალ მონობას უცხოური ფსევდომორალური დირექტივებისა და ჩვენს პარლამენტარებს არ ყოფნით არც გათვითცნობიერება და არც ეროვნული შეგნება და ვაჟკაცობა, რომ უცხოეთიდან შემოსულ, ცხვრის ქურქში გადაცმულ მგლურ, ანტიოჯახურ და ქვეყნისათვის დამანგრეველ ინიციატივებს აღუდგნენ წინ.

ბავშვზე ძალადობას ვინ ნორმალური არ გმობს, მაგრამ მე ზემოხსენებულ ორ სტატიაში ავუხსენი მკითხველს, თუ რა არის სინამდვილეში იუვენალური იუსტიცია, ვისი დაკვეთით ინერგება ის და რა მიზნებს ემსახურება. თუ ვინმეს აინტერესებს, შევიდეს თქვენს საიტზე და ნახოს. როდესაც საზოგადოება ლიბერალიზმის წყალობით ისე ირყვნება, რომ ამის შედეგად მატულობს როგორც დაუბადებელ, ისე დაბადებულ ბავშვებზე ძალადობა, მას სოციალური მუშაკები ვერაფერს უშველიან. როგორც კი სახელმწიფო თავის თავზე იღებს მორალური პოლიციელის ფუნქციებს, იქ კარგი არაფერი ხდება, ასე იყო ბოლშევიზმის დროსაც, ასე იყო ფაშიზმის დროსაც, ასე არის ლიბერალიზმის დროსაც. ეს ე.წ. "იზმები" ერთი ადგილიდანაა წარმოშობილი - დასავლეთში და მათი ძალით მოხვევა ხდება აღმოსავლეთზე, აი უკვე მეოთხე საუკუნეა. არავის დაუღვრია კაცობრიობის ისტორიაში იმდენი სისხლი, რამდენიც კომუნიზმს, ფაშიზმს და ახლა ლიბერალიზმს და ეს სამივე დასავლეთში დამუშავებული იდეოლოგიებია. მათი ჰიპნოზის ქვეშ მოხვედრილ ადამიანს ჰგონია, რომ სიკეთისა და თავისუფლებისათვის იბრძვის (მითუმეტეს თუ ამაში ჯამაგირსაც უხდიან) და სინამდვილეში ვერც კი წარმოუდგენია როგორი ტოტალიტარული მონობის ქვეშ იმყოფება. და გავიმეორებ, ჩვენმა გაუნათლებელმა ლიბერალებმა, როგორც უკანონო შვილს შეჰფერის, არც კი იციან თავიანთი ნამდვილი წარმომავლობის შესახებ, ხრინწით ებრძვიან ვითომ ფაშიზმსა და კომუნიზმს და სინამდვილეში მათივე მშობლის ნაშიერნი არიან. იუვენალურ იუსტიციას რომ დავუბრუნდეთ, რა თქმა უნდა არის რიგი შემთხვევებისა, როდესაც ბავშვს მართლა სჭირდება ოჯახური ძალადობისაგან დაცვა, მაგრამ ამისათვის ჩვენს სახელმწიფოში ისედაც ყველა საკანონმდებლო ნორმა არსებობს. ჩვენივე კანონებით არ შეიძლება არც ბავშვზე და არც საერთოდ ადამიანზე ძალადობა.

ხოლო, აი იუვენალური იუსტიციის ცალკე კატეგორიად გამოყოფასა და დანერგვას კი სულ სხვა, შორს მიმავალი ბნელი მიზნები აქვს, რომელთა შესახებაც ვშიშობ ჩვენმა დეპუტატებმა ან არაფერი იციან, ან თუ იციან და თავს უვიცად გვაჩვენებენ, მთლად უარესია. ასეთ შემთხვევაში არ ცოდნაც ცოდვაა და ცოდნაცა და თავის მოკატუნებაც. მშობლისთვის ბავშვის წართმევა, არის მისი, როგორც სრულყოფილი პიროვნების დანგრევა და დაჩაგრული ბავშვების ძებნაში, სოცმუშაკების უფლებების ზრდა, ტრაგედიის მომტანია ადამიანებისათვის. მომზადებულ კანონპროექტში არის ისეთი ამაზრზენი აბსტრაქტული ფორმულირებები, როგორებიცაა მაგალითად, ციტატა:

"ბავშვის ფიზიკური და ფსიქოლოგიური საჭიროებების დაუკმაყოფილებლობა... საფრთხისაგან დაუცველობა" და ასე შემდეგ, რომლიც შემთხვევაშიც, ციტატა: "სოციალური მუშაკის მიერ მიღებული გადაწყვეტილების საფუძველზე, ბავშვი შესაძლოა, განცალკევებულ იქნეს მშობლისაგან". თუ კი ვინმეს არ ესმის რა საფრთხეებია აქ დამარხული ბავშვისა და მშობლისათვის, მაშინ გადახედონ რამდენი უბედურება ხდება დასავლეთში იუვენალური იუსტიციის დროშის ქვეშ. უბრალოდ აკრიფონ ეს სიტყვები იუთიუბზე ან ინტერნეტში და გადაავლონ თვალი. დასავლეთ ევროპაში იუვენალური იუსტიცია გადაქცეულია კიდევ ერთ, ტოტალიტარულ იარაღად, რომლის წინააღმდეგაც ასიათასობით გაუბედურებული ადამიანი იბრძვის იმ ქვეყნებში. ჩვენისთანა ტრადიციული ქვეყნისთვის, რომელსაც სულ სხვა პრობლემები აწუხებს და პრიორიტეტები აქვს, ეს გახლავთ ხელოვნურად გაბერილი თემა, რომელიც დასავლური არასამთავრობოების დაკვეთით "ააგდეს" და გააღვივეს მათივე გოშია ზოგიერთმა მედიასაშუალებებმა და ასე ვთქვათ, საარტილერიო მომზადება ჩაატარეს ამ კანონისათვის. სამიოდე წლის წინ ამას "პატრონობდა" გუგული მაღრაძე, მერე ხან ვინ, ხან ვინ, ახლა ეს დიმიტრი ხუნდაძეს დაევალა. მე დიმიტრის ვიცნობ როგორც კარგ კაცს, მაგრამ არა მგონია მას ეყოს გამბედაობა, რომც უნდოდეს, და არ დაემორჩილოს ამას. თუ ვინმეს კიდევ დარჩა ეჭვი იმაში, რომ ამასაც უცხოეთიდან გვაძალებენ, მაშინ გადახედოს ამ კანონპროექტის განხილვაში მონაწილე არასამთავრობოების გრძელ სიას, რომელსაც ზრდილობისათვის თან ერთვის ჩვენი ვითომ სუვერენული სახელმწიფოს უწყებების სია და თავად მიხვდება, ვინაა აქ სინამდვილეში ავტორი და ვინაა მონა- მორჩილი ნოტარიუსი.

ეს სურათი გვაქვს ყველა სხვა შემთხვევაშიც, ანტიდისკრიმინაციულ კანონშიც, უცხოელებზე სასოფლო მიწების გასხვისების კანონშიც, სასკოლო საგნების ე.წ.სამოქალაქო განათლების შემოსევაშიც, ამ იუვენალურ იუსტიციაშიც და ამიტომ ვამბობ, რომ ჩვენ არა გვაქვს დამოუკიდებელი სახელმწიფო. როგორც ნამდვილი სამოქალაქო სექტორი, რომელიც ქვეყნის დაღუპვაში ფულს არ იღებს ,ჩვენ და ჩვენი მეგობრები რასაც შეგვიძლია ვაკეთებთ, მაგრამ თუ ქართველ პოლიტიკოსებში არ გაიღვიძებს სინდისი, მარტო ჩვენ რა შეგვიძლია ამ შემოსევის წინააღმდეგ. რომ მჯეროდეს, რომ პოლიტიკაში წასვლით რამეს შევცვლიდი, ამ მსხვერპლზეც წავიდოდი, მაგრამ მე სამწუხაროდ ასეთი რამის არ მჯერე, როგორც არაერთხელ მითქვამს. ამიტომ ასე ვარ, დავრბივარ მეხანძრესავით საკუტარ სახლში და იატაკს ზევით ამოვარდნილი უამრავი ალის ჩაქრობას ვცდილობ, თუმცა ვიცი, რომ სანამ ქართველები არ მოინდომებენ ჩვენი სახლის ქვეშ დანთებული ჯოჯოხეთური ალის ჩაქრობას, სულ ასე უნდა ვიყოთ. ეს კი შეიძლება მხოლოდ საზოგადოებრივი შეგნების მასიურმა კათარზისმა მოიტანოს, რასაც ვცდილობ ვემსახურო მთელი ჩემი ძალებით.

ნურავის  ოვეჩვენები ფანატიკოსად, მაგრამ ვთვლი, რომ მე უკვე გამარჯვებულ ბრძოლაში ვმონაწილეობ, იმ ბრძოლაში, რომელშიც ჩემი წინაპრები მონაწილეობდნენ.

- თქვენი პოზიცია გასაგებია, მაგრამ... მაგალითად, რამდენიმე დღის წინ დააკავეს ადამიანი, რომელიც 4 წლის ბავშვზე ფიზიკურად ძალადობდა. ასეთ ვითარებაში როგორ უნდა მოიქცეს სახელმწიფო?

- პირველ რიგში, მოდით დავფიქრდეთ, რაღა ამ კანონის მიღების წინა დღეებში გადის ტელევიზიით ასეთი სიუჟეტები? ეს უბრალო დამთხვევააა კიდევ ერთხელ ვიმეორებ, ბავშვის ძალადობისაგან დასაცავად ჩვენ ყველა კანონი ისედაც გვაქვს, აქ სხვა რამე ხდება. რა თქმა უნდა, ბავშვი უნდა დავიცვათ. ხოლო ამ უბედურ ადამიანს უნდა დავეხმაროთ, რომ ადამიანის სახე დაიბრუნოს. მაგრამ დაუშვებელია, რომ სოციალური მუშაკები ციხის ბადრაგებივით შევიდნენ ოჯახებში. თუ ეს ინიციატივა კანონად იქცა, მაგალითად, მშობელზე გაბრაზებულ ბავშვს ის შეუძლია დაასმინოს და მერე მშობელს ბავშვი წაართვან.

ასეთი მაგალითი უამრავია ევროპაში, ოჯახის საქმეებში ჩარევა არ არის სახელმწიფოს საქმე და ეს ტოტალიტარიზმის პირველი უტყუარი ნიშანია - ამას აკეთებდნენ ბოლშევიკები, ფაშისტები და ახლა ლიბერალები აკეთებენ. მაშინ მოდით დავიჯეროთ, რომ ჩვენი ბავშვების აღზრდაზე გარყვნილი არასამთავრობოები და მათი სპონსორები უფრო დარდობენ, ვიდრე მათი მშობლები და დავამკვიდროთ იუვენალური იუსტიცია. ვინ იტყვის, რომ ბავშვებიცა და მშობლებიც ძალადობისგან არ უნდა დავიცვათ, მაგრამ ოჯახებში პოლიციის შეჭრა დამღუპველია. თუ მართლაც სურთ ძალადობის აღკვეთა, მაშინ აკრძალონ ონალინკაზინოები, აზარტული თამაშები, გარყვნილებისა და ძალადობის გაუთავებელი პროპაგანდა ტელევიზიაში. დაეხმარონ ოჯახებს, რომ უფრო ადამაანურად იცხოვრონ და მივიღებთ შედეგს, რომელსაც ვერც ერთი სოციალური მუშაკი ვერ მოგვცემს. სხვათა შორის, დამტკიცებულია, რომ არც თუ იშვიათად, საზღვარგარეთ სოციალური მუშაკებად მუშაობას იწყებენ სადისტური ან პედოფილური მიდრეკილებების მქონე ადამიანები, რომლებიც სიამოვნებას იღებენ ოჯახებში შეჭრით და მშობლებისთვის ბავშვების წართმევით. აბა, როგორ შეიძლება ნორმალური ფსიქიკის მქონე ადამიანს სიამოვნებდეს ოჯახებში შეჭრა. მოდით, ნუ ვიქნებით ცხვრები და გავიზაროთ, ვინ გვახვევს თავზე ამ ინიციატივებს.

-  მოდით, სხვა საკითხებზეც ვისაუბროთ. გასულ კვირას, თქვენს გამონათქვამს, ღმერთმა დაგვიფაროს, ჩვენმა შვილებმა ოფიციანტებად იმუშაონო , აჟიოტაჟი მოჰყვა. ზოგიერთმა ამ პროფესიის წარმომადგენელი მოქალაქეების შეურაცხყოფაშიც დაგადანაშაულათ...

- ლიბერალური სიცრუისა და შხამის შედეგად ჩვენი საზოგადოება დაავადებულია ურთიერთსიძულვილით და მე ჩემ მოვალეობად მიმაჩნია, ჩემ თავზე ჩავიქრო ამ ცილისწამებისა და გესლის ნაწილი მაინც. ამიტომ ვცდილობ არასოდეს ვუპასუხო პირად შეურაცხყობებს და შეძლებისდაგვარად არავინ ვახსენო პირადად. მაგრამ მე სრულიად შეუვალი ვხდები როდესაც საქართველოს შეურაცხყოფენ და არც ადამიანების ხსენებას ვერიდები, როდესაც ისინი პოლიტიკური რეჟიმის ან პარტიის სინონიმები ხდებიან, რომელიც ჩემ ქვეყანას ებრძვის. ასე ვიზამ აქაც. ეგ ფრაზა მე ასე არ მითქვამს და არ მიმაჩნია თავი ვალდებულად, განვმარტო რაც ვთქვი. თავს არ დავიმცირებ, ვისაც არ უნდა გაიგოს რა ვთქვი, ის ვერასოდეს გაიგებს. ყველაზე ირონიული აქ ისაა, რომ მე 19 წლის ასაკში საფრანგეთში ყოფნისას ქარხანაში მტვირთავად ვმუშაობდი, ჩემს აწ განსვენებულ მორაგბე მეგობარ, ბადრი მექვაბიშვილთან ერთად და სწორედ ამის გამო თბილისელი ლიბერალები დამცინოდნენ- შეგვარცხვინაო. დარწმუნებული ვარ, ის ხალხი, ვინც ახლა დამცინის, თავიანთ შვილებს არასოდეს ოფიციანტად არ ამუშავებენ (ვიცი, იმიტომ, რომ მოუმართავთ დახმარებისათვის შვილი მომიწყვეო და უთაკილიათ წინადადება) და ამჯობინებენ გრანტებისთვის იმათხოვრონ და ამ გრანტების მისაღებად საქართველოს ყველა სიწმინდეს უღალატონ და გაყიდონ. უბრალოდ, ძალიან მტკივა გული, რომ ის ადამიანები, რომლებსაც ჩემთვის არაერთხელ მოუმართავთ დახმარებისთვის და სუფთა გულით, უანგაროდ დავხმარებივარ, ასე იქცევიან, ღმერთმა შეუნდოთ...

- თქვენს კიდევ ერთ ფრაზას მოჰყვა აჟიოტაჟი- ჩემმა ძმაკაცმა, გიორგი მარგველაშვილმა თავი დაიღუპა, პოლიტიკაში რომ წავიდაო...

- გიორგი მარგველაშვილი ჩემი ბავშვობის უახლოესი მეგობარი და ჩემი შვილის ნათლია, ტრადიციის მიხედვით კი, ნათელმირონი უფრო დიდი ნათესავია, ვიდრე სისხლი და ხორცი. მე რაც ვთქვი გიორგიზე, მისდამი სიყვარულით ვთქვი, როგორც ძმა იტყვის ძმაზე. როგორც არ უნდა ვიკამათოთ მე და გიორგი მარგველაშვილმა სხვადასხვა საკითხებზე, გნებავთ ძირეულ იდეოლოგიაზე, ნურავინ ელოდება აქ სეირს ჩემგან მის ღალატს ან დაპირისპირებას. რაში ვერ გაუგეს ერთმანეთს გიორგიმ და ბიძინამ, საერთოდ არ მაინტერესებს. გიორგის თითოეული გამარჯვება ჩემი გამარჯვებაა, მარცხი კი - ჩემი მარცხი.

- როგორ შეაფასებდით "მაესტროში" მიმდინარე მოვლენებს? თქვენი აზრით, ეს მეწილეების დავაა თუ პოლიტიკურად მოტივირებული პროცესი?

- ჩემი დაკვირვებით, ეს არის დავა აქციონირებს შორის, თან გია და ლევან გაჩეჩილაძეები მაკა ასათიანისა და კოტე გოგელიას ნათესავები არიან. მე ყველას ძალიან კარგად ვიცნობ და ვწუხვარ, რომ ასეთი გაუგებრობა აქვთ. შესაძლოა, ირაკლი რუხაძის უკან მართლაც იდგეს რაიმე პოლიტიკური ინტერესი, რადგან არჩევნებია, მაგრამ ეს თემა არ მაინტერესებს. ის კი ნამდვილად ვიცი, რომ ამ ბოლო წლებში "მაესტროს" დაფინანსებამ და აღჭურვამ კოტე გოგელიას ზურგზე გადაიარა და იმედია, მისი კანონიერი უფლებები არ გაითელება. სამართლიანი გარემო ძალიან მნიშვნელოვანია ქვეყნის განვითარებისათვის, თუ ვერ აღადგენენ სამართლიანობას, იმიტომ რომ უცხოელები უკრძალავენ, აღარ დაარღვიონ მაინც, ამას ვისურვებდი ჩემი ქვეყნისათვის. რაც შეეხება პარალელებს "მაესტროსა" და "რუსთავი 2"- ს შორის, გეტყვით, რომ ამ ტელეკომპანიის ხელმძღვანელ ნიკა გვარამიას არათუ არ აქვს მორალური ისაუბროს თავისუფალ მედიაზე, არამედ ჩემი ღრმა რწმენით, კანონის წინაშე პასუხი უნდა აგოს იმისთვის, რაც გააკეთა სააკაშვილის დესპოტური რეჟიმის პერიოდში. ძალადობისა და ცინიზმის ერთ - ერთი დირიჟორი და ავტორი სწორედ ის იყო. სასაცილოც აღარ არის ასეთი ადამიანებისგან ხმის ამოღება და ვაი, ამ ჩვენს სახელმწიფოს, რომ ასეთ ვინმეს ვალაპარაკებთ სამართლიანობაზე.

- პრემიერის თანამდებობაზე გიორგი კვირიკაშვილის პირველ ნაბიჯებს როგორ შეაფასებდით?

-  მე ირაკლიც მომწონდა და კარგ კაცად მიმაჩნია და მეწყინა მისი გადადგომა და გიორგისაც ვიცნობ და ძალიან ვაფასებ და კარგ კაცად მიმაჩნია. პოლიტიკოსების ქება უმადური საქმეა. პოლიტიკოსმა რაც არ უნდა აკეთოს, ნახევარი მოსახლეობა მაინც თავიდანვე აგინებს და კარიერის ბოლოს - უმრავლესობა. ამიტომაა რომ ყველა კარგი ადამიანი მეცოდება ვინც ამ ურთულეს სარბიელზე გამოდის და მიმაჩნია, რომ მაგ სპორტში ორპირი თაღლითები უფრო ხარობენ. იმედია, გიორგი შეინარჩუნებს თავის სინდის - ნამუსს, როგორც აქამდე აკეთებდა და ქვეყანას ღირსეულად ემსახურება და არ იქნება "ვითარცა ლერწამი ქარში."

-  თქვენი აზრით, რომელია ხელისუფლების ყველაზე სუსტი რგოლი? ბოლო პერიოდში საზოგადოებას ბევრი კითხვები აქვს მერიასთან დაკავშირებით, თუნდაც პრემიებისა და ტენდერების საკითხებზე. რამდენიმე დღის წინ გავრცელდა ინფორმაცია, რომ მერიამ სოციალურად დაუცველთათვის განკუთვნილი ფულით ერთ- ერთი პროკურორის ქალიშვილის პარიზში ცხოვრება დააფინანსა.

-  მეჩვენება, რომ დათო ნარმანია თავადაც ძალიან გაწვალდა მერის თანამდებობაზე. ეუბნებოდა მთელი თბილისი "ქართულ ოცნებას" არ ქნათ ეგ საქმე, ვერ ივარგებსო, მაგრამ მაინც თავისი გაიტანეს, რადგან მიშას გადაგარჩინეთ, ახლა დაგვიჯერეთო. ჯერ იყო და მოქალაქეებს აუკრძალეს პირდაპირი კენჭის ყრა და მარტო პარტიებს დაუტოვეს მერის კანდიდატების წამოყენების უფლება, რითაც სააკაშვილის რეჟიმს დაემგვანენ არადემოკრატიულობით და მიიღეს ის, რაც ლოგიკურია - საკუთარი სიჯიუტის ნაყოფი. და თუმცა ეგ არაფერი ტრაგედიაა იმ ჭირთან შედარებით, რაც მოგვაშორეს, მაგრამ ახლა დროა წინ წაიწიონ ამ საკითხშიც. ჩემი საქმე არაა პოლიტიკური შეფასებები, მაგრამ მართვა ჩემი ხელობაა და მიმაჩნია, რომ დათოს როგორც ახალგაზრდა კაცს ჯერ კიდევ შეუძლია თავი მონახოს სხვაგან და წარმატებულიც იყოს, მაგრამ, ნურავის ნუ ეწყინება, ჩემი აზრით თბილისს ახალი მერი სჭირდება, რომელიც უფრო შესატყვისი იქნება ქალაქის წინაშე მდგომი კულტურული და სოციალური გამოწვევებისა.

- მმართველ კოალიციაში მიმდინარე მოვლენებზეც მინდა გკითხოთ. "რესპუბლიკელები" და "მრეწველები" ერთმანეთს მწვავედ დაუპირისპირდნენ, გარკვეული უთანხმოებებია კოალიციის სხვა წევრებს შორისაც. სხვათა შორის, დავით ბერძენიშვილმა გოგი თოფაძესთან ერთად, თქვენც დაგადანაშაულათ დასავლეთის მიმართ ნიჰილისტური განწყობების გაღვივებაში.

- სამწუხაროდ, დასავლეთი თავად აღვივებს თავისდამი ნიჰილიზმს. ამას, როგორც დასავლეთის კარგი მხარეების დიდი აპოლოგეტი მოგახსენებთ. აქ მომიწევს დავარღვიო ჩემივე ტაბუ სახელების არ თქმისა, ვინაიდან თქვენს მიერ დასახელებული ზოგიერთი პარტიაცა და პიროვნებაც საქართველოს ტრადიციებსა და ხერხემალს ერჩიან. და მერწმუნეთ, ამას უსიხარულოდ ვაკეთებ და არა იმიტომ, რომ მედარდება ჩემზე მათგან ვინ რა თქვა, მაგრამ, როდესაც საქართველოს მოღალატეები მის ვნებასა და ნგრევას აგრძელებენ, ჩვენ სხვა არჩევანი არ გვრჩება გარდა იმისა, რომ ყველაფერს თავის სახელი დავარქვათ, თუნდაც ამის შედეგად მორიგი ცილისწამებისა და სიბინძურის ტალღა მივიღოთ.

მინდა მჯეროდეს, რომ სააკაშვილის სისხლიანი რეჟიმის შეცვლისას, ამერიკელებმა დააძალეს ბიძინა ივანიშვილს "რესპუბლიკელების" კოალიციაში შეყვანა და ეს მისი იდეა არ იყო. ალბათ, ეს იყო ულტიმატუმი - თუ არ იქნებოდნენ კოალიციაში "რესპუბლიკელები", ივანიშვილს საპარლამენტო არჩევნებზე გამარჯვების შანსი არ ექნებოდა. ამრიგად, მიმაჩნია, რომ "რესპუბლიკელები" ტროას ცხენივით შემოყვნენ ივანიშვილს პოლიტიკაში და უცხოელი პატრონების დაკვეთით მოექცენ ხელისუფლების სათავეში. 9 აპრილის შემდეგ, როდესაც ცოცხალ-მკვდარი კრწანისში თვალის კლინიკაში ვიწექი, ქართველმა ნამუსიანმა კომუნისტებმა პარტბილეთები გადაყარეს, კომპარტიამ კი მაშინ დაიწყო დაცლილი კვოტების შევსება და თავის რიგებში ის ხალხი მიიღო ვისაც ძალიან უნდოდა, მაგრამ ვერ ხვდებოდა პარტიაში. დავით უსუფაშვილმა სწორედ მაშინ აიღო პარტბილეთი, მის მეუღლეს, ქალბატონ თინა ხიდაშელს კი ნათქვამი აქვს მე სულ არ მედარდება საქართველო დაიბრუნებს თუ არა აფხაზეთსო და დღეს ის ჩვენს მეომრებს ხელმძღვანელობს, რაც მათი შეურაცხყოფაა...

ლევან ბერძენიშვილის მიერ კა-გე-ბე-სთვის მიერ მიცემული აღიარებითი ჩვენებები კი ყველას წაკითხული გვაქვს. ახლა დავით უსუფაშვილი, თინათინ ხიდაშელი და ძმები ბერძენიშვილები მასწავლიან საქართველოს დამოუკიდებულეობისთვის ბრძოლას და ვაჟკაცობას?! ხვალ ჩინურმა კონფუციონიზმმა თუ რუსულმა აღორძინებულმა იმპერიალიზმმა საქართველოდან ამერიკელები და ევროპელები რომ გააძევონ, "რესპუბლიკელებს" ვერავინ დაასწრებს მათ სამსახურში ჩადგომას. "რესპუბლიკელებს" არანაირი პრიციპები არ აქვთ და შეიძლება, ხალხს, რომლებიც ნდობით არ სარგებლობენ საზოგადოებაში, ასეთი მაღალი თანამდებობები ეკავოთ?! ესაა ლიბერალური დემოკრატია? დიახაც, რომ სამწუხაროდ, ესაა! ეს იგივე ლიბერალური - დემოკრატიაა, რომელმაც ხალხის გამაუპატიურებელი სააკაშვილი ხელშეუხებელი გახადა. ასე რომ, "რესპუბლიკები" "ნაციონალების" იდეოლოგიური ძმები არიან. ვიმეორებ - არ მინდა არც რუსეთის და არც დასავლეთის მონობა, მინდა ჩემი ქვეყნის დამოუკიდებლობა და სანამ პირში სული მიდგას, ამისთვის ვიბრძოლებ.

- როგორ ფიქრობთ, კოალიცია შეინარჩუნებს ერთიანობას? თქვენი აზრით, როგორი ძალთა ბალანსი იქნება მომავალ პარლამენტში?

- არ ვიცი. თუმცა, ჩემი აზრით, "ნაციონალური მოძრაობის" ადგილი პარლამენტში არ არის და მისი ლიდერები ციხეში უნდა იჯდნენ იმ დანაშაულებისთვის, რაც ქვეყნის წინაშე ჩაიდინეს. რაც შეეხება კოალიციას - ჩემთვის ყველა პარტია ერთია. უბრალოდ, ყველას მინდა შევახსენო, რომ ხელისუფლება ჩვენს პურს სჭამს და როდესაც ცუდად მოიქცევა, არ უნდა შეგვეშინდეს არაფრის და ხმა უნდა ამოვიღოთ. უნდა ვაიძულოთ, რომ ემსახურონ ქვეყანა და არ დაამონონ ის არც ერთ იმპერიას, აღმოსავლურს თუ დასავლურს.

- კრაინაში სამთავრობო კრიზისია და ექსპერტების შეფასებით, მოქმედი პრემიერის გადაყენება მხოლოდ დროის საკითხია. ამ პოსტზე კი ერთ- ერთი რეალური კანდიდატი მიხეილ სააკაშვილია.

-  თუ ევროპელები და ამერიკელები ერთი მხრივ, ჩვენს სუვერენიტეტს აღიარებენ და მეორე მხრივ, კრიმინალ და ძებნილ სააკაშვილს დააწინაურებენ, ეს იქნება ბოლო ლურსმანი მითში ლიბერალური დემოკრატიის შესახებ. უკრაინას მხოლოდ შემიძლია მივსამძიმრო, არათუ ოდესიის გუბერნატორობა, არამედ ის, რომ უს იქ ფიზიკურადაა. ღმერთმა დაიფაროს ჩვენი მოძმე ხალხი ისეთი უბედურებისგან, როგორიც სააკაშვილის პრემიერობაა.