"ეს პატიმრობა იყო ოლიგარქის პირადი შურისძიება" - როგორ ეხმაურება სააკაშვილი უგულავას გათავისუფლებას - კვირის პალიტრა

"ეს პატიმრობა იყო ოლიგარქის პირადი შურისძიება" - როგორ ეხმაურება სააკაშვილი უგულავას გათავისუფლებას

თბილისის ყოფილი მერის, გიგი უგულავას პატიმრობიდან გათავისუფლების გადაწყვეტილებას სოციალურ ქსელში, ოდესის ოლქის ყოფილი გუბერნატორი, მიხეილ სააკაშვილი გამოეხმაურა.

"მივესალმები გიგი უგულავას გათავისუფლებას უსამართლო პატიმრობიდან. მიხარია, რომ ის შობის დღესასწაულს აღნიშნავს თავის შვილებთან და მეგობრებთან ერთად. გიგის არც დანაშაული ჩაუდენია და არც არასწორი ქმედებები განუხორციელებია (მიუხედავად იმისა, თუ რა განაცხადა მან ბოლო სასამართლო პროცესზე) იმ საკითხთან მიმართებით, რასაც ივანიშვილის ჯიბის პროკურორები უყენებდნენ მთელი ამ დროის განმავლობაში. ამგვარად, ეს პატიმრობა სხვა არაფერი იყო, თუ არა ოლიგარქის პირადი შურისძიება და დაშინების კამპანიის ნაწილი.

ამავე დროს, მგონი აღარავის ეპარება ეჭვი, რომ ასეთ გადაწყვეტილებებს აღარ იღებენ პროკურორები, ადვოკატები და სასამართლოები და რომ საქმე გვაქვს არა სამართლებრივ, არამედ ივანიშვილის პირად გადაწყვეტილებებთან, როგორც დაპატიმრებაზე, ისე გათავისუფლებაზე. ამიტომ ჩვენ უნდა მოვთხოვოთ მას სხვა პოლიტპატიმრების დაუყოვნებლივ გათავისუფლება და ჩემთვის საქართველოში დაუბრკოლებლად ჩამოსვლის საშუალების მოცემა ჩვენს ხალხთან შესახვედრად და 20 იანვარს ერთიანი ნაციონალური მოძრაობის ყრილობაში მონაწილეობის მისაღებად", - დაწერა "ფეისბუკში" მიხეილ სააკაშვილმა. (წყარო)

იხილეთ ასევე: სააპელაციო სასამართლომ გიგი უგულავას სასჯელი შეუმცირა - როდის დატოვებს საპატიმროს თბილისის ექს-მერი?!