"რომ მითხარი მოვალო, ცავატანე, რატომ დაიგვიანე"... ანუ დაგითმობთ გია სურამელაშვილს თავის სიმღერებიანად - კვირის პალიტრა

"რომ მითხარი მოვალო, ცავატანე, რატომ დაიგვიანე"... ანუ დაგითმობთ გია სურამელაშვილს თავის სიმღერებიანად

ორი სომეხი ძმაკაცი მყავს და დედას ვფიცავარ, ქართველი და აზერბაიჯანელი ძმაკაცებისგან არ ვასხვავებ. ორივე ძალიან მიყვარს, მეც ძალიან ვუყვარვარ მათ; რომ დათვრებიან, სულ ასე მეძახიან - შენ ისეთი მაგარი კაცი ხარ, სომეხი იქნები აუცილებლადო! მეც ვუბრუნებ ხურდას და ვპასუხობ, - კარგი, ვიქნები სომეხი, მაგრამ თქვენც ისეთი კარგი ბიჭები ხართ, უეჭველი ქართული ფესვები გექნებათ-მეთქი. ისინიც იშნოებენ ქართველობას და სამივენი მაგრად ვხალისობთ. ქეიფის ბოლოს ყველანი ვუბრუნდებით ჩვენ-ჩვენს ეროვნებას, შესაბამისად, რესტორანში ფულს მე ვიხდი და ასე ვიშლებით.

ჩვენ სამივენი საქართველოს მოქალაქეები ვართ, უბნელები ვართ, ძმები ვართ და, მაპატიეთ რუსული კალკისთვის, "შუტკა" გვაქვს ერთმანეთთან გახსნილი, მაგრამ ერთია, მე, არმენა და ჰაჩიკა რას ვხუმრობთ, და მეორეა, როცა ასეთი (კიდევ მაპატიეთ რუსული კალკისთვის) "შუტკა" უკვე სახელმწიფო დონეზე რომ აქვს გახსნილი მეზობელ სომხეთს.

მოკლედ, ძვირფასო მკითხველო, მინდა გითხრათ, თუ რაზეა ჩემი დღევანდელი პროვოკაცია. რადმენიმე დღის წინ, ყოველგვარი "შუტკის" გახსნის გარეშე, ადგა ვიღაც სომეხი მომღერალი და "ყვავილების ქვეყანა" იმღერა; მერე ადგნენ კიდევ სხვები და, - ეს სიმღერა სომხურიაო, - განაცხადეს. "მაშ, მტყუანის!.." არ გვქონდა დამთავრებული, რომ რომელიღაც სომხურმა ანსამბლმა "დაისი" შეასრულა და, - ესეც სომხურიაო, - განაცხადეს (ისე, შე მამაცხონებულო, თუ იბრალებ, კარგად მაინც იცეკვე).

გაგიკვირდებათ და, ეს ყველაფერი გამიხარდა, იმიტომ, რომ ადრე საერთოდ, ქართველ მეფეებზე, ქალაქებზე, "ვეფხისტყაოსანზე" გაიძახოდნენ, ჩვენიაო, და ახლა ოდნავ დაუწევიათ თამასა. ასე თუ გაგრძელდა, დავლენ ესენი სატელევიზიო გადაცემებამდე და ასე იტყვიან - "პროფილი" სუფთა სომხური პროექტია, "სამოთხის ვაშლების" იდეა ერევნიდან მოდის და გია ჯაჯანიძის ჩაცმულობაზე ზრუნავს გიუმრის მოდების სახლიო.

დავუბრუნდეთ სიმღერას. ბევრი ვიფიქრე, თუ რა არგუმენტი გვაქვს იმის დასამტკიცებლად, რომ "ყვავილების ქვეყანა" ქართულია და, როგორც იქნა, მივაგენი. გავიხსენოთ ტექსტი სიმღერიდან: "რომ მითხარი, მოვალო, რატომ დაიგვიანე?" გაფიცებით ყველაფერს, ქართველის გარდა სხვა ვინ იგვიანებს? ხომ იცით, მხოლოდ საქრთველოში რომ არის ასეთი გამოთქმები: "7-ზეა ქორწილი, მაგრამ სიძე 9-ზე მოვა ალბათ", "3-ზეა დაკრძალვა, მაგრამ 4-მდე არ გამოასვენებენ", "9-ზე იწყება სამსახური, მაგრამ 10-მდე უფროსი არ მოდის და მე რა მინდა?!." - და ასე შემდეგ. თუ ამ მყარი არგუმენტის შემდეგ კიდევ ვინმეს ეჭვი ეპარება ამ სიმღერის ქართულობაში, მაშინ ავდგეთ და ყვავილებში შევეჯიბროთ, ვის უფრო მეტი აქვს. სხვა გზა მე არ ვიცი.

რაც შეეხება "დაისს", მინდა მივმართო იმ სომეხს, ვინც ვიდეო ატვირთა და დააწერა - "სომხური ტრადიციული ცეკვა": შე მამაცხონებულო, ცოტა შორიდან მაინც შემოგევლო; ეგ არცთუ ისე დიდი ხნის წინ, ფილმ "ქეთო და კოტეშია" გამოყენებული; ჰოდა, ჯერ გეთქვა - ქეთო ჩვენიაო, მერე - კოტეო, მერე - ორივე ერთადო, და აი, მანდ სადმე შემოგეპარებინათ, "დაისი" სომხური ცეკვაოო. ასე აჯობებდა, დამიჯერეთ.

მოკლედ, იმდენი აჟიოტაჟი ატყდა ამ ამბებზე, არც ის მინდა, სიმართლე არ იცოდეს ხალხმა, და არც ის, ჩვენი სომეხი ძმები გავანაწყენო, ამიტომ გამოსავალს მივაგენი და გეტყვით, რაზე შეგიძლიათ თქვათ, რომ სომხურია. დავიწყოთ: თუ სიმღერები გინდათ, დაგითმობთ გია სურამელაშვილს თავის სიმღერებიანად; თუ სპორტი გინდათ, ჩვენს საფეხბურთო ნაკრებს - მთლიანად; თუ პოლიტიკოსები გინდათ, ყველა დეპუტატს და "ბონუსად" - ნოდარ ხადურს; თუ ლექსები გინდათ, ლანჩხუთის გამგებლის ყველა ლექსზე შეგიძლათ თქვათ, ჩვენიაო, და ასე შემდეგ. ნელ-ნელა მოგაწვდით ახალ იდეებსაც. ამ შემოთავაზებით ჩვენც კმაყოფილი დავრჩებოთ და თქვენც.

პ.ს. სტატიის წერის დროს, გავრცელდა ინფორმაცია, რომ სომეხ მომღერალს და კომპოზიტორს აღნიშნულ ფაქტთან დაკავშირებით განცხადება გამოუქვეყნებიათ, -  უნებლიედ მოგვივიდა და ბოდიშიო.

პ.პ.ს. არაფრის... მაგრამ სურამელაშვილზე იფიქრეთ მაინც...