"ყველაზე ლამაზი, ყველაზე ნიჭიერი და ჭკვიანი სალომე" - ტრაგედია, რომელმაც 12 წლის გოგონა იმსხვერპლა
"ყველაზე ლამაზი, ყველაზე ნიჭიერი და ჭკვიანი სალომე" - ტრაგედია, რომელმაც 12 წლის გოგონა იმსხვერპლა
"ნასვამ მოსრიალეთა 99-% ქართველია..."

გუდაურში, პირველ სასრიალო სპორტულ ტრასაზე მომხდარ უბედურ შემთხვევას მეექვსე საავტორო სკოლის მოსწავლე სალომე ტატიშვილი ემსხვერპლა... სასრიალო ტრასაზე მას 19 წლის ბიჭი დაეჯახა, რის შედეგადაც გოგონა ადგილზე გარდაიცვალა, ბიჭი კი, ამ დრომდე საავადმყოფოში რჩება.
სალომე ტატიშვილი ცნობილი ექიმის დავით ტატიშვილის ძმის შვილია. ის მე-6 საავტორო სკოლის მე-7 კლასის მოსწავლე იყო და სკოლის ხელმძღვანელობის თქმით, განსაკუთრებული ნიჭით გამოირჩეოდა.

"მოულოდნელი ტრაგიკული შემთხვევის შედეგად დაიღუპა სალომე ტატიშვილი, ჩვენი
You must have Flash Player installed in order to see this player.
სკოლის VII კლასის ყველაზე გამორჩეული, ყველაზე ლამაზი, ყველაზე ნიჭიერი და ჭკვიანი სალომე. მთელი სკოლისთვის ეს განუზომელი ტკივილია, რომელსაც სიტყვები ვერ გამოხატავს",- აღნიშნულია მეექვსე საავტორო სკოლის ოფიციალურ გვერდზე განთავსებულ წერილში...

თვითმხილველის თქმით, გოგონას მამაც თან ახლდა და ეს ტრაგედია მის თვალწინ მოხდა.

თამარი, 23 წლის:
-ზემოდან დაშვებული მოსრიალე დიდი სიჩქარით დაეჯახადა, გოგონა მოცელილივით დაეცა ძირს... ყველაფერი იმდენად წამებში მოხდა, გონზე მოსვლაც ვერ მოვასწარით. შემდეგ ჩოჩქოლი ატყდა და მამაკაცის განწირული ხმა მოჰყვა, - შველას ითხოვდა... ბავშვი მახლდა და არ მინდოდა შეშინებოდა. მივხვდი, რაღაც კარგი არ მოხდა. შემდეგ, როდესაც ქვემოთ ჩამოვედით, სასწრაფო დახმარებისა და პატრულის მანქანები იდგნენ.. შემდეგ გავიგეთ, რომ საცოდავი გოგონა გარდაცვლილი იყო, ხოლო ბიჭი, საავადმყოფოში გადაუყვანიათ... ის, რომ გუდაურის და ზოგადად, მთის კურორტებიის სასრიალო ტრასებზე ვითარება მძიმეა, რბილად რომ ვთქვა, სრული განუკითხაობაა... სადაო არც
არის, -აქ ნახავთ, ტყავის ქურთუკიან და ჯინსის შარვლებში გამოწყობილ, ნასვამ მოსრიალეებს. უმეტესობა მეგობრებთან ერთად ამოდის, მაგრამ ბევრი ოჯახით არის ამოსული. იქნებ ამ ტრაგიკული შემთხვევის შემდეგ მაინც მიიღოს გუდაურის ადმინისტრაციამ რაიმე ზომები, თუკი ეს შესაძლებელია, - დაყონ სასრიალო ტრასები, სადაც მოყვარულების, სპორტსმენების და დამწყები მოსრიალეებისთვის ადგილი ცალ-ცალკე იქნება...

რა გახდა უბედური შემთხვევის მიზეზი და იგეგმება თუ არა რამე წესების შემუშავება, რომელსაც ტურისტები ზამთრის კურორტებზე ყოფნისას უნდა დაემორჩილონ, რათა ტრაგიკული შედეგები თავიდან ავიცილოთ, -ეს საკითხები ბოლო დროს მართლაც აქტუალურია, -თუ რა ცვლილელებს და როდიდან უნდა ველოდოთ რაიმე ტიპის აკრძალვებს, ამის შესახებ მთის კურორტების განვითარების კომპანიის ხელმძღვანელი სანდრო ონოფრიშვილი გვესაუბრება.

- შემთხვევის ადგილზე დაახლოებით 15 წუთში მივედი, ძალიან მძიმეა იმ ყველაფრის გახსენება, რაც იქ ვნახე... ბიჭი ქვემოთ ამბულატორიაში ჩამოიყვანეს, ჩაუტარდა პირველადი დახმარება, რადგან თვითონაც გათიშული იყო, შემდეგ უკვე რეფერალური დახმარების მანქანამ თბილისში გადაიყვანა... ნასვამ მოსრიალეთა 99-% ქართველია.

-კონკრეტულად ამ შემთხვევაზე გკითხავთ, -გავრცელდა ინფორმაცია, რომ ბიჭი, რომელიც მოზარდს დაეჯახა, ნასვამი იყო...
- ჩემს ხელთ არსებული ინფორმაციით, ვიზუალურად ეს ადამიანი არ ტოვებდა ნასვამის შთაბეჭდილებას, თუმცა მისი მონაცემები ექსპერტიზას გადაეცა და მალე გაირკვევა ალკოჰოლის ზემოქმედების ქვეშ იყო თუ არა...

- ბატონო სანდრო თუ ხდება კონტროლი, მაგალითად, ვინ სად უნდა ისრიალოს, რა ტიპის სასრიალო ტრასაზე?

- საერთოდ, მსოფლიოს კურორტებზე ტრასები ასეა დაყოფილი, -დამწყები, საშუალო, ექსპერტი მოთხილამურეებისთვის. ჩვენს მონიტორებზე ყველგან გაკრულია, თუ რომელი ტრასა რა სირთულის არის და ეს ვიზუალურადაც კარგად ჩანს, რათა სწორად აარჩიოს სასრიალო ტრასა. ანუ ყველა ტრასას აქვს თავისი ფერი, ეს არის სირთულის მაჩვენებელი და ადამიანმა თავად უნდა გადაწყვიტოს, საკუთარ შესაძლებლობებიდან გამომდინარე, სად უნდა ისრიალოს... შუა კვირაში, როდესაც კურორტზე უფრო მეტად უცხოელები არიან, რისკი ნაკლებია, რასაც ვერ ვიტყვით შაბათ-კვირაზე, რა დროსაც თბილისსა და საქართველოს დანარჩენი ქალაქებიდანაც ამოდიან. უცხოელებისგან განსხვავებით, ისინი ადეკვატურად ვერ აღიქვამენ სირთულეებს. არც ერთ საკურორტო ზონაში არ ხდება, მოსრიალეს სრიალი აუკრძალო, თუ რომელი სირთულის ტრასაზე უნდა გავიდეს, ეს მისი გადასაწყვეტია... რაც შეეხება, შემოწმებას, ერთ საათში საბაგიროს 4 ათასიანი გამტარიონობა აქვს და უბრალოდ შეუძლებელია შეამოწმო, თუ რა დონეზე სრიალებს ის, ანუ მათი შემოწმება ფიზიკურად შეუძლებელია.

- ნასვამობაზეც?
-ნასვამობა, მთის კურორტებზე ყველაზე დიდი პრობლემაა. ჩვენი კომპანიის მაშველებს, უფლება აქვთ თხოვნით მიმართონ ან ურჩიონ ნუ ისრიალებენ ნასვამი, მაგრამ დაუჯერებენ თუ არა მათი ნებაა, ჩვენ კი, უფლება არ გვაქვს გავაჩეროთ ან შევუზღუდოთ მათ გადაადგილების უფლება. ძალიან იშვიათად ყოფილა შემთხვევა, დაეჯერებინათ. უფრო მკაცრი ზომების მიღების უფლება ჩვენ არ გვაქვს.

- პატრულის გამოძახების უფლებაც არ გაქვთ?
-პატრულს იქ ასვლამდე 40 წუთი მაინც დასჭირდება და არ მგონია მასობრივად ნასვამი ადამიანების შეჩერება შევძლოთ. რა უფლებით უნდა გავაჩეროთ?!.

- საფრთხეს უქმნიან, როგორც საკუთარ, ისე სხვის სიცოცხლეს...
- დიახ, ზუსტად ამიტომაც ეკონომიკის სამინისტროს მიერ ინიცირებულია კანონპროექტი, რომელიც ამ საკითხს დაარეგულირებს. რამდენადაც ვიცი, უკვე გავლილი აქვს ყველა საიჭრო პროცედურა და უახლოეს მომავალში გადაეგზავნება პარლამენტს კანონში ცვლილებების შესახებ დასამტკიცებლად. ეს რისკს შეამცირებს, მაგრამ ბოლომდე ვერ აღმოფხვრის, რადგან პირდაპირ აკრძალვა არც ერთ სამთო და სათხილამურო კურორტზე არ ხდება, მაგრამ სახელმწიფო შეეცდება მინუმამდე დაიყვანოს ასეთი ფატალური შემთხვევები. რაც მთავარია, შსს-მ უკვე დაიწყო მუშაობა, როგორც ვიცი, ამზადებენ სპეციალურ ბრძანებულებას, რომლის მიხედვითაც შსს ძალიან მალე ჩამოაყალიბებს საგანგებო პატრულს, რომელიც მართლაც ძალიან სჭირდება ჩვენს კურორტებს.

ლალი პაპასკირი (სპეციალურად საიტისთვის)

მკითხველის კომენტარი (3)
kote
17 იანვარი 2016 15:17
უნდა შევიგნოთ ყველამ, რომ დათრობის შემდეგ არ შეიძლება საჭესთან ჯდომა, თხილამურებით სრიალი და ნებისმიერი ისეთი ქმედება რაც სიფრთხილეს და განსაკუთრებულ ყურადღებას მოითხოვს.როდემდე შეიძლება ველურებივით ვიქცეოდეთ და არაფერს ვუწევდეთ ანგარიშს.
quTaiseli
14 იანვარი 2016 10:52
ნათელში ამყოფოს ამ გოგოს ლამაზი სული მაგრამ ქართველების ლანძღვა აქ როგორ შეიძლება განა ტრასაზე რომ თურქები მანქანას გიჟივით მიაქროლებენ და უმოწყალოდ კლავენ ხალხს ესეც ქართული ჯიშის და უდისციპლინობის ბრალია. ეს სიტუაცია უბრალოდ უბედური შემთხვევა და ტრაგედიაა როგორებიც ბლომად ხდება მთელ მსოფლიოში.აგერ ქუთაისში სტუმრად იყო ხალხი ჩამოსული და გარეთ მანქანას უცდიდნენ ამ დროს ბინის გარეთა ნალესი კედელი ჩამოიშალა და ანგელოზივით ბავშვი იმსხვერპლა და რა ვინაც 4 წლის უკან კედელი გალესა სიტყვაზე იმას უნდოდა ეს ტრაგედია მომხდარიყო თუ იმ 19 წლის ბიჭს უნდოდა იმ ბავშვის მოკვლა. არავისაქ უფლება ლანძღოს მთელი ერი რა მოტივიც არუნდა ამოძრავებდეს.
უძლევი
13 იანვარი 2016 10:48
ბავშვს ცოცხალს წაიყვან კურორტზე და მკვდარს ჩამოიყვან. ჩვენი ველური და მტაცებლური ქართული კულტურის მადლიერი უნდა ვიყოთ. თხა თხაზე ნაკლები მგელმა შეჭამოსო. ტვინგარეცხილი უფროსები და მათი ტვინგარეცხილი შვილები, უაზრო ქმედებებს და კარიკატურული პერსონაჟების როლების მიბაძვას ცხოვრების სტილად და მოდად აღიქვამენ. რამდენი ანგელოზი უნდა მოკვდეს ამ მარად დაწყევლილ ღვთისმშობლის ხვედრ ქვეყანაში რომ ბავშვების უსაფრთხოებას სერიოზულად მიუდგეს საზოგადოება (თუ შეიძლება ქართველების მოდგმის ჯოგს საზოგადოება ეწოდოს) და სახელმწიფო? გზაზე გატანილი ბავშვები ტრაილერების მიერ, იმიტომ რომ ფეხით მოსიარულეთა გადასასვლელი არ არის... მოუწესრიგებელი, ქაოსური, არაორგანიზებული საკურორტო ინფრასტრუქტურა, წესებისადმი და კანონებისადმი უპატივცემლობა, და ერთმანეთისადმი მტაცებლური და მტრული დამოკიდებულება ქართული საზოგადოების თვისებები არის რაც მომავალი ტრაგედიების რეცეპტი არის.
გააკეთე კომენტარი

კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას,სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.

რეგისტრაციისა და ავტორიზაციის გავლის შემდეგ აღარ მოგიწევთ დაცვის კოდისა და სხვა ინფორმაციის მითითება!

თქვენი კომენტარები გამოქვეყნდება ყოველდღე 11.00-დან 19.00 საათამდე, გამოგზავნიდან 30 წუთის განმავლობაში.

19.00 საათის შემდეგ მიღებული კომენტარები დაიდება მეორე დღეს.

P.S. ვრცელი კომენტარის გაკეთებისას ეცადეთ, ჩაეტიოთ 4 წუთში, ან დააკოპიროთ სხვა პროგრამაში აკრეფილი ტექსტი.
1 1
რუბრიკის სხვა სიახლეები