"ცარიელა ეს პარტახი საიგავო..." - საქართველოში გაუკაცრიელებული სოფლების რაოდენობამ მოიმატა - კვირის პალიტრა

საქართველოში გაუკაცრიელებული სოფლების რაოდენობამ მოიმატა, - ამის შესახებ “საქართველოს დემოგრაფიული აღორძინების ფონდის” თავმჯდომარემ, თამარ ჩიბურდანიძემ დღეს გამართულ პრესკონფერენაციაზე განაცხადა, სადაც იგი საყოველთაო აღწერის შედეგებს გამოეხმაურა.

მისივე ინფორმაციით, თუ 2002 წელს ასეთი სოფლების რაოდენობა 162 იყო, დღევანდელი მონაცემებით კი უკვე 223 სოფელია გაუკაცრიელებული. ასევე იკლო ხალხმრავალი სოფლების რაოდენობამაც.

„ხალხმრავალი სოფელი, სადაც 5000-ზე მეტი პირი ცხოვრობდა, იყო 28, ხოლო დღევანდელი მონაცემებით, ასეთი 12 სოფელია. ამ 12 სოფელში შედის წეროვანი და ლტოლვილებით ჩასახლებული სოფლებიც, რომელთა ზრდაც არა ბუნებრივი მატებით, არამედ შიდა მიგრაციით მოხდა“, - განაცხადა თამარ ჩიბურდანიძემ.

თამარ ჩიბურდანიძის განცხადებით, ასევე მომატებულია იმ სოფლების რაოდენობა, სადაც 1-დან 5 კაცამდე ცხოვრობს, ასეთი სოფლები 2002 წლის მონაცემით 74 იყო, ხოლო დღეს 157 სოფელია.