"პატრიარქს ფრაზა - „ხან ერთს ამბობს, ხან მეორეს“ არა მამა გიორგი მამალაძის, არამედ პროკურატურის შესახებ უნდა ეთქვა და ვიდეოდან ეს წინადადება სწორედ ამის გამო ამოიჭრა"
16 თებერვალს სოციალურ ქსელ "ფეისბუკში", ზუგდიდისა და ცაიშის ეპარქიის გვერდმა გაავრცელა საქართველოს კათოლიკოს-პატრიარქის მიმართვა, სადაც პატრიარქი საუბრობს დეკანოზ გიორგი მამალაძეზე, გერმანიაში ჩასვლის მიზეზზე და მალე საქართველოში დაბრუნებაზე.
მოგვიანებით გავრცელდა ახალი ჩანაწერი, საიდანაც ჩანდა, რომ ილია მეორის პირველი მიმართვიდან ამოჭრილი იყო ეს სიტყვები: „რა მოხდა, რატომ მოხდა, რომ მამა გიორგი ლაპარაკობს ხან ერთს, ხან - მეორეს, ვისი დავალებით ხდება ეს?.
მეუფე დიმიტრის მტკიცებით, ბერლინის კლინიკაში ჩაწერილ ვიდეოში პატრიარქი სიტყვებს „ხან ერთს ამბობს, ხან მეორეს“ არა მამა გიორგი მამალაძის, არამედ პროკურატურის შესახებ ამბობს.
როგორც მეუფე დიმიტრიმ „ინტერპრესნიუსს“ განუცხადა, პატრიარქმა უბრალოდ პროკურატურის ნაცვლად შეცდომით მამა გიორგი მამალაძის სახელი ახსენა და ვიდეოდან ეს ნაწილიც სწორედ ამის გამო ამოიჭრა.
მეუფე დიმიტრიმ აღნიშნა ისიც, რომ ვიდეოდან რამდენიმე წინადადების ამოღების გადაწყვეტილება შეთანხმებული იყო თავად პატრიარქთან.
„პატრიარქთან პალატაში შეკრებილი ვიყავით ოთხი მღვდელმთავარი, არქიმანდრიტი დავით ჭინჭარაული და შორენა. იქ ვსაუბრობდით ამ საკითხთან დაკავშირებით. ითქვა, რომ ხალხის დაბნეულობა გამოიწვია პროკურატურის სხვადასხვა განცხადებებმა. გადავწყვიტე, რომ ვიდეო მიმართვა გაგვეკეთებინა. რატომღაც არ ვიცი, ჩვენ ვერ ვთქვით ხმამაღლა, თუ პატრიარქმა ეს ვერ გაიგო, გამოვიდა ისე, რომ პატრიარქი ამბობს, რომ დეკანოზი გიორგი მამალაძე ხან ერთს ამბობს, ხან მეორეს და ხან მესამეს. ეს ასე არ იყო, იმიტომ რომ ამ დროს, იცით, მამა გიორგი დუმდა. ის, რასაც ეუბნებოდნენ პროკურატურის შესახებ პატრიარქს, მამა გიორგის შესახებ თქვა პატრიარქმა. იქვე მივიღეთ გადაწყვეტილება, მოვახსენეთ პატრიარქსაც, რომ ეს ასე უნდა ყოფილიყო და ნაწილი მოიჭრა, სადაც პატრიარქი საუბრობს, პროკურატურის ნაცვლად მამა გიორგიზე - ხან ერთს ამბობს, ხან მეორეს, ხან მესამესო“, - განუცხადა „ინტერპრესნიუსს“ მეუფე დიმიტრიმ.