”გეგონება ამათი მამა-პაპა ჩვენსავით საბჭოთა კავშირის მზეს არ იფიცებდა ერთ დროს!”

”ჩვენს ახალგაზრდობაში საცოლეს ასე საქვეყნოდ გამოაჭენებდა თავმოყვარე კაცი?”

სიბერე ადამიანის ყველაზე საპატიო მდგომარეობააო - უთქვამთ ძველ ეგვიპტელებს, თუმცა როგორც ჩანს, საქართველოში საქმე სულ სხვაგვარადაა. ამაში ალბათ ჩვენი რესპონდენტების მონათხრობიც დაგარწმუნებთ.

ისინი ბაღის შუაგულში, ყველაზე თვალსაჩინო ადგილას სხედან და ერთმანეთს ემუსაიფებიან. ძირითადად, საჭირბოროტო თემებზე ბჭობენ. ამბობენ, რომ ცხოვრებაში თითქმის ყველაფერი გამოსცადეს, თუმცა ჯერ კიდევ ბევრი რამის გაკეთება შეუძლიათ. უბრალოდ, დრო მოვიდა ასეთი - დრო, რომელიც ხანდაზმულებს ნაკლებად სწყალობს. ჩვენი რესპონდენტები ვერის ბაღის ხშირი სტუმრები -პენსიონერები არიან:

გიორგი ნ: 
ჩვენს გულისტკივილს მხოლოდ ერთი პირობით გაგიმხელთ - ჩვენი ვინაობა არ უნდა გაამჟღავნოთ. ასაკოვანი ხალხი ვართ, მთელი ცხოვრება შრომასა და ჯაფაში გაგვიტარებია, მაგრამ რად გინდა? ძაღლს უფრო მეტი დაფასება აქვს ამ ქვეყანაში, ვიდრე ჩვენ. ხან ”ჩარეცხილები” გვიწოდეს, ხან - ”წითელ ინტელიგენციად” მოგვნათლეს, ბოლოს აიღეს და სამსახურებიდან გამოგვიშვეს, გეგონება ამათი მამა-პაპა ჩვენსავით საბჭოთა კავშირის მზეს არ იფიცებდა ერთ დროს! აბა რა ცხოვრებაა, როცა შვილიშვილებს სასეირნოდ ვერ წაიყვან, წაიყვან და მთელი შენი პენსია ერთ დღეში შემოგეხარჯება. მართალია, პენსიები  გაგვიზარდეს, მაგრამ სამაგიეროდ ყველაფერი გაძვირდა. იმ ავადსახსენებელი შევარდნაძის დროს 14 ლარი გვქონდა, მაგრამ მაშინდელი 14 ლარით უფრო მეტ რამეს იყიდდი, ვიდრე ახლანდელი 90 ლარით. მთელი ცხოვრება შრომაში იმიტომ გავატარე, რომ ბოლოს შვილებისა და შვილიშვილების შესანახი გავმხდარიყავი?

ნიკო ჩ.
აბა რა გითხრათ, ისეთი ხალხი დანიშნეს თანამდებობის პირებად, წესით ლექციებზე რომ უნდა ისხდნენ და თავიანთ საქმეს უფრო საფუძვლიანად სწავლობდნენ. მინისტრად რომ კაცს ნიშნავ, სულ მცირე, 40 წლისა მაინც ხომ უნდა იყოს, ამ სფეროში მუშაობის გამოცდილება ხომ უნდა ჰქონდეს? 25-26 წლის ბიჭებმა ვის რა უნდა ასწავლონ და მიუთითონ? აბა ერთი მითხარით, სოფლის მეურნეობის სამინისტრო მუშაობს კარგად, თუ ეკონომიკის სამინისტრო, სადაც ბოლო სამი წლის განმავლობაში ლამის ათი მინისტრი შეცვალეს? გარეგნულად კი კარგი ქალია ეს ახალი მინისტრი, ვერა ქობალია, მაგრამ ვითომ ეგ ააშენებს ჩვენს დაქცეულ ეკონომიკას? ახალ-ახალი ხალხის დანიშვნა რომ საქმეს შველოდეს, ყველა ქვეყანაში შეცვლიდნენ მინისტრებს და აღარ დასჭირდებოდათ შრომა და ტვინის ჭყლეტა. უთავბოლობაა გამეფებული ქვეყანაში და იმიტომაც მიდის ჩვენი საქმე უკუღმა. გაიქცა ხალხი საქართველოდან იმიტომ, რომ აქ საარსებო წყარო ვერ იშოვნა და ოჯახი ვერ შეინახა.

დავით ზ.
საქართველო აგრარული ქვეყანაა, ამიტომ აქ პრიორიტეტი სოფლის მეურნეობის განვითარება უნდა იყოს. თბილისში ვარ დაბადებული და გაზრდილი, მაგრამ რომ იყოს ნორმალური პირობები, წავიდოდი ჩემს მამა-პაპურ სოფელში, მოსავალს მოვიწევდი, მეც საარსებო წყაროს გავიჩენდი და შვილიშვილებსაც გამოვუგზავნიდი, მაგრამ ვინც იქ ცხოვრობს, იმასაც უჭირს არსებობა. გაპარტახებული და დაცლილია ჩვენი სოფლები, გლეხს შემოსავალი არა აქვს, ფული არა აქვს და აღარ იცის, რა გზას დაადგეს. საქართველო ბუნებრივი რესურსებით მდიდარი ქვეყანაა, მაგრამ რად გინდა, ვერ ვიყენებთ ჩვენს სიმდიდრეს, პირიქით, უცხოელებზე ვყიდით და ვანიავებთ. ეკონომიკის ფაკულტეტი დავამთავრე და ისეთი მაგარი ლექტორები მასწავლიდენენ, როგორიც მაგალითად პაატა გუგუშვილი იყო. იცით რას გვეუბნებოდნენ? - საქართველოს იმდენი რესურსი აქვს, შეუძლია ორჯერ უფრო მეტი მოსახლეობა არჩინოს, ვიდრე აქ ცხოვრობსო.

არ მინდა ამ მთავრობაზე სულ ცუდი ვილაპარაკო, მაგრამ გაყიდეს ყველაფერი, რაც გვებადა. ამდენი ნარკომანი, ამდენი ჰომოსექსუალი არასოდეს გვყოლია, არც ამდენი მკვლელობა და თვითმკვლელობა ყოფილა. საქართველოში ყველა საკუთარ კეთილდღეობაზე ფიქრობს და არა ამ ქვეყნის მომავალზე. ერთადერთი ისევ ღმერთი თუ მოგვხედავს, თორემ ჩვენს პოლიტიკოსებს შორის ჯერჯერობით ვერავის ვხედავ, ვისაც ამ ქვეყანას ვანდობდი და ჩავაბარებდი.

ნიკო ჩ.
მარტო ღვთის იმედად ყოფნაც არ შეიძლება! ღმერთი მაშინ გეხმარება, როცა შენც იბრძვი, აქტიურობ, მოქმედებ. უფალი გეუბნება - ხელი გაანძრიე და გეშველებაო. ჩვენ კი როგორ ვიქცევით? - არაფერს ვაკეთებთ იმისათვის, რომ ჩვენმა შვილებმა და შვილიშვილებმა უკეთეს ქვეყანაში იცხოვრონ. ერთი აქტიური ბოროტი კაცი ხშირად ათას პასიურ კეთილს ამარცხებს ხოლმე. ჩვენშიაც ასე ხდება.

ვასო კ.
მთავრობის კრიტიკას თავი დაანებეთ, ჯერ იმას შეხედეთ, რა ახალგაზრდობა მოდის. გაგიჟებული ვარ კაცი: დღისით, მზისით სხედან ახალგაზრდა ბიჭი და გოგო და არც კი რცხვენით, ყველას დასანახად ისე იქცევიან. თუ საცოლეა, ან შეყვარებული, რაღას იმალებიან? ჩვენს ახალგაზრდობაში საცოლეს, ან შეყვარებულს ასე საქვეყნოდ გამოაჭენებდა თავმოყვარე კაცი? შვილიშვილი ვეღარ გამომიყვანია პარკში სასეირნოდ. თუმცა, რად გინდა? ფილმები და სერიალები გადის ისეთი, ეს თაობა კიდევ კარგ ჭკუაზეა. ძალიან ვდარდობ ჩემს შვილიშვილებზე, ამგვარ გარემოში მცხოვრები ბავშვი კარგი როგორ გაიზრდება?! 


ხათუნა ჩიგოგიძე