ზაზა ფაჩულია: "შედეგების ნახვის შემდეგ, გული არ დამწყვეტია"! (ექსკლუზივი) - კვირის პალიტრა

ზაზა ფაჩულია: "შედეგების ნახვის შემდეგ, გული არ დამწყვეტია"! (ექსკლუზივი)

"ოლ სტარში" მოხვედრა ძალიან ძნელია, მაგრამ ხალხის სიყვარული უფრო მნიშვნელოვანია ჩემთვის"

NBA-ს "ოლ სტარის" სასტარტო ხუთეულები უკვე ცნობილია, მაგრამ ზაზა ფაჩულიას ჯერ კიდევ აქვს მცირე შანსი, "ყველა ვარსკვლავის მატჩის" სათადარიგოთა შორის მაინც მოხვდეს. NBA-ს მწვრთნელების არჩევანს 28 იანვარს შევიტყობთ, მანამდე კი, გთავაზობთ ამონარიდს ზაზა ფაჩულიასთან ექსკლუზიური ინტერვიუდან, რომელსაც "კვირის პალიტრის" ორშაბათის ნომერში წაიკითხავთ. ზაზას აქილევსის მყესი აწუხებს და დიდი ალბათობით, მომდევნო რამდენიმე მატჩის გამოტოვება მოუწევს:

- საქართველოდან უდიდეს სტიმულს და მხარდაჭერას ვგრძნობდი. ვხედავდი, რომ მარტო არ ვარ ბრძოლის ველზე! ყველას თავისი ცხოვრება და საქმე აქვს, მაგრამ ამის მიუხედავად, ყოველდღიურად მითმობდნენ ყველაზე ძვირფასს - დროს!

"ოლ სტარში" მოხვედრა ძალიან ძნელია, მაგრამ ხალხის სიყვარული უფრო მნიშვნელოვანია ჩემთვის. სიყვარულს და პატივისცემას ვერც იყიდი და ვერც რამდენიმე დღეში მოიპოვებ - თავდაუზოგავი შრომაა საჭირო მოედანზეც და მის მიღმაც.

...შედეგების ნახვის შემდეგ, გული არ დამწყვეტია - ისეთი გრძნობა დამეუფლა, თითქოს, ერთი ქულით წამეგოს თამაში ძლიერ გუნდთან! სიხარულს და სიამაყეს კი ნამდვილად ვგრძნობდი, გამოკითხვაში ისეთ მაგარ კალათბურთელებს გავუსწარი. აქაური მასმედიაც და ქომაგებიც გაკვირვებული დარჩნენ ასეთი უპრეცედენტო მხარდაჭერით. ბევრმა მათგანმა პირველად გაიგო საქართველოს სახელი და ეს აქტიურობა, თუნდაც მხოლოდ ამად ღირდა!

იხილეთ ფოტოგალერეა: ზაზა ფაჩულიას ბავშვობა, ოჯახი, კარიერა

რატი შელეგია

ინტერვიუს სრული ვერსია იხილეთ "კვირის პალიტრის" 25 იანვრის ნომერში