ბარსელონას ძველმანების ბაზრობაზე შემთხვევით აღმოჩენილი გენიალური ნეგატივები
როდესაც 2001 წელს ამერიკელმა ტურისტმა, ტომ სპონჰეიმმა ბარსელონაში, ძველმანების ბაზრობაზე 3,5 დოლარად კონვერტი შეიძინა, ვერც კი წარმოიდგენდა, რომ მასში ნიჭიერი ხელოვანის ნამუშევრებს აღმოაჩენდა.
ტომი შინ აკვიატებული იდეით დაბრუნდა – ეპოვა ამ კადრების იდუმალი ავტორი. 2010 წელს მან ფეისბუქის მეშვეობით ძიება დაიწყო. სპონჰეიმმა თავის გვერდზე ფოტოები განათავსა და შეიძინა თარგეთული რეკლამა, რომელიც ბარსელონას მცხოვრებლებზე იყო გათვლილი.
გვერდი ძალიან პოპულარული გახდა, ადამიანები საკუთარ თავსა და მეგობრებს სცნობდნენ კადრებზე, მაგრამ ფოტოგრაფის ვინაობა ვერ დადგინდა, სანამ 2017 წელს, ვინმე ბეგონია ფერნანდესი არ ჩაერთო ძიებაში.
ერთ-ერთ ფოტოზე ბეგონიამ დაწყებითი სკოლა ამოიცნო. სწორედ ეს გახდა საკვანძო ნიშანი.
ქალმა ფოტოს ლოკაციის მიხედვით 1962 წელს ჩატარებული ფოტოკონკურსის შესახებ შეიტყო.
გამოძიებამ ფერნანდესი ფოტოგრაფთა ერთ-ერთი უძველესი ასოციაციის Agrupació Fotográfica de Catalunya არქივებამდე მიიყვანა. არქივებში ქექვისას, ერთ-ერთ ჟურნალში სწორედ ფეისბუქზე განთავსებული ფოტო იცნო.
მილაგროს კატურლა
ფოტოზე ავტორის სახელი იყო მითითებული – მილაგროს კატურლა. ამ ქალმა პედაგოგიური განათლება მიიღო, მაგრამ მთელი ცხოვრება ადმინისტრატორად მუშაობდა.
ასევე ფოტოგრაფიით ძლიერ იყო გატაცებული და ადგილობრივ ფოტოკონკურსებში არაერთხელ მოიპოვა გამარჯვება. მილაგროს კატურლა 2008 წელს გარდაიცვალა.
ბეგონია ფერნანდესმა და ტომ სპონჰეიმმა გადაწყვიტეს, გაეგრძელებინათ უცნობი გენიოსის საქმე. მაისში მილაგროს კატურლას ნამუშევრები ბარსელონაში გამოიფინება.
