ზოგჯერ ტექნიკაც ტყუის?!
ფულის უნაღდო, პლასტიკური ბარათით ანგარიშსწორება კომფორტული და მოსახერხებელია. ბოლო წლებში ის ჩვენთანაც დამკვიდრდა. ერთი შეხედვით, პროცედურა მარტივია, თუმცა ის შესაძლოა მომხმარებლისთვის დამატებითი თავის ტკივილი აღმოჩნდეს და მას ფინანსურთან ერთად, მორალური ზარალიც მიადგეს.
ცოტა ხნის წინ შევესწარი შემთხვევას "იოლის" სუპერმარკეტების ქსელის ერთ-ერთ ფილიალში. პიკის საათში სალაროსთან რიგი იდგა. ერთ-ერთი მომხმარებელი, რომელმაც თანხა პლასტიკური ბარათით გადაიხადა, რამდენიმე წუთში მაღაზიაში შეწუხებული შემობრუნდა, ბანკმა 15 ლარის ნაცვლად 30 ლარი ჩამომაჭრაო. მოლარემ თავი იმართლა, ბანკის შეცდომაა, ასე ხდება ხოლმე და ბანკს უნდა მიმართოთო. მომხმარებელს, რომელიც "თიბისი ბანკის" კლიენტი აღმოჩნდა, რიგიდან სხვა მომხმარებლები გამოეხმაურნენ: ტერმინალებით ანგარიშსწორებისას ასე ხშირად ხდება და მტყუან-მართალი ერთმანეთში ბანკმა და სავაჭრო ობიექტმა არკვიონ, ჩვენ რატომ უნდა დავზარალდეთო. ამბავი იმით დასრულდა, რომ დაზარალებული მომხმარებელი მეორე დღეს მენეჯერთან შეხვედრაზე დაიბარეს, შემდეგ კი, როგორც აღმოჩნდა, ბანკში მოუწევდა პრობლემის გარკვევა. ასე რომ, ზედმეტად ჩამოჭრილი თანხის ანაზღაურება დროის და შესაბამისად, მატერიალურ დანახარჯებს უკავშირდება.
დადუ ფეტელავა (კომპანია "იოლის" ოფისმენეჯერი): "თუ მომხმარებელს აქვს ჩეკი, რომელზეც აღნიშნულია სწორედ ის თანხა, რომელიც მან გადაიხადა, ეს უკვე ბანკის შეფერხებაა. მოლარეს ამის შესახებ ინფორმაცია არ აქვს. მომხმარებელმა მენეჯერთან შეხვედრა უნდა მოითხოვოს, რომელიც აუცილებლად გაუწევს კონსულტაციას. მომხმარებელმა ბანკში ჩეკი უნდა წარადგინოს და ამის საფუძველზე აღუდგება დაბლოკილი თანხა. ვერ ვიტყვი, რომ ასეთი შემთხვევები ხშირია, შესაძლოა ტერმინალი შეფერხებით მუშაობდეს, მაგრამ ზედმეტი თანხის ჩამოჭრა ბარათიდან ერთი-ორჯერ თუ მომხდარა. თუ ჩეკზე ზედმეტი თანხა იქნებოდა აღნიშნული, მაშინ პასუხს მოლარე აგებდა. როცა მომხმარებელი უკმაყოფილოა, ჩვენც ვუკავშირდებით ბანკებს და ხარვეზების შესახებ ვაცნობებთ".
"თიბისი ბანკში" ამბობენ, რომ ასეთ შემთხვევაში უნდა დაიწეროს განცხადება, რომლის საფუძველზე, არასწორად ჩამოჭრილი თანხა ორი დღეში კორექტირდება. ბანკში განმარტავენ, რომ ეს ხარვეზი პროგრამულად ხდება და ამიტომ სასურველია, მომხმარებელმა ქვითარი შეინახოს. სხვადასხვა სავაჭრო ობიექტში გამოკითხვისას აღმოჩნდა, რომ უნაღდო ანგარიშსწორების ტერმინალებთან დაკავშირებული პროგრამული ხარვეზები არცთუ იშვიათია, ხოლო მომხმარებელთა ფედერაციაში სხვა შემთხვევების შესახებაც გვიამბეს.
მადონა კოიძე (მომხმარებელთა უფლებების დაცვის ფედერაციის თავმჯდომარე): "ჩვენთვის მოუმართავთ მომხმარებლებს, რომ გამოცხადებული ფასდაკლების მიუხედავად, ანგარიშიდან პროდუქციის თანხა სრულად ჩამოაჭრეს. ამ და სხვა მსგავს შემთხვევაში მომხმარებელი ფინანსურად ზარალდება. ზოგჯერ მომხმარებელს ზუსტად აქვს გათვლილი თანხა, ხოლო ზედმეტი თანხის ჩამოჭრისას, სანამ ბანკი გაასწორებს, ანდა სავაჭრო ობიექტი და ფინანსური ინსტიტუტი მტყუან-მართალს გაარკვევენ, ის შესაძლოა გამოუვალ მდგომარეობაშიც აღმოჩნდეს. ასეთ შემთხვევაში მომხმარებელს შეუძლია, შეცდომაზე პასუხისმგებელი ორგანიზაციისგან მორალური ზარალის ანაზღაურებაც მოითხოვოს. ტექნიკური გაუმართაობისგან დაზღვეული არავინ არის, მაგრამ ეს ხშირად არ უნდა ხდებოდეს".