ბიზნესის გაკვეთილები არადამწყებთათვის
09-12-2013
ბიზნესის გაკვეთილები არადამწყებთათვის
კომპანია SalesWay ბაზარზე დაახლოებით ერთი წლის წინ გამოჩნდა და კერძო სექტორს მეტი ინფორმირებულობა და კვალიფიკაცია შესთავაზა - ტრენინგები, პროფესიული გადამზადება ძირითადად კომერციული მიმართულებით, სადაც ასწავლიან გაყიდვების ტექნიკას, მენეჯმენტს, მარკეტინგსა და მომსახურების სტანდარტებს; პრომო მომსახურება, ბიზნესკონსულტაცია ძირითადად მცირე და საშუალო კომპანიებისთვის, სლოგანის, სარეკლამო ტექსტების, სტრატეგიის შემუშავებაში დახმარება; საერთაშორისო ტრენინგები - ეს იმ სერვისების არასრული ჩამონათვალია, რასაც ახალბედა კომპანია მომხმარებელს სთავაზობს.

გურამ შეროზია (SalesWay-ს დამფუძნებელი): "კომპანიის სახელწოდებიდანაც ჩანს, რომ ჩვენი საქმიანობის ძირითადი
მიმართულება არის გაყიდვები და ყველაფერი, რაც კომერციას უკავშირდება. მომსახურებათა სრული პაკეტი მოიცავს კონსალტინგს, ტრენინგებს, კადრების გადამზადებასა და კვლევებს. ვამაყობთ, რომ გავედით საერთაშორისო ბაზარზე. ყველაფერი კი ერთი იდეით დაიწყო - მე და ჩემს მეგობრებს გვსურდა, ჩამოთვლილი მომსახურებები ერთი კომპანიის ქოლგის ქვეშ გაგვეერთიანებინა.

ილიას სახელმწიფო უნივერსიტეტთან ვთანამშრომლობ,
სადაც ლექციებს მსგავს თემებზე ვკითხულობ. გადავწყვიტეთ, ეს ლექციები ტრენინგის ფორმატში გადაგვეყვანა. შორს წასვლა არც გვიფიქრია და კომპანიამ ბინა სასწავლებელში დაიდო. რამდენიმე ბენეფიტის გამო ვთანამშრომლობთ ამ უნივერსიტეტთან - ხელსაყრელი მდებარეობა, მუდმივი განვითარება, არცთუ ურიგო ინფრასტრუქტურა და სტუდენტების საკმაოდ კარგი კონტინგენტი, საიდანაც ზოგი ჩვენი თანამშრომელი ხდება. ტრენინგებისთვის შეგვიძლია უნივერსიტეტში მიწვეული ლექტორების გამოყენებაც.

როცა SalesWay-ს იდეა გაჩნდა, ვიწრო, მაგრამ კომპეტენტურ წრეში ამ იდეის გარშემო ე.წ. გონებრივი იერიში მოვაწყვე. არ მინდოდა ავჩქარებულიყავი, რადგან მანამდეც მქონდა ბიზნესი, რომელიც ახლა შემიძლია ვთქვა, რომ უფრო გამოცდილების მიღების შესაძლებლობა იყო, ვიდრე მომგებიანი საქმე. ტურისტული კომპანიის ერთ-ერთი პლუსი კრეატივი გახლდათ. ისეთ სიახლეებსა და სერვისებს ვნერგავდით, რაც მაშინ სხვა კომპანიებს არ ჰქონდათ. მაგალითად, შეგვეძლო ბუნებაში წაგვეყვანა ხალხი, სადაც იმღერებდნენ კარაოკეზე, შემდეგ საჩუქრად გადავცემდით ამ დღის ამსახველ, დამონტაჟებულ ვიდეოს - მინიკლიპს, რომელიც სამახსოვროდ დარჩებოდათ. იმ დროს მიღებული გამოცდილება კარგად გამოვიყენე, რათა შალესჭაყ დაარსების დღიდან მყარად დამდგარიყო ფეხზე.
ძირითადი კაპიტალი, რომელიც ამ ბიზნესში ჩავდეთ, ინტელექტუალური რესურსი იყო. დაახლოებით სამი-ოთხი თვე დამჭირდა ბაზრისა და კონკურენტი კომპანიების შესასწავლად და ჩემი შანსების შესაფასებლად. იმავდროულად დავიწყე საერთაშორისო ასპარეზის "მოთელვა".

მუშაობის დაწყების შემდეგ, კომპანიებს ვუკავშირდებოდით და მომსახურებებს ვთავაზობდით, ზოგ სერვისს უსასყიდლოდაც, რათა დაენახათ, რამხელა მნიშვნელობა ჰქონდა მათთვის კომერციის სხვადასხვა მიმართულების ცოდნას და რას კარგავდნენ უამისოდ. ბიზნესის გარდა, გამოჩნდნენ ახალგაზრდები და სტუდენტები, ვისაც გადამზადება სურდა. გავედით უცხოეთის მოქალაქეებზეც. რამდენიმე საინტერესო საიტზე თავმოყრილია ინფორმაცია გაცვლითი პროგრამების, ტრენინგების შესახებ. მათ შევუთანხმდით და განვათავსეთ ჩვენი შეთავაზება - პროგრამა, რომლის ფარგლებშიც ადამიანები ჩამოდიან, გადიან ტრენინგს, თან ისვენებენ და ამყარებენ საჭირო კომუნიკაციას.

კონკურენტებისგან გამოგვარჩევს მრავალფეროვანი სერვისი, გათვლილი სხვადასხვა სამომხმარებლო სეგმენტზე, აგრეთვე განსხვავებული მიდგომები. მაგალითად, პრომომომსახურება არ გულისხმობს მხოლოდ რამდენიმე პრომოგოგონას ან ვაჟის დაქირავებას, რომლებიც ფლაერებს დაარიგებენ, არამედ დგება ორმაგი მონიტორინგის სისტემა, მათ ჰყავთ ხელმძღვანელი, რომელიც იმის გარანტია, რომ ყველა ფლაერი მიზნობრივ სეგმენტამდე მივა. გააჩნია შეთავაზების ფორმასაც. როცა ვიღაც უხმოდ გაწვდის ფლაერს, შესაძლოა არც გაეცნო, მაგრამ თუ გაგიღიმებს და ორიოდე სიტყვით მოკლე რეზიუმეს გაცნობს, გაცილებით მეტია ალბათობა, მომხმარებელმა ფლაერი არ გადააგდო და წაიკითხო.

გაყიდვების მენეჯმენტს მსმენელებს რეალური მაგალითებით ვასწავლით, რა გამოუვიდათ კომპანიებს ყველაზე უკეთ, ვასწავლით მომხმარებლის ფსიქოლოგიას, მყიდველის ქცევას. კონსალტინგს ვუწევთ ადგილობრივ და საერთაშორისო კომპანიებს. როცა უცხოური ფირმა საქართველოს ბაზარზე შემოდის, ჩვენი უცხოელი პარტნიორები ჩვენთან აგზავნიან. ამ შემთხვევაში ჩვენი ამოცანაა, დავაკვალიანოთ, ავუხსნათ ბაზარზე შემოსვლის პირობები, გავუწიოთ კონსულტაცია, აგრეთვე მოვძებნოთ ორგანიზაცია, რომელიც მათთან თანამშრომლობას მოისურვებს".

info@SalesWay.ge
ტელ.: 570-707-272


* * *

გზის გაკვალვა პროდუქციის ხარისხით


თავის დროზე, კოსმეტიკური ნაწარმის ამ ფრანგულმა ბრენდმა სახელი სახისა და სხეულის მოვლის ნატურალური საშუალებების წარმოებით გაითქვა. "კორინ დე ფარმის" პროდუქციის შემადგენლობაში ახლაც 95% ბუნებრივი ინგრედიენტია. ქართულ ბაზარზე ეს პროდუქცია 2004 წელს გამოჩნდა. ბავშვთა ექიმმა მიიჩნია, რომ რაც მის პაციენტებს განკურნებაში ეხმარებოდა, იმაზე ფართო მომხმარებლის მოთხოვნაც იარსებებდა...

ქეთი ქველაძე ("უნიკომპანის" დამფუძნებელი):
"პროფესიით ექიმი-პედიატრი გახლავართ და ჩემი საექიმო პრაქტიკა ძალიან დამეხმარა ამ ფრანგული ბრენდის პროდუქციის შესწავლაში. 2004 წელს საქართველოში ექიმობით თავს ვერ ირჩენდი და ყველა ცდილობდა, რამე სხვა საქმისთვის მოეკიდა ხელი. მეც მათ რიცხვში აღმოვჩნდი. როგორც ქალს, მაინტერესებდა კოსმეტიკა, პარფიუმერია და მომხმარებელიც ვიყავი. "კორინ დე ფარმი" ფარმაცევტული მიმართულების ბრენდია და პირველ რიგში სწორედ ამან დამაინტერესა. თანაც წარმოება მთლიანად საფრანგეთშია, რაც ხარისხზე მეტყველებს. ჩემი შეფასებით, იმ დროს ბაზარზე ხარისხიანი კოსმეტიკური პროდუქციის მცირე არჩევანი იყო და, წესით, მომხმარებელი უნდა დაინტერესებულიყო. ჯერ შუამავალი კომპანიის დახმარებით შემოვიტანე "კორინ დე ფარმის" პროდუქცია, შემდეგ კი მათი მეშვეობით მწარმოებელზეც გავედით. მოთხოვნა იყო, საქართველოს ბაზარი აქტიურად ჩართულიყო გაყიდვებში და ბრენდის პროდუქციისთვის მზარდი ყოფილიყო. პროდუქცია სააფთიაქო ქსელებში, სუპერმარკეტებსა და ჰიპერმარკეტებში შევიტანეთ. ეს სწორი ნაბიჯი იყო, რადგან გაყიდვების დინამიკა მზარდია და მომწოდებლებიც კმაყოფილი არიან.

საწყის ეტაპზე ინვესტორი გვყავდა, მაგრამ ახლა ვუმკლავდებით და საკუთარი ხარჯებით ვუკვეთთ. თავიდან მომწოდებელი საკმაოდ მკაცრ პირობებს გვიყენებდა, წინასწარი გადახდით მუშაობა გვიწევდა. მას შემდეგ, რაც ერთმანეთისთვის სანდო პარტნიორები გავხდით, შეღავათები გვაქვს და პროდუქციას კონსიგნაციითაც გვაწვდიან. თავიდან ძალიან მცირე პარტია შემოვიტანეთ, ბაზარი მოვსინჯეთ და, დაახლოებით, 10 ათასი ევრო დავხარჯეთ. ხარისხმა თავისი როლი შეასრულა და მომხმარებელი, რომელიც ერთხელ მოიხმარდა ამ პროდუქციას, მას აუცილებლად უბრუნდებოდა.

კი გაისმის ხმამაღალი განცხადებები მცირე ბიზნესის მხარდასაჭერად, მაგრამ საგადასახადო კოდექსი ჩვენისთანა კომპანიებისთვის საკმაოდ მკაცრია. როცა პროდუქცია შემომაქვს და საფრანგეთში მის ღირებულებას წინასწარ ვიხდი, ჩამოტანას სამი კვირა სჭირდება და ამ პერიოდში ხომ ვერ ვყიდი. არადა, ბანკის სესხი და სხვა ხარჯები მაქვს, სახელმწიფო კი წინასწარ ითხოვს დღგ-ის გადახდას. ეს იმ პროდუქციის 18%-ია, რომელიც ჯერ არ გაგვიყიდია, მაგრამ ანგარიშფაქტურებით გვაქვს გაცემული სავაჭრო ქსელში - ძირითადად კონსიგნაციით, რადგან ყველა ცდილობს, გადავადებული გადახდით მიიღოს პროდუქცია ან გაყიდულის ღირებულება აანაზღაუროს. აქედან გამომდინარე, მთელი ფინანსური ტვირთი ჩვენზე მოდის. ეს კი პირდაპირ შემიძლია გითხრათ, რომ ახრჩობს ჩვენისთანა მასშტაბის კომპანიებს".

P.S. გაგვიზიარეთ თქვენი ბიზნესის ისტორია, გახდით გადაცემა "ბიზნესფაილის" მონაწილე და გახადეთ თქვენი კომპანია კიდევ უფრო ცნობილი რადიოში, ტელევიზიასა და პრესაში. გადაცემაში მოხვედრის მსურველებს შეუძლიათ დაგვიკავშირდნენ ტელეფონის ნომერზე: 272-52-83.
მკითხველის კომენტარი (0)
კომენტარი ჯერ არ გაკეთებულა.
იყავი პირველი!

რედაქტორის რჩევით