"ბიზნესში წვრილმანები არ არსებობს" - კვირის პალიტრა

"ბიზნესში წვრილმანები არ არსებობს"

ბოლო წლებში შაურმის ბიზნესი საქართველოში პოპულარულია. ლამის ყოველ ნაბიჯზე ახალ-ახალი საშაურმე იხსნება და მუშტარიც ჰყავს, მიუხედავად იმისა, რომ ბოლო დროს შაურმით რამდენიმე ადამიანი მოიწამლა და გავრცელდა ცნობა, რომ ზოგიერთი საშაურმე ვირის ხორცით მარაგდებოდა. "ბიზნესფაილი" ამ და სხვა საკითხებზე ერთ-ერთ მეწარმეს ესაუბრა.

ბადრი ბაგათელია ("მაკშაურმის" დირექტორი): "2007 წელს უცხოეთიდან საქართველოში დავბრუნდი. ბიზნესის დაწყება მქონდა გადაწყვეტილი და დავიწყე კვლევა, სად უფრო სარფიანი იქნებოდა კაპიტალის დაბანდება. ჩემი იდეა იაპონური რესტორნების ქსელის გახსნა იყო, მაგრამ სულ მესმოდა საშაურმეების მომგებიანობის შესახებ და კვლევებმაც დაადასტურა, რომ შაურმაზე დიდი მოთხოვნილება იყო. გადავწყვიტე, თბილისში საშაურმეები გამეხსნა, იდეის საქმედ ქცევას ოთხი-ხუთი წელიწადი დასჭირდა. ამ ხნის განმავლობაში შაურმის გემოვნურ თვისებებზე ვმუშაობდით, ამიტომაც ბაზარზე ჩვენი პროდუქცია გამორჩეულია. შაურმის მომზადებისას ერთ ისეთ ინგრედიენტს ვიყენებთ, რომელსაც "მაკდონალდსის" ქსელი იყენებს. სწორედ ამის გავლენაა, რომ ჩვენს პროდუქციასა და ქსელს "მაკშაურმა" დავარქვით.

თუმცა "მაკდონალდსის" გავლენა ჩვენს ბიზნესზე მხოლოდ სახელწოდებასა და პროდუქციის გემოვნურ თვისებებში არ იგრძნობა. ლოგოს ფერები, რომლებიც უმალ ხვდება თვალს, მომხმარებელთა რიგების მართვის სისტემა - აქაც დიდი ბიზნესის კარგი გამოცდილება გავითვალისწინეთ. ყველა მომხმარებელს აქვს რიგის ნომერი, რომელიც ჩეკზეა მიმაგრებული და თავის რიგს ასე ელოდება. პირველი ფილიალი გლდანში გავხსენით და ხუთი ადამიანი ვმუშაობდით. შარშან ნოემბერში დაარსებიდან ერთი წელი შეგვისრულდა. დღეს ორი ობიექტი გვაქვს, სადაც 35 თანამშრომელია დასაქმებული. წარმატების მთავარი პირობა მაღალი ხარისხის ნედლეულია. მართალია, ჩვენი პროდუქცია შედარებით ძვირი ღირს, მაგრამ მომხმარებელმა კარგად იცის, რაში და რატომ იხდის მეტს.

მაგალითად, ხორცს, ანუ ღორის ბარკლებს "ნიკორა" და "ფუდლაინი" გვაწვდიან, რომელთაც გაყინული პროდუქცია კანადიდან და ბრაზილიიდან შემოაქვთ. გაგიკვირდებათ და პირველი ფილიალი ცნობილი გლდანის საშაურმის გვერდით გავხსენით. ეს კიდევ ცალკე ბიზნესისტორიაა. როცა კვლევებმა მიჩვენა, რომ საშაურმეები მომგებიანი ბიზნესი იყო, ე.წ. გლდანის საშაურმის ყიდვით დავინტერესდი, წინადადებით მივმართე, მაგრამ უარი მივიღე. მოხდა ისე, რომ სანამ ბიზნესგეგმებს ვაწყობდი, ჩემმა მეგობარმა გახსნა მათ გვერდით საშაურმე, თუმცა ფინანსური პრობლემები მალევე შეექმნა და მისი ბიზნესის ყიდვა შემომთავაზა, მეც დავთანხმდი.

ბიზნესში ძალიან მნიშვნელოვანია, წვრილმან დეტალებსაც ისეთივე ყურადღება დაუთმო, როგორიც ერთი შეხედვით მასშტაბურ საკითხებს. შევნიშნე, რომ საქართველოში ასეთ დეტალებს ნაკლები ყურადღებით ეკიდებიან. ამ ბიზნესში მნიშვნელოვანია საუკეთესო ხორცისა და პომიდვრის გამოყენება, მომხმარებელი ყოველთვის ამჩნევს, რამდენად მოწესრიგებული არიან შენი თანამშრომლები, ზრუნავ თუ არა მომხმარებლის კომფორტზე და სხვ. ძალიან მნიშვნელოვანი დეტალია, რომ შაურმის ერთი აპარატის უცხოეთში შეძენა $2700 დაგვიჯდა, ბაზარზე კი მისი ფასი 300-1200 ლარია. ჩვენ გადავწყვიტეთ უახლესი აპარატი შეგვეძინა, რომლის მთავარი უპირატესობა ვულკანური ქვებია, რომელთა სიმხურვალითაც იწვება ხორცი.

ვფიქრობ, საქართველოში ყველა პირობაა ბიზნესის დასაწყებად. მთავარია, გქონდეს შესაბამისი ფინანსები და სწორი გათვლა. ბიზნესგეგმის გარეშე რამე საქმის წამოწყება შეცდომაა. ბოლოდროინდელი აჟიოტაჟი ვირის ხორცზე ჩვენ შემთხვევაში სიმართლეს არ შეესაბამება. დავინტერესდი და გავარკვიე, რომ ვირის ხორცი მკვეთრად წითელი შეფერილობითაც გამოირჩევა სხვა პირუტყვის ხორცისგან. ამ ხორცს ძირითადად ზოოპარკში აბარებენ. როგორც ჩანს, ეს ამბავი განგებ იყო აგორებული საშაურმეების წინააღმდეგ და მომხმარებელთა რაოდენობაზეც საგრძნობლად აისახა. ჩემთვის წარმატების უტყუარი მაჩვენებელი ის იყო, როცა ამ ყველაფრის შემდეგ ჩვენს საშაურმესთან მშობლები შვილებთან ერთად მოდიოდნენ. მომხმარებლის ნდობაზე ძვირფასი არაფერია".

* * *

"ჩემს ბიზნესში ცოდნამ მეტი საქმე გააკეთა, ვიდრე ფინანსებმა"

მრავალი სახის სამედიცინო მომსახურება, მათ შორის, ექთანი გამოძახებით - ამ კლინიკის ისტორია 2008 წელს იწყება, როცა საქართველოსთვის ყველა თვალსაზრისით მძიმე დრო იდგა.

ლევან ჯიჯეიშვილი (კლინიკა "ვისტამედის" ერთ-ერთი დამფუძნებელი და ხელმძღვანელი): "ბიზნესსზე ფიქრი მაშინ დავიწყე, როცა სამსახური დავკარგე. 2008 წელს, შექმნილი ვითარების გამო, ბევრი პროექტი შეჩერდა. მეც ერთ-ერთ ასეთ პროექტში ვიყავი ჩართული, როგორც ექიმი და შინ გამიშვეს. ასე დავიწყე ფიქრი საკუთარ საქმეზე.

კრიტიკული მედიცინის სპეციალისტი, ანუ რეანიმატოლოგი გახლავართ. დიდი ხნის განმავლობაში ვმუშაობდი "კარდიოექსპრესში" და შეიძლება ითქვას, ზოგადი პროფილის ექიმადაც ჩამოვყალიბდი. 1995 წლიდან ერთ-ერთ ამერიკულ კომპანიაში პროექტის ხელმძღვანელად ვმუშაობდი და უნარ-ჩვევების შესწავლა მენეჯმენტის კუთხით მიწევდა. მივხვდი, რომ სამედიცინო მენეჯმენტის სფერო ძალიან საინტერესო იყო. ბიზნესსკოლაში ჩავაბარე და მაგისტრატურის კურსი გავიარე, რაც შემდეგში ძალიან დამეხმარა. დარწმუნებული ვარ, ცოდნამ მეტი საქმე გააკეთა ჩემს ბიზნესში, ვიდრე ფინანსებმა.

სწორედ მაშინ, როცა საკუთარი ბიზნესის წამოწყებაზე ვფიქრობდი, დამიკავშირდა კოლეგა, შემდეგში კი ერთ-ერთი ბიზნესპარტნიორი და შემომთავაზა თავისი სტომატოლოგიური კლინიკის მატერიალურ-ტექნიკური ბაზა და განსაზღვრული სახსრები ერთობლივი საქმის დასაწყებად, კერძოდ, მრავალპროფილიანი კლინიკის გასაკეთებლად. თავიდან უფასო აქციებით დავიწყეთ, ხალხი მოვიზიდეთ, რათა გაეგოთ, რომ რაღაც ახალი დავიწყეთ. ჩემს მეგობრებს, სხვადასხვა პროფილის ექიმებს ვთხოვე დახმარება, მოდიოდნენ და უფასოდ იღებდნენ პაციენტებს. საქმიანობა ძირითადად სამედიცინო კონსულტაციებით დავიწყეთ, შემდეგ წამოვიდა მოთხოვნა ლაბორატორიულ მომსახურებაზე, რამაც გვიბიძგა, ეს მომსახურებაც შეგვეთავაზებინა. ისეთი დროც გავიარე, როცა პარალელურად სხვა ორგანიზაციებში ვმუშაობდი, იქიდან მომიტანია ხელფასი და "ვისტამედში" თანამშრომლებისთვის გადამიხდია, ასეთი კარგი სპეციალისტები რომ არ დამეკარგა. როცა საქმეს ვიწყებდით, იმასაც გვეუბნებოდნენ, რომ ერთ თვეს თუ გავატანდით და შემდეგ დავიხურებოდით, მაგრამ ვიპოვეთ ჩვენი ნიშა და ის პროდუქტი, რომელიც წარმატების საწინდარია.

პირველ რიგში, ეს არის ის, რომ ვმუშაობთ 24 საათის განმავლობაში, კვირაში 7 დღე. ლაბორატორიული კვლევების პასუხებს ოპერატიულად, იმავე დღეს გავცემთ. გვაქვს ბინაზე მომსახურების სერვისიც, რაც, სხვათა შორის, თავად პაციენტებმა გვიკარნახეს და საკმაოდ მოთხოვნადიც აღმოჩნდა. გვაქვს საექთანო სამსახური ოცი თანამშრომლით, ადრე კი ხუთი-ექვსი იყვნენ. ხშირად ვაწყობთ კვლევებსა და გამოკითხვებს ჩვენს პაციენტებს შორის და საკმაოდ კარგ იდეებსაც გვაწვდიან. ფასებს ზოგჯერ ინდივიდუალურად ვურჩევთ კლიენტებს. ფასების დისკრიმინაციული სისტემა ნიშნავს ერთი და იმავე სერვისის სხვადასხვა ფასად შეთავაზებას, რასაც უცხოეთში ბევრი ექიმი მიმართავს. ზოგს არ აქვს რაღაც რაოდენობაზე მეტი თანხა და უარს არ ვეუბნებით, ვითვალისწინებთ მის შესაძლებლობებს. ამას მაშინ ვაკეთებთ, მაგალითად, თუ პაციენტს ბევრი პროცედურა სჭირდება.

სამედიცინო ბიზნესში წარმატების რამდენიმე მაჩვენებელი არსებობს: აღიარება სხვა სამედიცინო ორგანიზაციების მიერ, სწორად დასმული დიაგნოზი და კმაყოფილი პაციენტი. როცა თანამშრომელსაც ემატება ხელფასი და მეტი ადამიანი საქმდება, ამას ყველაფერს ერთად მოგებას ვუწოდებ".

P.S. გაგვიზიარეთ თქვენი ბიზნესის ისტორია, გახდით გადაცემა "ბიზნესფაილის" მონაწილე და გახადეთ თქვენი კომპანია კიდევ უფრო ცნობილი რადიოში, ტელევიზიასა და პრესაში. გადაცემაში მოხვედრის მსურველებს შეუძლიათ დაგვიკავშირდნენ ტელეფონის ნომერზე: 272-52-83.