"არ შეიძლება თან ანაკლიას აშენებდე, თან ასე აპიარებდე ფოთის პორტს"
30-05-2019
"არ შეიძლება თან ანაკლიას აშენებდე, თან ასე აპიარებდე ფოთის პორტს"
ფოთის ახალი ღრმაწყლოვანი პორტის მშენებლობა, რომელიც გუშინ ფოთის მერიამ და APM-Terminal-მა დააანონსა, აღარ აშენდება, ყოველ შემთხვევაში, ჯერჯერობით. ეკონომიკის მინისტრმა მის დაქვემდებარებაში მყოფი სსიპ-ს ტექნიკური და სამშენებლო ზედამხედველობის სააგენტოს 2019 წლის 2 მაისი #77-04 ბრძანება, რომელიც სწორედ ახალი ღრმაწყლოვანი, მრავალფუნქციური ნავსადგურის მშენებლობის წინასწარ ნებართვას ეხება, გააუქმა. მეტიც, ნათია თურნავამ ამ დოკუმენტის გამო, სააგენტოს ხელმძღვანელი გრიგოლ კაკაურიძე თანამდებობიდან გაათავისუფლა. ფოთის პორტის თემა მას მერე განსაკუთრებულად გააქტიურდა, რაც "თიბისი ჯგუფისთვის" შექმნილი პრობლემების შემდეგ,
ანაკლიის პორტის გარშემოც ვითარება გართულდა.  რას აცხადებდა მამუკა ხაზარაძე "კვირის პალიტრისთვის" მიცემულ ინტერვიუში ფოთის პორტზე? -  ამონარიდი ინტერვიუდან:

- პარალელურად ფოთის პორტის გაღრმაწყლოვანებაზეა საუბარი. იქაც ოპიკია (კერძო ინვესტიციების საერთაშორისო კორპორაცია) ჩართული. შეიძლება ვთქვათ, რომ კონკურენტი გამოუჩნდა ანაკლიის პორტს?
- მაშინ ძალიან საინტერესო ისტორიას მოგიყვებით: ყველაზე მთავარი
პორტის საქმიანობაში ოპერატორი კომპანიის მოძიებაა. ჰოლანდიელებმა, რომლებიც ჩვენი კონსულტანტები არიან ამ პროექტში, საერთაშორისო ტენდერი ჩაგვატარებინეს და გამოვავლინეთ გამარჯვებული - სინგაპურის პორტის ადმინისტრაცია, რომელიც ყველაზე დიდია მსოფლიოში. მათთან მოვილაპარაკეთ, პროექტი მოეწონათ, ინვესტიციაზე აიღეს ვალდებულება, ჩაატარეს დიუ-დილიჯენსი (საინვესტიციო ობიექტის დეტალურად შესწავლა რისკების თავიდან ასაცილებლად. - ავტ.) და ბოლოს თქვეს, რომ სჭირდებათ 5-წლიანი ექსკლუზივი. ამ პერიოდში სხვა ღრმაწყლოვანი პორტის მშენებლობის ნებართვა არ იქნებოდა გაცემული (აქ არ იყო ლაპარაკი არსებული პორტის გაღრმაწყლოვანებაზე).

მთავრობას მაშინ ჩვენ ბევრი მაგალითი წარვუდგინეთ, როცა ახალი პორტის მშენებლობისას ძველი პორტის მფლობელი კომპანია იწყებს პიარსვლებს, რაში გჭირდებათ ახალი პორტი, როცა შემიძლია უკვე არსებულის გადაიარაღება მოვახდინოო. ხშირად ასეთ დროს აღარც ახალი პორტი შენდება, რადგან ინვესტორს ამ პირობებით ვეღარ იზიდავ და აღარც ძველის გადაიარაღება გამოსდის, საბოლოოდ კი ასეთი ქვეყნები პერსპექტივის გარეშე რჩებიან. თუმცა მაშინ მთავრობამ ამაზე გვიპასუხა, რომ ეს იქნებოდა კონკურენციის შეზღუდვა და საერთაშორისო კომპანიებს, რომლებიც ჩვენს პორტებში ოპერირებენ, ამის გამო შეეძლოთ ხელისუფლებისთვის ეჩივლათ. მოკლედ, ბევრი საუბრის შემდეგ ჩვენ მიერ შერჩეულმა პორტის ოპერატორმა მოითხოვა, რომ სახელმწიფოს 600 მილიონიდან 200-ის თანაინვესტირება მოეხდინა. ამ საკითხზე შევხვდი ბიძინა ივანიშვილსა და დიმიტრი ქუმსიშვილს. შევთანხმდით, რომ სახელმწიფო გამოყოფდა 100-მილიონიან საკრედიტო ხაზს, რომელსაც საპარტნიორო ფონდი მოიზიდავდა გარედან, ეს არ იქნებოდა ბიუჯეტის თანხა, და გვასესხებდა ჩვენ. თუმცა შერჩეული ოპერატორი კომპანიისთვის ეს პირობა მისაღები არ გამოდგა. აი, აქ კი აღმოვჩნდით ვაკუუმში და ამ დროს გამოჩნდა SSA MARINE - ცნობილი და სერიოზული კომპანია, რომელიც ჩვენი ოპერატორი გახდა.
ფოთში ერთ-ერთი ტერმინალის 12 მეტრით დაღრმავება არ ნიშნავს ღრმაწყლოვანი პორტის მშენებლობას.

- მედიაში გავრცელებული ინფორმაციით ისე გამოდის, რომ ფოთში ღრმაწყლოვანი პორტი შენდება. თქვენი აზრით, დღეს ამ საკითხის წინ წამოწევა დამთხვევაა თუ კონკრეტული მიზანი აქვს?

- ბევრი რამ ემთხვევა ერთმანეთს. თვითონ იმ ბანკირებსაც, რომლებიც ფოთის პორტსაც აფინანსებენ და ჩვენთან მუშაობენ, ცოტა არ იყოს, გაუკვირდათ, როცა ფოთის პორტის გაღრმაწყლოვანებაზე პრესრელიზები ნახეს. 50 მილიონად პორტი ვერ აშენდება. მე მივესალმები ნებისმიერი ბიზნესის გადაიარაღებას, მაგრამ როცა ბუზისგან სპილო იქმნება იმიტომ, რომ რაღაც გადაიფაროს, ეს უკვე სხვა თემაა.
ამის მიზანი იმ აზრის დამკვიდრებაა, თუ ანაკლია არ აშენდება, აგერ ფოთიც შეასრულებს ამ ფუნქციასო. სრული პასუხისმგებლობით მინდა ვთქვა: ფოთის პორტი ვერ შეასრულებს იმ ფუნქციას, რაც ანაკლიას აკისრია. ბანკებმა რამდენიმე თვის წინ გამართულ შეხვედრაზე პირდაპირ დასვეს საკითხი ხელისუფლების წარმომადგენლებთან, პირდაპირ და მკაფიოდ გვითხარით ყველაფერი ფოთის პორტზეო.
სხვათა შორის, ეს ერთ-ერთი პუნქტია ზემოთ ხსენებული რვიდან. არ შეიძლება თან ანაკლიას აშენებდე, თან ასე აპიარებდე ფოთის პორტს, ახალ პორტს ვაშენებთო. ეს ანაკლიის პორტის მნიშვნელობაზე პირდაპირი დარტყმა და დაკნინებაა. იხილეთ სრულად
ალექს
02 ივნისი 2019 06:38
"ტვირთი" პირდაპირი გაგებით ამ შემთხვევაში არ უნდა გაიგო,ის საქონელია,ღირებულებაა და მისი გზა ხშირად უმოკლესი და უიაფესი კი არა ,ტრადიციულია,თუნდაც ხანგძლივი სატრანზიტო დროით ,კიდევაც ძვირი,მაგრამ შეჩვეული ჭირი-უსაფრთხო,ჩვენ რომ აქ 2008-ში ბომბები დაგვაყარეს ,ფოთის პორტში დაცლაზე მდგომ თურქეთიდან აზერბაიჯანისათვის გასაგზავნ კლინკერით(ცემენტის დასაფქვავავად გამზადებული ნახევარფაბრიკატია,ძვირფასი!) დატვირთულ გემს დაეცა,
გემი გადარჩა ,რამოდენიმე ფოთელი დოკერი დაიჭრა,ერთი ჭრილობით სამწუხაროდ გარდაიცვალა,კლინკერი კი სამი თვე რუსის ჯარმა აზერბაიჯანისაკენ არ გაატარა ,პორტი დაკეტილი იყო,კლინკერმა წვიმასა და ქარში დაკარგა სასაქონლო ღირებულება,ის "ჩაქრა",ზარალი მილიონები იყო ,ამის მერე აქ კლინკერი ათი წელია არავის უნახავს,აზერბაიჯანმა ის ირანისა და რუსეთისაგან მიიღო,უხარისხო ,კი,ძვირიც,მაგრამ ფოთის გავლით "ეშინია" ,ეს შიში გადამდებია,ამიტომ იკლებს ტვირთნაკადი,ანუ საქონელს ,რადგან ის ფულია,არ გვანდობენ !
რაღაც კარდინალურად უნდა შეცვალო,რომ დამატებით ან თავიდან გამოჩნდეს არატრადიციული და დაკარგული საქონელნაკადები ,დღეს მსოფლიო ეკონომიკის პროცესები უბიძგებს გემთმფლობელებს გააიაფონ საზღვაო ფრახტი,ანუ დიდი წყალშიგის გემებით ზიდონ გასაიაფებლად საქონელი ,ასეთს კი ღრმა პორტი სჭირდება ,ესაა გამოწვევა ,არ იზავ და ის ტრადიცია ასწლეულებით გადაივადებს ,გარდა ამისა თანამედროვე ღრმაწყლოვანი პორტები ,მაგალითად სინგაპურის,საფინანსო სავაჭრო ლოგისტიკური ჰაბია და არა დიდი და პატარა გემების მექანიკურად დამცლელდამტვირთველი საწარმო,ეს საქონლის რაოდენობითა და ღირებულებით დიდი პარტიებით გლობალური ვაჭრობის ეკონომიკური ინსტიტუტია, სადაც მიმდინარეობს ნედლეულისა და პროდუქციის გადამუშავების,ვაჭრობის უწყვეტი ჯაჭვი საბანკო ,სადაზღვევო ,სატესტო,საბირჟე და სავალუტე საბირჟე,სააქციო გარიგებებისა და ამ ყველაფრის კომბინაცია ერთად,ოღონდ მცირე ტერიტორიაზე ,ამას უმიზნებს ანაკლია ,ფოთი ასეთად ოცდაათი წლის წინ უნდა გვექცია,გემმისასვლელი წყლის დაღრმავებით კი არა ,საკანონმდებლო გარემოთი ,თანამედროვე და მსოფლიოსათვის აღიარებული წესებითა და ტრადიციებით,ჩვენ კი გვაქვს იქ საბჭოთა გარემო,მიუხედავად იმისა მფლობელები რომ ახლა კი არიან ამერიკელები ,მომხმარებელი ევროპელი,გარშემო კი ჩვენ -პოსტკომუნისტები, თუ ახლაც კომუნისტები ,ნაცქოცმოქკავშირი სატელიტებით : ბიზნესგარემო აქ დაუცველია,მაგალითად ,ბიზნეს ომბუდსმენი ფუთმარილნაჭამი ავტორიტეტიანი ბიზნესმენი უნდა იყოს სავაჭრო სამრეწველო პალატის წიაღიდან ,როგორც ამერიკაშია ,ეს ლექვინიძე კი ჩინოვნიკია,საშუალოზე დაბალი ჩინის,სამადლოდ,თავისუფალ " ვაკანსიაზე" გადაყვანილი სხვა სახელმწიფო სკამიდან, როგორ უნდა დაიცვას ბიზნესი მასზე სამი თავით მაღლა მდგომი ჩინოვნიკებისაგან,რომლებიც სწორედ იმისათვის ამაღლდნენ,ბიზნესს წაართვან სიკეთენი ? !
ისე, მინისტრთა კაბინეტში უმაღლესი რანგის ჩინოვნიკი მცირე და საშუალო ბიზნესის სააგენტოს დირექტორი- უპორთფელო მინისტრი ,ამერიკაში არის და მისი და ომბუდსმენის გარეშე ბიზნესს ვერავინ ეხება,აქ კი, "უპატრონოდ" გამდიდრება სიცოცხლისა და ჯანმრთელობისათვის მავნეა ,საშიშიც !
ამას,ჩვენსას, არ ესმის რომ ბიუროკრატია ფუნქციონალურად ებრძვის, კი არ არეგულირებს ბიზნესს,ეს ობხსს და ფინგანის მენტალური საბჭოთა რეციდივია,ამიტომაცაა "უპატრონოდ" გამდიდრება სიცოცხლისა და ჯანმრთელობისათვის აქ მავნე ,საშიშიც : წაგართმევენ სიმდიდრესაც,სიცოცხლესაც,ნუ ჯანმრთელობა თავისით წავა,მოგება არ მოვა ,გუგავა მოვა !
ისე, ორ ორი რომ გვავს ყველაფერი ,ამ შემთხვევაში თუ ამერიკაში ორია ბიზნესში მთავარი -სიამოვნებისა და მოგების მიღება,ჩვენთან ოთხია:ის ორი და კიდევ სიცოცხლისა და თავისუფლების შენარჩუნება !
სისტემის შეუცვლელად არ უწერია ეკონომიკას განვითარება,კანონებში წერია დღეს ,რომ ჩინოვნიკმა ბიზნესმენი უნდა დაიჭიროს,ეს ავალია ,ამასაა რომ ჩვენი მთავრობა 28 წელია ვერ თუ არ ხვდება !!
არ მოვა აქ საქონელი ,ჯერ,თუ მოვიდა,დაიხარკება და კიდევაც დაიკარგება !





იმედს ვიტოვებთ
30 მაისი 2019 16:24
ამაღამ რომელიმე ბაზრობა არ დაიწვება ამ თემის გადასაფარავად.

რედაქტორის რჩევით
როგორ აფასებთ საპენსიო რეფორმას?
თქვენი აზრი მნიშვნელოვანია!
როგორ აფასებთ საპენსიო რეფორმას?
თვის კითხვადი სტატიები