ვინ იყო პირველი ქართველი მამაკაცი, რომელმაც სილამაზის კონკურსში გაიმარჯვა?
28-03-2017
ვინ იყო პირველი ქართველი მამაკაცი, რომელმაც სილამაზის კონკურსში გაიმარჯვა?
"კოლია დიდი მექალთანე ყოფილა"

რეჟისორ გიორგი შალუტაშვილს საინტერესო თემები არ ელევა. ამჯერად თავისი ბებიის, ოლგა გელაშვილის მონათხრობი გაიხსენა. ეს უკანასკნელი თავად შესწრებია კონკრეტულ ამბავს:

- სამწუხაროდ, დამადასტურებელი დოკუმენტი არ მაქვს, მაგრამ კარგად მახსოვს, ბებიამ რომ გვიამბო XX საუკუნის დასაწყისში, სავარაუდოდ, 1910-15 წლებში, პეტერბურგში გამართულ მამაკაცებს შორის სილამაზის კონკურსზე. კონკურსი რუსეთის იმპერიის მასშტაბით ჩატარებულა, ეს კი, ფაქტობრივად, ევროპის კონკურსს უტოლდებოდა, რადგან იმხანად პოლონეთიც, ბალტიისპირეთის ქვეყნებიც, ფინეთიც, კავკასიაც და კიდევ რამდენიმე ქვეყანა
რუსეთის იმპერიაში შედიოდა. ამ კონკურსში პირველი ადგილი აუღია ოსი წარმომავლობის მამაკაცს, მეორე ადგილზე კი ქართველი ნიკოლოზ (კოლია) გველესიანი გასულა. ამაზე მთელი ბორჯომის ხეობა ლაპარაკობდა.

- რატომ მაინცდამაინც ბორჯომის ხეობა?
- კოლიას ბიძაშვილი - ჩემი დიდი ბებია, ანუ ბებია ოლგას დედა აგრაფინა გველესიანი წაღვერში იყო გათხოვილი,
თვითონ კოლია გველესიანი კი სოფელ შროშიდან იყო და ხაშურში თუ გორში ცხოვრობდა. ბიძაშვილებს დიდი სიყვარული და არაჩვეულებრივი ურთიერთობა ჰქონიათ და კოლიაც ხშირად სტუმრობდა აგრაფინას. მაღალი, საოცრად წარმოსადეგი, ახოვანი კაცი ყოფილა. ბებია გვიყვებოდა: ჩვენთან რომ მოვიდოდა, ბავშვები გატრუნულები, მოწიწებით შევცქეროდით. მაგრამ თუ რამეზე გულიანად გადავიხარხარებდით, იმ წუთას მკაცრად გადმოგვხედავდა და შენიშვნას მოგვცემდა: პირდაღებული რომ იცინით, ნაოჭები გაგიჩნდებათ და ძალიან მალე დაბერდებითო.

კოლია დიდი მექალთანე ყოფილა. ბორჯომში თქმულებასავით ჰყვებოდნენ: როდესაც გზაზე ნაბად შემოხურული მამაკაცი გაივლის, ნაბდის ქვეშ კი სამი წყვილი ფეხი მოსჩანს, არ უნდა შეგეშინდეს, - უნდა მიხვდე, რომ კოლია გველესიანი მოდის, აქეთ-იქით კი ქალები ჰყავს ჩახუტებულიო.

ოლგა ბებია გულისტკივილით იხსენებდა, ჭაკებმა (ქალებს გულისხმობდა) დამიღუპეს ბიძაო. "ჭაკებს" ბებია კოლიასგან დაფეხმძიმებულ შვიდ ქალს უწოდებდა, ბიძამისს სასამართლოში რომ უჩივლეს. მართალია, ხაშურის სასამართლომ კოლია, რომელიც ქალებს არაფერს დაჰპირებია და არავინ მოუტყუებია, გაამართლა, მას განაჩენი ერთ-ერთმა საყვარელმა გამოუტანა: მოწამლა. იმხანად კოლია გველესიანი 30-35 წლისა იყო. სამწუხაროდ, ამ კაცზე მეტი არაფერი ვიცით, მხოლოდ ერთადერთი ფოტო შემოგვრჩა. თუ ვინმე დამატებით ინფორმაციას მოგვაწვდის, ძალიან დაგვავალებს.

ესაუბრა ირმა ხარშილაძე

ირმა
30 მარტი 2017 00:45
ლიას
გამარჯობა, ქალბატონო ლია. თუკი უფრო დაწვრილებით შეგიძლიათ თქვენი მეუღლის ბაბუის შესახებ რაიმე მიამბოთ და ფოტო ან ფოტოებიც გაქვთ, იქნებ დამიკავშირდეთ რედაქციაში და თქვენი მობილურის ნომერი დამიტოვოთ.
პატივისცემით, ირმა ხარშილაძე.
Napoleoni
29 მარტი 2017 20:53
levan meore dadiani gamogrcha .naxevari imereti rom amowyvita da meore naxebvari stambolshi rom daalombarda. . .uiratesni xart ratqmaunda. . .soxumi ki davkarget magram smgierod tbilisi xom avigeto xo amyobt. .
ლია
29 მარტი 2017 16:16
ოდესაში სამედიცინო ინსტიტუტის ფარმაცეტიულ ფაკულტეტზე სწავლობდა ჩემი მეუღლის ბაბუა ალექსანდრე მელქაძე და მიღებული აქვს სილამაზის კონკურსში გამარჯვებულის ტიტული, ეს იყო 1890-იან წლებში, რომელმაც მერე ბათუმში გახსნა ალბათ, ერთ-ერთი პირველი აფთიაქი

რედაქტორის რჩევით