"ბატონო ბიძინა, თუ სამართალი არ იზეიმებს, ყველაფერი წყალში ჩაიყრება"
"ბატონო ბიძინა, თუ სამართალი არ იზეიმებს, ყველაფერი წყალში ჩაიყრება"
"ჩვენი საქმის განხილვას ყოფილ პროკურორებს  და მოსამართლეებს ავალებენ და ხომ ხვდებით, ისინი რასაც იზამენ?"

"დავბრუნდი საქართველოში, მაგრამ ჩემს სახლში ვერა, რადგან 1 ლარად გაყიდულა"

"მათ მხოლოდ ქონება კი არ წაგვართვეს, ხელის ერთი მოსმით სიცოცხლე წაგვიშალეს"


როგორ აღმოჩნდა სააკაშვილის ხელისუფლებაში მოსვლიდან რამდენიმე თვეში ყოფილი ვიცე-პრემიერის (1993-1994 წწ.), ამირან ქადაგიშვილის ოჯახი ციხეში და მათი ქონება კი სახელმწიფოს ხელში, რის გამო გახდა ქადაგიშვილების ოჯახი სააკაშვილის ხელისუფლების სამიზნე და რისი იმედი აქვთ მათ ახალი
ხელისუფლებისგან, ამის შესახებ "კვირის პალიტრას" ყოფილი ვიცე-პრემიერის ვაჟი, "გამაბანკის" ყოფილი გენერალური დირექტორი და პოლიტდევნილი გიორგი ქადაგიშვილი ექსკლუზიურად ესაუბრა:


- ალბათ, არსებობდა სია იმ ობიექტებისა, რომლებიც "ნაციონალურ მოძრაობას" უნდა დაერეკეტებინა. ჩვენ პირველი აღმოვჩნდით და სამაგალითოდ, ყველასთვის საჩვენებლად დავისაჯეთ. ჩემი ძმა, არჩილი, "გამაბანკის" საბჭოს თავმჯდომარე გახლდათ. ჩვენი
ფირმა, შპს "ასამი", "გამაბანკის" 33%-იანი წილის მფლობელი იყო, 51%-ის მფლობელები კი უცხოელები იყვნენ.

"გამაბანკის"გენერალურ დირექტორად ორი თვის დანიშნული ვიყავი, როცა ბანკში პროკურატურა შემოვიდა, 10 მილიარდი ევრო გაათეთრეთო. მაშინ საქართველოში 28 ბანკი იყო და ყველა რომ გაფიცულიყო, მთავრობაც მიხვდებოდა, რომ კერძო ბანკთან თავხედობა არ გაუვიდოდა. თავიდანვე გვითხრეს, გადაიხადეთ 20 მლნ დოლარი და საქმე დაიხურებაო, მაგრამ ამდენ ფულს საიდან გადავუხდიდით?

ახალი დაქორწინებული ვიყავი და  კოჯორში ვისვენებდით. თანამშრომელმა დამირეკა, ბანკსა და თანამშრომლების სახლებში პროკურორები შემოგვიცვივდნენო. მშობლებთან დავრეკე და დედის ნაცვლად პროკურორმა ქალმა მიპასუხა, წარმოგვიდგინეთ თქვენი თავიო. მივხვდი, რომ მშობლების ბინა ალყაში იყო.

"გამაბანკს" იურიდიულ მომსახურებას ფირმა "პარტნიორი" (რომლის დამფიძნებელი დავით სააკაშვილია) უწევდა და იქ მივედი. "პარტნიორის" დირექტორმა ლევან პატეიშვილმა, რომელიც ჩემთან საუბრის პარალელურად პროკურორებს ეკონტაქტებოდა, მითხრა, მეუბნებიან, თუ ორივე ძმა არ ჩაგვბარდება, მშობლებს დავაკავებთო. ჩემი ძმა იმ პირობით ჩაბარდათ, რომ მშობლებს არ დაიჭერდნენ. ვფიქრობდი, რომ ეს აბსურდი მალე დასრულდებოდა. 11-მილიონიანი კაპიტალის მქონე ბანკს, რომ 10 მილიარდი ევროს (ერთ საბანკო დღეში) გათეთრებას დააბრალებ, ძალიან ალოგიკურია. 

შინ დავრეკე. მიუხედავად იმისა, რომ სახლი სპეცრაზმელებით იყო სავსე, დედამ მოასწრო ტელეფონის აღება და მითხრა, მამაც დააკავეს და შენი ძმაცო. მივხვდი, რომ "პარტნიორი" ჩვენს საწინააღმდეგოდ პროკურატურასთან თანამშრომლობდა. ჩემი ოჯახის წევრების გარდა, ბანკის 7 თანამშრომელი დააკავეს. მათ აღიარეს ფულს ვათეთრებდითო.

- თქვენ როგორ გადაურჩით დაკავებას?
- როდესაც დედამ მითხრა, ძმაც და მამაც დააკავესო, მოვასწარი "პარტნიორის" ოფისიდან გაქცევა. თაფლობის თვეში ძებნილად ვიქეცი. ერთხანს საქართველოში ვიმალებოდი. პირველი სამი თვე შოკი და დეპრესია მქონდა. ისეთი განცდა მქონდა, გრიგალმა გადამიარა-მეთქი. ამასობაში გავიგე, რომ დედაც დააპატიმრეს. პროკურატურას შევუთვალე, ოღონდ დედა გამოუშვით და მე ჩაგბარდებით-მეთქი, მაგრამ პასუხი ვერ მივიღე.

- დედა რა მოტივით დააკავეს?
- გამოძიებას ხელს უშლისო. 5 თვის მერე დარწმუნდნენ, რომ ის თანხები, რასაც ითხოვდნენ, არ გვქონდა. ჩვენი უცხოელი პარტნიორები ჩამოვიდნენ. გეხსომებათ, სპეციალური ანგარიში იყო გახსნილი, სადაც ბიზნესმენებს ფულს არიცხვინებდნენ. უცხოელები თანახმა იყვნენ,  3 მლნ დოლარი ჩაერიცხათ ამ ანგარიშზე. სამაგიეროდ, ბანკს დაუბრუნდებოდა ლიცენზია და ჩვენც გაგვათავისუფლებდნენ. პარალელურად, ჩვენთან მოლაპარაკებას მართავდნენ, რომ 33% დაგვეთმო უცხოელი პარტნიორებისთვის და ისინი 84%-ის მფლობელები გახდებოდნენ.

როგორც კი ბანკს ლიცენზია აღუდგებოდა, ჩვენს პარტნიორებს საწესდებო კაპიტალი - 11 მლნ დოლარი უნდა ჩაერიცხათ. ჩვენმა პატრნიორებმა სიფრთხილე გამოიჩინეს და 11 მლნ "გამაბანკის" საკორესპონდენტო ანგარიშზე რუსეთში ჩარიცხეს. ჩვენი პროკურატურიდან ინკასო გაგზავნეს, ანგარიშის გაყინვა და ფულის თბილისში გადარიცხვა მოითხოვეს. მაგრამ რუსეთიდან ამ თანხის წამოღება ვერ მოხერხდა. დაკარგეს 11 მლნ-იც და 3 მლნ-იც, რაზეც სულ გადაირივნენ. ჩვენმა პატრნიორებმა თქვეს, საქართველოს გაგონებაც არ გვინდაო და ქვეყნიდან წავიდნენ. დედა ციხიდნ 5 თვეში გამოუშვეს 85 ათასი ლარის გირაოთი. ამ თანხის შესაგროვებლად ყველაფერი გავყიდეთ. მამას 11 წელი მიუსაჯეს, მაგრამ 8 წელი და 4 თვე იჯდა, ჩემმა ძმამ 5 წელი მოიხადა, მე კი 8 წელი და 6 თვე ვიძებნებოდი. პირველი ინსტანციის სასამართლომ დაუსწრებლად მომისაჯა 22 წელი.
მას შემდეგ დავბრუნდი, რაც პარლამენტმა პოლიტდევნილად მაღიარა. დავბრუნდი საქართველოში, მაგრამ ჩემს სახლში ვერა, რადგან 1 ლარად გაყიდულა.

რომ გაიგეს, ჩემი ოჯახი სტრასბურგში ჩიოდა "ნაციონალები" მიხვდნენ, რომ ამ საქმეს წააგებდნენ და ჩვენი ახლობლის საშუალებით შემოგვითვალეს, მოვრიგდეთო, მაგრამ დედამ უარი უთხრა. ისეთ მდგომარეობამდე მიგვიყვანეს, ჩვენი ოჯახიდან ერთი წევრიც რომ არ დარჩენილიყო ცოცხალი, მათთან მაინც არ მოვრიგდებოდით. 

- 22 წელი თქვენ რა დანაშაულისთვის მოგისაჯეს?
- ბრალი დამდეს 5 მუხლით, რაც გულისხმობდა თანამდებობის ბოროტად გამოყენებას, ფულის გათეთრებასა და ჯგუფურ თაღლითობას. 8 წელია ველოდები ჩემს სასამართლო პროცესს მეორე ინსტანციის სასამართლოში, მაგრამ ამაოდ. დღეს სასამართლოს მოსამართლეა გიორგი სულაკაძე, ფირმა "პარტნიორის" ყოფილი იურისტი, რომელიც ჩვენს წინააღმდეგ მოქმედებდა. ჩემი ოჯახის პროკურორი თამარ ალანია ჯერ მოსამართლედ გადავიდა, ახლა კი იუსტიციის საბჭოშია. ის ადამიანი კი, რომელსაც ჩემი ოჯახი სტრასბურგში უჩივის, დღეს დააწინაურეს. 

ჩვენ დღეს მორიგება გვინდა სახელმწიფოსთან, მაგრამ გვითხრეს, 7 თვეში შეიქმნება კომისია, რომელიც თქვენს საქმეს განიხილავსო. ვითხოვთ სახელმწიფომ ის ქონება მაინც დაგვიბრუნოს, რაც 1 ლარად არ არის გაყიდული - აგარაკი მანგლისში, ბანკის ოფისი მეტრო "მარჯანიშვილთან", მაგრამ გვეუბნებიან, კომისიას უნდა დაელოდოთო.

კულუარულად ვიცით, რომ ეს კომისია ჯერ იმ საქმეებს განიხილავს, რაზეც კომპენსაციას არ ითხოვენ და მხოლოდ მერე დაიწყება ჩვენი საქმეების მსგავსი საქმეების განხილვა. სულ 30 ათას საქმეზეა ლაპარაკი და ამას, ალბათ, წლები დასჭირდება. ჩვენი საქმის განხილვას ყოფილ პროკურორებს და მოსამართლეებს ავალებენ და ხომ ხვდებით, ისინი რასაც იზამენ?

ბატონო ბიძინა, თქვენ ის კადრები გყავთ, რომელთაც მხოლოდ ქონება კი არ წაგვართვეს, ხელის ერთი მოსმით სიცოცხლე წაგვიშალეს. თუ სამართალი არ იზეიმებს, ყველაფერი წყალში ჩაიყრება.

(სპეციალურად საიტისთვის)
მკითხველის კომენტარი (27)
მეგი
04 მაისი 2014 10:09
ჩემი ოჯახის წევრების გარდა, ბანკის 7 თანამშრომელი დააკავეს. მათ აღიარეს ფულს ვათეთრებდითო
თვითონვე აღიარებს!!!
ქართველი
04 აგვისტო 2013 13:41
საინტერესოა თუ კითხულობენ ასეთ სტატიებს ნაცების და მათი დორბლიანი მეთაურის გადამკვდარი ფანები.ხალხო ყველაფერს ვარდისფერი სათვალიდან რომ უყურებდით და საამური გეგონათ ეს ცხოვრება,ხედავთ როგორ ამწარებდნენ ოჯახებს? დედებს და მამებს უჭერდნენ ხალხს, რომ თვითონ ჩაბარებულიყვნენ სანაცვლოდ და მერე მათი მეთოდებით აღიარებითი ჩვენებები ჩამოერთვათ და რუსთავი2 ზე შოუები დაედგათ.გამოფხიზლდით თუ ვინმეს გჯეროდათ ან სამწუხაროდ კიდევ გჯერათ
daviti
03 აგვისტო 2013 22:32
მინდა გკითხოთ, თქვენ მანამდე კავკასიის ბირჟასთან რა კავშირი გქონდათ.მაქვს გარკვეული ინფორმაცია და მინდა თქვენგან ამის გაგება.
batonebs amirans da giorgis-megzurisagan
02 აგვისტო 2013 16:56
ბატონებო, რატომ გვაბოლებთ: ბანკის სტატუსისათვის
ეროვნული ბანკის მოთხოვნით ორი და სამი ფილიალი არაა
საკმარისი, მეორე მოგვიყევით საიდან ჰქონდა თქვენს
ბანკს საინვესტიციო თანხები??? შემოსავალი საიდან
ბატონებო ...
ის რასაც თქვენ ყვებით არის უბრალო ობივატელებისათვის
ის რომ ნაციონალების ქმედებები იფილტრებოდა წამყვანი
ქვეყვების დიპლომატების მიერ მრავალმა ვიცით, აქედამ
გამომდინარე თქვენ ბუზს-აც ვერ აგიფრენდნენ რომ
პატიოსნები ყოფილიყავით......
ამირან ქადაგიშვილი
01 აგვისტო 2013 17:27
მაგრამ, რაც მთავარია ეს სულაც არ არის ბანკის საქმიანობის მთავარი ნიშნები. მაგალითად, ამერიკის შეერთებული შტატებში ბანკები ორ კატეგორიად იყოფა: საინვესტიციო ბანკები და უშუალოდ კომერციული ბანკები. კომერციული ბანკების მთავარი ფუნქცია არის კლიენტების ანგარიშების მართვა, ზუსტად ეს იყო გამაბანკის საქმიანობის მნიშვნელოვანი ნაწილი.
რაც შეეხება "ფულის გათეთრებას" ადეიშვილის პროკურატურა იმდენად არაკომპეტენტური აღმოჩნდა, რომ გამაბანკს დააბრალა ერთ საბანკო დღეში 10 მილიარდი ევროს გათეთრება, როცა სვიფტ-ის მაშინდელი მონაცემებით მსოფლიოს მთელი საბანკო ბრუნვა დღე-ღამეში შეადგენდა დაახლოებით 6 მილიარდ ამერიკულ დოლარს.
რა თქმა უნდა ვერც ერთი ბრალდება ვერ დამტკიცდა იურიდიულად, რდგან საქმე შეთითხნილია და ეს "დანაშაულები" ბუნებაში საერთოდ არ არსებობს. ამის გამო ჩვენი საჩივარი ეხლა იხილება სტრასბურგის სასამართლოში და იმედია, მართლა სამართლიანი განაჩენი სულ მალე გამოცხადდება.
ამირან ქადაგიშვილი
01 აგვისტო 2013 17:12
ბატონი megzuri-ს საყურადღებოდ:
უნდა მიგითოთ რომ არ ფლობთ სწორ ინფორმაციას გამაბანკის შრსახებ. საინტერესოა საიდან მოიტანეთ ეს თქვენი ჩამონათვალი? ამასთან ბანკის სპეციალისტებთან რომ აპელირებთ, თქვენ თითონ არ გესმით საბანკო სპეციფიკა და ამიტომ არასწორ მონაცემების საფუძველზე კიდე უფრო არასწორ დასკვნას აკეთებთ.
1. გამაბანკს მეანაბრეები ჰყავდა, მიუხედავათ იმისა რომ საბანკო ბაზარი უკვე გადანაწილებული იყო ადმინისტრაციულად და აქ საბაზრო ეკონომიკის სუნიც კი არ იყო.
2. გამაბანკმა პირველად საქართველოში შემიღო სამომხარებლო კრედიტის ცნება (რომელსაც დღეისათვის სარფიანათ იყენებს უკვე ყველა ქართული ბანკი)და ათასზე მეტ მოქალაქეზე გაცემული ჰქონდა სამომხმარებლო სესხი. გარდა ამისა კომერციული სესხების პორტფელი რაოდენობრივად აჭარბებდა მილიონ ამერიკულ დოლარს.
3. გამაბანკის სათაო ოფისი მდებარეობდა თბილისში,
დ.აღმაშენებლის გამზირზე სადაც ჰქონდა ყველანაირი ინფრასტრუქტურა, მათ შორის დაცვის ყველა მოთხოვნის დაკმაყოფილებული ფულის საცავი, რომლის გარეშე ეროვნული ბანკი საბანკო ლიცენზიას არ შეუნარჩუნებდა. ასევე მას ჰქონდა 2 ფილიალი თბილისში და ერთი სამტრედიაში, ამზადებდა ასევე ფილიალების გახსნას რუსთავში, მცხეთაში ქუთაისში. მიდიოდა მოლაპარაკება რომ ფილიალი გაეხსნა სოხუმში, თუმცა უშედეგოდ დასრულდა. თანამშრომელი ჰყავდა 30-მდე.
მაგრამ,
გიორგი ქადაგიშვილი
01 აგვისტო 2013 16:08
ბატონებო მოგახსენებთ რომ ბანკი თუ კრედიტებს არ გასცემს მას ვერ ექნება ნორმალური საკრედიტო პორტფელი და როგორც შედეგი დაერღვევა რამდენიმე კოიფიციენტი. ამის შედეგად მას შეუმცირდება კატეგორია, რასაც უკვე მოყვება ეროვნული ბანკის მხრიდან დროებითი ადმინისტრატორის იძულებით დანიშვნა. ეროვნული ბანკი ამას მკაცრად აკონტროლებდა და „გამაბანკს“ ამაში დამიჯერეთ არანაირი შეღავათები არ უკეთდებოდა! მინდა გითხრად, რომ საქართველოში პირველად ს.ს. “გამაბანკ“-ში დავნერგეთ სამომხმარებლო სესხების (განვადების) სისტემა - სამომხმარებლო კრედიტები. დღესაც სიამაყით ვიხსენებთ, თუ რამხელა მასშტაბის აჟიოტაჟი გამოიწვია ამ ნოვაციამ საზოგადოებაში (მომხმარებლებში). კერძოდ, კი ს.ს. “გამაბანკ“-ს იმდენი ხალხი მოაწყდა, რომ მენეჯმენიტი ვერ აუდიოდა მომსახურებას, რიგი იდგა ბანკის შიგნით და მის გარე ტერიტორიაზე. განვადების სისტემამ გაამართლა. შემდეგ წელს სხვა ბანკებმაც დანერგეს ანალოგიური სისტემა, მექანიზმიც პრაქტიკულად იგივე იყო თავიდან, ხოლო შემდეგ დაიხვეწა.
თქვენს კითხვაზე გეტყვით რომ გამაბანკს 2002 წელში შეეცვალა დამფუძნებლები განხორციელებული ინვესტიციის შედეგად და ბანკმა აქტიურად დაიწყო განვითარება. არასრულ ორ წელიწადში ბანკმა გახსნა ორი ფილიალი და აგრძელებდა განვითარებას. ამავე პერიოდის განმავლობაში ეროვნული ბანკის რეიტინგით ბანკმა აიწია მე-13 პოზიციაზე. (იმ ეტაპზე საქართველოში სულ იყო 28 ბანკი). მთლიანად გამაბანკში დასაქმებული იყო 70 ადამიანი.
რაც შეეხება ფულის გათეთრებას ჩემი რეკომენდაცია იქნება კარგათ შეისწავლოთ საერთაშორისო კანონმდებლობა თუ რა დეფინიცია აქვს „ფულის გათეთრებას“ და მერე მოგვევლინოთ საერთაშორისო იურისპრუდენციის მცოდნე ექსპერტად.
პატივისცემით
გიორგი ქადაგიშვილი
megzuri
01 აგვისტო 2013 03:18
ბატონებო, ის რაც იქნა კომენტირებული გასგებია ვის
წისქვილზე ასხავს წყალს და რა მიზანს ემსახურება...
1-ლი მოგვახსენონ ბატონებმა რამდენი მეანაბრე ყავდა
თქვენს ბანკს?? და ყავდა კი საერთოდ
2-ე რა რაოდენობის კრედიტები და ვისზე ქონდა
გაცემული თქვენს ბანკს?? და ქონდა გაცემული საერთოდ??
3-ე რამდენს აქ კომენტატორს შეუძლია თქვქს სად ჰქონდა
ფილიალები "გამა ბანკს" სად იყო სათაო ოფისი და
რამდენი თანამშრომელი ჰყავდა მთლიანად???
თუ ბანკი არ იძლევა კრედიტებს და არ ყავს მეანაბრეები ..ფაქტია ის მუშაობს ფულის გათეთრებაზე ეს კი კანონსაწინაამდეგო ქმედებაა.. ამას გეტყვით ნებისმიერი ბანკის ნებისმიერი თანამშრომელი...
და ბოლოს ასეთ ქნედებებს სასამართლო ამატებს
პირადი ქონების კონფისკაციას ბიუჯეტის სასარგებლოდ
ასე რომ თქვენმა საქმემ უნდა სასამართლოს ყველა
ინსტანცია და მერე სტრასბურგი..
archil
30 ივლისი 2013 17:50
ბევრის კომენტარებიდან ჩანს თუ ვინმეს რამე გააჩნია, ყველამ ხალხს წაართვა, ზედმეტი ჰაერი უსუნთქავს და უნდა დავიჭიროთ, ქონებას კი მთავრობა გადაინაწილებს, ხალხს კი ვირის თავფეხი.
Guy Fox
29 ივლისი 2013 15:53
აქ ბევრი ნაციონალი იტყუება და ცილს წამებს ამ ხალხს !
არშეიძლება ამდენი წლის განმავლობაში იძახდე რომ ქურდები არიან და მომპარესო ! თუ ქურდები არიან და მოიპარეს ამდენი ფული!? მაშინ რატო ცხოვრობენ ნაქირავებში ქადაგიშვილები? და სადწავიდა ის ქონება და ვის ხელშია ის ქონება დღესაც! იქნებ ამას მაინც გაუსწოროთ თვალი...

რუბრიკის სხვა სიახლეები
როგორ აფასებთ საპენსიო რეფორმას?
თქვენი აზრი მნიშვნელოვანია!
როგორ აფასებთ საპენსიო რეფორმას?
თვის კითხვადი სტატიები