მოსმენები ისევ გრძელდება? - კვირის პალიტრა

მოსმენები ისევ გრძელდება?

საზოგადოების ნაწილი მიიჩნევს, რომ ახალი მთავრობა ძველი ხელისუფლების პრაქტიკას აგრძელებს -”ჩვენ ისევ გვისმენენ? ამის გამო ზოგიერთი არასამთავრობო ორგანიზაცია ხელისუფლებისგან პარლამენტში თავიანთი კანონპროექტის განხილვის დაჩქარებას ითხოვს. "ნაციონალებმა" არასამთავრობოებს მხარდაჭერა გამოუცხადეს და იმის დასამტკიცებლად, რომ მთავრობა უარს არ ამბობს ფარულ მიყურადებაზე, გიგი უგულავასა და მისი შვილის ის საუბარი მოიყვანეს, რომელიც პროკურატურას უგულავას საქმეში ჰქონდა გამოყენებული. ამ საკითხზე "კვირის პალიტრა" შს მინისტრის მოადგილე ლევან იზორიასა და პარლამენტში შეტანილი კანონპროექტის ერთ-ერთ ავტორს, ლაშა ტუღუშს ესაუბრა:

ლევან იზორია, შს მინისტრის მოადგილე: - სამოქალაქო სექტორის წამოწყებული კამპანია "ისევ ისმენენ" არაერთგზის გავაკრიტიკე. კანონპროექტის, რომელიც პარლამენტში შარშან შეიტანეს, განხილვა არ დაიწყო და მათ მიიჩნიეს, რომ ფარული მიყურადება ისევ გრძელდება. სხვათა შორის, კანონპროექტის მომზადებისას ჩვენთვის არაფერი უკითხავთ, არადა უწყებას კრიტიკული შენიშვნები ჰქონდა.

- რა შენიშვნები აქვს შსს-ს, გარდა იმისა, რომ კანონპროექტის მომზადებაში არ ჩართეს?

- კანონპროექტში არის პრინციპული საკითხები, რომლის გაუთვალისწინებლობის შემთხვევაში ქვეყნის უსაფრთხოებას ექმნება საფრთხე. არასამთავრობოების ინიციატივა ეხებოდა "ოპერატიული სამძებრო საქმიანობის შესახებ" კანონის მე-14 მუხლის ერთ-ერთ ქვეპუნქტს, სადაც წერია, რომ შსს მუდმივად არის მიერთებული პროვაიდერთან, რომელსაც კანონიერი მიყურადებისთვის იყენებს, ანუ სერვერი გვაქვს დამონტაჟებული მობილურ კომპანიებში, ეს კი არ ეწინააღმდეგება საერთაშორისო სტანდარტებს. კანონპროექტის ავტორებს სურთ საიდუმლო ინფორმაცია ხელმისაწვდომი იყოს მობილური ოპერატორებისთვის. მაგალითად, ოფიციალურმა ორგანომ ინფორმაცია მიიღო ტერორისტების მოქმედებაზე.

მათი ლოგიკით, ეს წინასწარ უნდა შევატყობინოთ პროვაიდერებს, გავანდოთ საიდუმლო ინფორმაცია და შემდგომ გვექნება მოსმენის საშუალება. ვინ არის დაზღვეული, რომ ამ ინფორმაციას არ გაყიდიან ან შემთხვევით არ გაახმაურებენ კერძო კომპანიები?

- არასამთავრობოების ინფორმაციით, მოსამართლის თანხმობა ფარულ მიყურადებაზე არ არის საჭირო. თუკი ასეა, მაშინ რით ვართ დაზღვეული, რომ ვინმეს ხელი არ წასცდება უკანონო მოსმენაზე დღესაც?

- გადაუდებელ შემთხვევებში, 12 საათის განმავლობაში უნდა გაიცეს პროკურატურის ნებართვა, ხოლო 12 საათის შემდეგ კი აუცილებელია მოსამართლის ბრძანება. ვმუშაობთ რამდენიმე მოდელზე, რომელთა წყალობით შევძლებთ როგორც შიდა, ისე გარე კონტროლის დაწესებას. შიდა კონტროლისთვის გვინდა ბიომეტრიული კონტროლი შემოვიღოთ - ანუ

უფლებამოსილი პირი თითის ანაბეჭდის გარეშე ვერც ერთ აპარატს ვერ მიეკარება. ანაბეჭდი დაფიქსირდება, იქვე ჩნდება ჩანაწერი და ოქმი შედგება.

გარე კონტროლის მექანიზმებზე კი  ექსპერტების დასკვნის შემდეგ საზოგადოებას ამომწურავ ინფორმაციას მივაწვდით.

- სამოქალაქო სექტორის წარმომადგენლები თვლიან, რომ ძველი ხელისუფლების პრაქტიკა, როცა სასტუმროებში დამონტაჟებული აპარატურით უსმენდნენ და უღებდნენ  ობიექტს, დღემდე გრძელდება და ამ უკანონობის შემსრულებელნი ისევ იმავე სტრუქტურებში მუშაობენ.

- ბატონი ტუღუში თავად იყო იმ კომისიაში, რომელიც უკანონო ჩანაწერების გასანადგურებლად შეიქმნა. კომისიამ რეკომენდაციებიც მიიღო, რომ 28 ათასი ფაილი გადაეცემოდა პროკურატურას და მიმდინარეობს ბევრი საქმის მოკვლევა. ვარაუდით ხომ ვერ მივადგებით სასტუმროების მფლობელებსა და დავდებთ ბრალს. რაც შეეხება იმ პირებს, რომლებიც დანაშაულს სჩადიოდნენ და დღემდე მუშაობენ უწყებაში,  მერწმუნეთ, გამოვლენილები დასჯილი არიან და ნებისმიერი, ვისი ბრალეულობაც დამტკიცდება, ისიც კანონის მიხედვით აგებს პასუხს.

- როგორც ლაშა ტუღუში ამბობს, მას შემდეგ, რაც კამპანია "ისევ გვისმენენ" დაიწყო, გახშირდა უცნაური ხმები მის ტელეფონში. შესაძლებელია კერძო პირებსაც ჰქონდეთ მოსასმენი აპარატურა?

- ტექნოლოგიურად შესაძლებელია რადიოსიხშირით სხვისი სატელეფონო საუბრის დაჭერა, თუმცა ასეთი აპარატი არასდროს მინახავს.

- თქვენ ერთ-ერთ ინტერვიუში ბრძანეთ, რომ ამ საკითხზე სამოქალაქო სექტორის გააქტიურებას პოლიტიკური სარჩული აქვს.

- "ნაციონალებმა" უკვე დააყენეს ბიუროს სხდომაზე არასამთავრობო ორგანიზაციების კანონპროექტის გატანის საკითხი. სწორედ მათი გააქტიურება მაეჭვებს, რომ ამ ინიციატივას პოლიტიკური სარჩული აქვს.

ლაშა ტუღუში, კანონპროექტის ერთ-ერთი ავტორი: - მიზეზი, რატომაც დაიწყო ეს მოძრაობა, ის არის, რომ ძალიან გაჭიანურდა პარლამენტში უკანონო მოსმენების შესახებ რეგულაციების დაწესების შესახებ ჩვენი კანონპროექტის განხილვა. ჩვენ ვიცით, როგორ იყენებდა წინა ხელისუფლება მოსმენების დღევანდელ მოდელს. ამიტომ აუცილებელია, რომ ქვეყანაში არსებობდეს უკეთესი საკანონმდებლო ჩარჩო, რათა ადამიანის პირადი ცხოვრება დაცული იყოს და არ ვიყოთ დამოკიდებული ჩინოვნიკების კეთილ ნებაზე და პოლიციის სიტყვაზე, რომ კარგი ხალხი არიან და უკანონობას არ ჩაიდენენ.

კანონპროექტების პაკეტი ხელისუფლებას შარშან შევთავაზეთ. ის მოიწონა პარლამენტმაც და საერთაშორისო ექსპერტებმაც. თუ ბატონი იზორია არ იზიარებს ევროსაბჭოს ექსპერტთა დასკვნას, ეს მისი პრობლემაა და არა ჩვენი.

- თქვენი კანონპროექტი ხომ არ შეუქმნის საფრთხეს ქვეყნის უსაფრთხოებას? შსს სწორედ ამაზე აკეთებს აქცენტს.

- ჩვენ ეს მოდელი დასავლეთის ქვეყნებისგან გვაქვს აღებული. დასავლეთში უწყების წარმომადგენელს მოსმენის შესახებ გადაწყვეტილება მობილურ ოპერატორებთან მიაქვს, ღილაკს ხელს კომპანია აჭერს და არა სამინისტროში ვისაც მოესურვება. ამის შემდეგ შედგება ოქმი, რათა შემდეგ შემოწმდეს, საქმისთვის იყო საჭირო თუ არა მოსმენა. დღეს არანაირი გარე და შიდა კონტროლი არ არსებობს და ეს არის ჩვენი უკმაყოფილების მიზეზი.

- როგორც ვიცი, სასამართლოს გადაწყვეტილებაა საჭირო, რომ ოფიციალურმა უწყებამ კონკრეტულ პირს მოუსმინოს.

- შეიძლება სასამართლო ნებართვას მართლაც იძლევა, მაგრამ კომპანიას არაფერს ეკითხებიან, პირდაპირ რთავენ მოსმენას. დიახ, შავი ყუთი შსს-სთან უნდა იყოს მიერთებული, მაგრამ ხელმისაწვდომობა თვითნებურად არ უნდა ჰქონდეს.

- როგორც შს მინისტრის მოადგილე ამბობს, თქვენი აქტიურობა პოლიტიკურად არის მოტივირებული.

- ჩვენი ბრალი არ არის, რომ "ნაციონალური მოძრაობა" თავის დანაშაულს ხელისუფლებას აბრალებს. ეს იმის ბრალია, რომ ხელისუფლება ვერ რეაგირებს დროულად და რაც დრო გავა, მით მეტად გამრავლდება ბრალდებები.

უტა ბიწაძე