"თეონამ ჯერ არაფერი იცის..." - ვინ იყო 24 წლის ბიჭი, ვინც ჩვილ შვილებთან ერთად ემსხვერპლა ავარიას? - კვირის პალიტრა

"თეონამ ჯერ არაფერი იცის..." - ვინ იყო 24 წლის ბიჭი, ვინც ჩვილ შვილებთან ერთად ემსხვერპლა ავარიას?

"მიმი ბავშვების გამო ისე ღელავდა, გოგონები სავადმყოფოდან რომ გამოიყვანეს, სულ ჩახუტებული დაჰყავდა"

ბათუმი-ქობულეთის შემოვლით გზაზე მომხდარმა ავტოკატასტროფამ, რა დროსაც მამა და 6 თვის ტყუპი გოგონები დაიღუპნენ, მთელი ქვეყანა შოკში ჩააგდო. უკიდირესად სავალალოა ქვეყანაში ავტოკატასტროფების სტატისტიკა, ასევე ავარიების შედაგად გარდაცვლილ ბავშვთა რიცხვი. ტრაგედია ჩაქვის მიმდებარე ტერიტორიაზე მოხდა. მომხდარის გამოძიება სისხლის სამართლის 276-ე მუხლით დაიწყო, რაც ტრანსპორტის მოძრაობისას უსაფრთხოების წესების ან ექსპლუატაციის წესის დარღვევას გულისხმობს. ავტოკატასტროფის შესახებ ოჯახის ერთ-ერთი ახლობელი გვესაუბრება:

- უდიდესი უბედურება დატრიალდა ჩვენ თავს. ვისაც ეს ოჯახი არ უნახავს, ვერ წარმოიდგენს, როგორ უყვარდათ, როგორ ეფერებდნენ ერთმანეთს, რა სასოებით ელოდნენ ამ ბავშვებს, რა დიდხანს არჩევდნენ მათ სახელებს - სესილისა და ნინის... ახლა კი ყველაფერი დამთავრდა, ყველაფერი გაქრა.

- გავრცელებული ინფორმაციით, ტრაგედია სატვირთო ტრაილერისა და მსუბუქი ავტომანქანის შეჯახების გამო დატრიალდა, რომელითაც ხუთი ადამიანი მგზგავრობდა. ავტოკატასტროფისას კი საჭესთან გარდაცვლილი ჩვილების მამა იჯდა.

- მსუბუქ ავტომანქანში ნამდვილად ხუთი ადამიანი იყო: 25 წლის თეონა იაკობაძე და ამავე ასაკის მისი მეუღლე, მიმო ივანიაძე და მათი ტყუპი გოგონები -  ორივე ცალ-ცალკე ეტლით. მანქანაში ასევე იყო, თეონას მამა მერაბ იაკობაძე. სწორედ ის იჯდა საჭესთან და არა მიმი. მერაბს ბათუმიდან, საკუთარი სახლიდან სიძე-ქალიშვილი და შვილიშვილები სოფელში, კერძოდ, ოზურგეთის სოფელ ლაითურში მიჰყავდა დასასვენებლად. ეს არის ახალგაზრდა, 47 წლის სრულიად გაწონასწორებელი ადამიანი, ის ნასვამი არ მჯდარა საჭესთან, როგორც გაავრცელეს ინფორმაცია, ეს ექსპერტიზამაც დაადასტურა. ამ ეტაპზე ზუსტად არავინ იცის, რა მოხდა, გამოძიებენ ყველაფერს, იმედია, ფაქტია, რომ მძღოლებმა შესაბამისი სიფრთხილე ვერ გამოიჩინეს...

- ბავშვების დედა როგორ არის? - ფიზიკურად თითქოს არა უშავს, მას შედარებით მსუბუქი დაზიანებები ჰქონდა და მხოლოდ ლავიწის ძვლის ოპერაცია დასჭირდა. მიმი კი მანქანის იმ მხარეს იჯდა, რომელმაც ყველაზე დიდი დარტყმა მიიღო და ფორმაც დაკარგა. ბავშვებიც საშინლად დაზიანდნენ. საავადმყოფომდე ცოცხლები კი მიიყვანეს, მაგრამ ექიმებმა მათი გადარჩენა ვეღარ შეძლეს, ეს შეუძლებელი იყოს. ადამიანი ყველაფერს იტანს, მაგრამ თეონას ამის გადატანა ძალიან გაუჭირდება.… ჯერჯერობით არც კი იცის, რომ ქმარ-შვილი აღარ ჰყავს... მას და მამამისს ექიმები დამამშვიდებელ წამლებს ასმევენ, მაგრამ სულ ასე ხომ არ იქნება...

მან დაკარგა ის, რითაც არსებობდა და სუნთქვადა. მიმისთანა ბიჭი იშვიათობაა, - გარდაცვლილ ადამიანზე ყოველთვის ამას ამბობენ, მაგრამ ის მართლა სიკეთის განსახიერება იყო. მიმი სამტრედიელია. ბათუმში მუშაობდა და ასე გაიცნო თეონა, ერთმანეთი ძალიან უყვარდათ... პატარები შვიდთვიანები დაიბადნენ, ძალიან სუსტები იყვნენ და კარგა ხანს იყვნენ საავადმყოფოში, ამ დროში მიმი ისე ღელავდა, ვერ წყნარებოდა, გოგონები რომ გამოიყვანეს, სულ ჩახუტებული დაჰყავდა. ახლა ეს ყველაფერი გაქრა და წაიშალა, განა ამ უბედურების ნუგეში სადმე არსებობს?!

"კვირის პალიტრა" ღრმა მწუხარებას გამოთქვამს მომხდარის გამო და უსამძიმრებს გარდაცვლილების ოჯახს, ახლობლებსა და მეგობრებს

ეთერ ერაძე (სპეციალურად საიტისთვის)