"არ დავუშვებთ შოთაძის უკან მობრუნებას" - პროკურატურასთან ზვიად კუპრავა დააკავეს - კვირის პალიტრა

"არ დავუშვებთ შოთაძის უკან მობრუნებას" - პროკურატურასთან ზვიად კუპრავა დააკავეს

გენერალურ პროკურატურასთან "სამართალდამცავთა რეფორმების ცენტრის" ხელმძღვანელი, ზვიად კუპრავა და კიდევ ერთი პირი დააკავეს.

როგორც "ინტერპრესნიუსს" შინაგან საქმეთა სამინისტროში განუცხადეს, კუპრავა და კიდევ ერთი პირი ადმინისტრაციული წესით არიან დაკავებულები. მათივე ცნობით, ისინი ადმინისტრაციულ სამართალდარღვევა კოდექსის 166-ე და 173-ე მუხლებით დააკავეს, რაც წვრილმან ხულიგნობასა და პოლიციისადმი დაუმორჩილებლობას გულისხმობს.

ზვიად კუპრავა თანამოაზრეებთან ერთად პროკურატურასთან აქციას მართავდა და გენერალური პროკურორის თანამდებობაზე ირაკლი შოთაძის შესაძლო დაბრუნებას აპროტესტებდა. მან პროკურატურის ეზოში ბოტასები გადაყარა, რასაც მასსა და სამართალდამცველებს შორის დაპირისპირება მოჰყვა.

"ბოტასები თავიდან ბოლომდე ასოცირდება პროკურატურასთან, მის რეჟიმთან, ფარცხალაძესთან, შოთაძესთან. რაც მთავარია, ერთი ადამიანის თანხმობით არ შეიძლება დაბრუნდეს და დაინიშნოს ფარცხალაძე. შოთაძის დაბრუნება არის სულში ჩაფურთხება ყველა იმ ადამიანის, იმ ათი ათასი ადამიანის, ვინც იდგა ორი წლის წინ რუსთაველზე. არ დავუშვებთ შოთაძის უკან მობრუნებას", - განაცხადა კუპრავამ.

"ინტერპრესნიუსი"