ცოლ-ქმარს შორის კონფლიქტი პატრულის დაჭრითა და თვითმკვლელობით დასრულდა - რა მოხდა თემქაზე?
ტრაგედია დატრიალდა თბილისში, კერძოდ, თემქის დასახლებაში, სადაც ოჯახურ კონფლიქტთან დაკავშირებით პატრული გამოიძახეს. მეუღლემ ქალისა, რომელმაც გამოიძახა სამართალდამცავები, ადგილზე მისულ პატრულ-ინსპექტორს ცივი იარაღით ჭრილობა მიაყენა, რის შემდეგაც კორპუსის მეშვიდე სართულის სადარბაზოდან გადახტა და საავადმყოფოში მიყვანის შემდეგ, მალევე გარდაიცვალა.
შსს-ს ინფორმაციით, პატრულ ინსპექტორის სიცოცხლეს საფრთხე არ ემუქრება. "საპატრულო პოლიციის ეკიპაჟი ოჯახურ კონფლიქტთან დაკავშირებით შესული შეტყობინების საფუძველზე გამოცხადდა თემქის დასახლებაში მდებარე ერთ-ერთ საცხოვრებელ კორპუსში, რა დროსაც შეტყობინების ინიციატორის მეუღლე - 1985 წელს დაბადებული გ.კ. გახდა აგრესიული და ამავე კორპუსის მე-4 სართულზე, სადარბაზოში, ადგილზე მისულ პატრულ-ინსპექტორს დ.ბ. -ს ცივი იარაღის გამოყენებით, მარცხენა ზედა კიდურის არეში მიაყენა ჭრილობა, რის შემდეგაც ამავე კორპუსის მეშვიდე სართულის სადარბაზოდან გადმოხტა. აღნიშნული პიროვნება სამედიცინო დაწესებულებაში მიყვანიდან მალევე გარდაიცვალა. რაც შეეხება დაჭრილ პატრულ-ინსპექტორს, დ.ბ. -ს ის მოთავსებულია სამედიცინო დაწესებულებაში, მისი სიცოცხლეს საფრთხე არ ემუქრება", - ნათქვამია განცხადებაში, რომელსაც შსს ავრცელებს.