"ჩა­მა­ცივ­დნენ, ბუ­ლინ­გი მო­ახ­დი­ნეს ჩემ­ზე, რომ..." - რატომ დაიწყო პროკურატურამ გამოძიება ბაჩალიაშვილის დედის განცხადების საფუძველზე - კვირის პალიტრა

"ჩა­მა­ცივ­დნენ, ბუ­ლინ­გი მო­ახ­დი­ნეს ჩემ­ზე, რომ..." - რატომ დაიწყო პროკურატურამ გამოძიება ბაჩალიაშვილის დედის განცხადების საფუძველზე

გარდაცვლილი 23 წლის პროგრამისტის, თამარ ბაჩალიაშვილის დედის, თეონა თამაზაშვილის განცხადების საფუძველზე პროკურატურის გენერალურ ინსპექციაში პროკურორის მიერ შესაძლო დისციპლინური გადაცდომის ჩადენის ფაქტზე გამოძიება დაიწყო.

აღნიშნულის შესახებ ინფორმაციას პროკურატურა ავრცელებს. როგორც უწყების ინფორმაციაშია აღიშნული, საქმე ეხება 13 აგვისტოს თამარ ბაჩალიაშვილის დედის, თეონა თამაზაშვილის მიერ მედიასაშუალებებით გაკეთებულ განცხადებას.

"საქართველოს გენერალური პროკურატურის გენერალურ ინსპექციაში დაიწყო სამსახურებრივი შემოწმება პროკურატურის თანამშრომლის მიერ შესაძლო დისციპლინური გადაცდომის ჩადენის ფაქტზე, 13 აგვისტოს თამარ ბაჩალიაშვილის დედის, თეონა თამაზაშვილის მიერ, მედია საშუალებებით გაკეთებულ განცხადებასთან დაკავშირებით.

გენერალური ინსპექცია დეტალურად შეისწავლის თეონა თამაზაშვილის მიერ მედიაში გაჟღერებულ განცხადებებთან დაკავშირებით ყველა გარემოებას", - ნათქვამია პროკურატურის მიერ გავრცელებულ ინფორმაციაში.

ცნობისთვის, თამარ ბაჩალიაშვილის დედამ თეონა თამაზაშვილმა აღნიშნა, რომ მასზე პროკურორ მარიამ გოგორელიანის მხრიდან ზეწოლა განხორციელდა.

მისი თქმით, საქმის პროკურორი მას სთხოვდა ეთქვა, საიდან ჰქონდა ჟურნალისტ გიორგი კაპანაძეს თამარ ბაჩალიაშვილის ჩანაწერი.

"ჩამაცივდნენ, ბულინგი მოახდინეს ჩემზე, რომ გინდა თუ არა, შენ მიეცი კაპანაძეს ის ფურცელიო და მე რომ ჩამეთვალა საჭიროდ, მე ხომ თავის დროზე ვიზამდი. თვითონ მოიპოვა თავისი წყაროთი კაცმა, ჩათვალა საჭიროდ და გაასაჯაროვა... ეს იყო მარიამ გოგორელიანი, ორი დღეა ამ ქალს ვხედავ შინაგან საქმეთა სამინისტროში", - ამბობს დაღუპულის დედა "მთავარ არხთან" საუბრისას.