თბილისის ზღვაზე მკვლელობა მოხდა - ცივი იარაღით დაჭრილი მამაკაცი შემთხვევის ადგილზე გარდაიცვალა - კვირის პალიტრა

თბილისის ზღვაზე მკვლელობა მოხდა - ცივი იარაღით დაჭრილი მამაკაცი შემთხვევის ადგილზე გარდაიცვალა

პოლიციამ თბილისში მომხდარ მკვლელობაში ბრალდებული დააკავა. შს სამინისტროს ინფორმაციით, 1978 წელს დაბადებული კ.შ., განზრახ მკვლელობის ბრალდებით, ცხელ კვალზე დააკავეს.

სამინისტროს ინფორმაციით, დანაშაული 7-დან 15 წლამდე ვადით თავისუფლების აღკვეთას ითვალისწინებს.

"გამოძიებით დადგინდა, რომ ალკოჰოლური თრობის მდგომარეობაში მყოფმა ბრალდებულმა თბილისის ზღვის მიმდებარე ტერიტორიაზე არსებულ ერთ-ერთ საცხოვრებელ ვაგონში, ურთიერთშელაპარაკების ნიადაგზე, ნაცნობს - 1982 წელს დაბადებულ გ.წ.-ს ცივი იარაღის გამოყენებით სხეულზე ჭრილობა მიაყენა და მიიმალა. დაჭრილი მამაკაცი შემთხვევის ადგილზე გარდაიცვალა.

სამართალდამცველებმა დანაშაულის ჩადენის იარაღი - დანა ნივთმტკიცებად ამოიღეს, კ.შ. კი მომხდარიდან რამდენიმე საათში დააკავეს.

გამოძიება განზრახ მკვლელობის ფაქტზე, საქართველოს სსკ-ის 108-ე მუხლით მიმდინარეობს", - ნათქვამია ინფორმაციაში.

"ინტერპრესნიუსი"