დაკავებული, რომელმაც კასპში მძევლები აიყვანა, დუმილის უფლებას იყენებს - კვირის პალიტრა

დაკავებული, რომელმაც კასპში მძევლები აიყვანა, დუმილის უფლებას იყენებს

დაკავებული, რომელმაც კასპში მძევლები აიყვანა, ამ დრომდე დუმილის უფლებას იყენებს.

როგორც "ინტერპრესნიუსს“ მისმა ადვოკატმა ქეთევან გაგოევმა განუცხადა, მისი დაცვის ქვეშ მყოფი ემოციურ მდგომარეობაშია და დაცვაზეც უარს აცხადებს.

"ბრალდება ჯერ არ წარედგინა, დღეს წარედგინება თუ ხვალ, ჯერ არ ვიცით, ზუსტად. რაც შეეხება ბრალის აღიარებას, დუმილის უფლება გამოიყენა და ხელი არაფერზე მოაწერა. დაცვაზე საერთოდ უარი განაცხადა, მაგრამ თუ ოჯახის წევრმა მოიწვია ადვოკატი შეთანხმებით, ამ შემთხვევაში ჩამოვცილდები, წინააღმდეგ შემთხვევაში მე მას სავალდებულო წესით ვიცავ. მას გუშინ საღამოდან გვიან ღამემდე ვესაუბრე, ძალიან აღელვებული იყო და ემოციური მდგომარეობა ჰქონდა“, - განაცხადა ადვოკატმა.

ცნობისათვის, მამაკაცმა კასპში მძევლები გუშინ აიყვანა. რამდენიმესაათიანი მოლაპარაკების შედეგად, მან მძევლები გაათავისუფლა, რის შემდეგაც დააკავეს. როგორც მოგვიანებით გახდა ცნობილი, დაკავებული ყოფილი პოლიციელია - პოლიციის რიგები მან 2018 წელს დატოვა.

"ინტერპრესნიუსი"