ღორის გრიპის შემთხვევები მატულობს
H1N1 ვირუსით ინფიცირებულთა შემთხვევების რაოდენობა საქართველოში 21-ით გაიზარდა. დაავადებათა კონტროლის ეროვნული ცენტრის დირექტორის მოადგილის,
შოთა ცანავას განცხადებით, 4 პაციენტი საავადმყოფოში მკურნალობს. მათი მდგომარეობა საშუალო სიმძიმისაა.
ამასთან, დაავადების უმეტესი ნაწილი - 19 შემთხვევა, თბილისში გამოვლინდა, 2 კი - ქუთაისში. შემთხვევათა უმეტესობა 5-დან 14 წლამდე და 15-დან 29 წლამდე ასაკობრივ ჯგუფებზე მოდის.
სულ დღემდე საქართველოში ლაბორატორიულად დადასტურებული 292 შემთხვევა ფიქსირდება.
ცანავამ აღნიშნა, რომ შემთხვევების მატებასთან ერთად გართულებების რისკიც დიდია. ამდენად, პაციენტებმა ექიმს დროულად უნდა მიმართონ.