დმიტრი მედვედევი აფხაზეთში ჩავიდა
აფხაზეთის აღიარების შემდეგ რფ პრეზიდენტი მედვედევი სოხუმში პირველად ჩავიდა და 8 აგვისტოს სოხუმში ვიზიტს სიმბოლური უწოდა. "ზუსტად ორი წლის წინ
სამხრეთ ოსეთში განვითარდა ცნობილი მოვლენები, რომლებიც მთელი რიგი პოლიტიკური პროცესების დასაწყისი გახდა, მათ შორის - აფხაზეთისა და სამხრეთ ოსეთის აღიარებისა", - აღნიშნა მედვედევმა აფხაზეთის ე.წ. პრეზიდენტ სერგეი ბაღაფშთან შეხვედრისას.
"აფხაზეთთან ჩვენ განვავითარებთ მეგობრულ, ეკონომიკურ ურთიერთობას და ვითანამშრომლებთ უსაფრთხოების საკითხებში", - განაცხადა მედვედევმა.
რუსეთის პრეზიდენტი აფხაზეთს აეროპორტისა და ავიამიმოსვლის აღდგენაში დახმარებას დაჰპირდა.
"აფხაზეთისა და სამხრეთ ოსეთის დამოუკიდებლობის აღიარება რთული გადაწყვეტილება იყო. თუმცა არ ვნანობ", - განუცხადა რუს ტურისტებს დმიტრი მედვედევმა სოხუმში სეირნობისას.
რუსეთის პრეზიდენტის განცხადებით, რომ არა მოსკოვის გადაწყვეტილება აფხაზეთისა და სამხრეთ ოსეთის აღიარების შესახებ, ამ რეგიონებში ხანგრძლივი სისხლიანი კონფლიქტი გაგრძელდებოდა.