ღლონტი სააკაშვილს მიმართავს
ტელეკომპანია "მაესტროს" ხელმძღვანელი მამუკა ღლონტი საქართველოს პრეზიდენტს მიხეილ სააკაშვილს გაეროში გაკეთებული განცხადების საპასუხოდ, ღია
წერილით მიმართავს.
"შეგახსენებთ, ეს ის ტელეკომპანიაა, რომელსაც ლიცენზიას არ აძლევდით ხანგრძლივი დროის განმავლობაში; შეგახსენებთ, ეს ის ტელეკომპანიაა, რომელთა ჟურნალისტებიც არაერთხელ დაარბიეს ხელისუფლების წარმომადგენლებმა; შეგახსენებთ, ეს ის ტელეკომპანიაა, რომელსაც ხელისუფლების წარმომადგენლებმა არაერთხელ დაუმტვრიეს და წაართვეს აპარატურა; შეგახსენებთ, ეს ის ტელეკომპანიაა, რომლის ოფისიც ააფეთქეს და ეს ფაქტი შინაგან საქმეთა სამინისტრომ შენობის განზრახ დაზიანების მუხლით დააკვალიფიცირა; შეგახსენებთ, რომ არც ერთი ძალადობის ფაქტი, რომელიც ჩადენილია "მაესტროს" მიმართ, გამოძიებული არ არის; შეგახსენებთ, ეს ის ტელეკომპანიაა, რომელზეც ბიზნესმენების უმრავლესობას რეკლამის მოტანა აქვთ აკრძალული; შეგახსენებთ, ეს ის ტელეკომპანიაა, რომლის მაუწყებლობა საქართველოს სხვადასხვა რეგიონში ხელისუფლების მიერ იკრძალება", - ნათქვამია ღია წერილში.