"სააკაშვილი ჩვენი დაუფიქრებლობისა და ამორალურობის შედეგია" - კვირის პალიტრა

"სააკაშვილი ჩვენი დაუფიქრებლობისა და ამორალურობის შედეგია"

"თუ მოსახლეობამ ეს საზარელი ვიდეომასალა იხილა, სააკაშვილისა და მერაბიშვილის ფიზიკურ უსაფრთხოებას საფრთხე დაემუქრება"

თქვენმა მონა-მორჩილმა სხვა მედიასაშუალებების წარმომადგენლებთან ერთად შსს-ში გამართულ შეხვედრაზე საზარელი ვიდეომასალა იხილა, ფირი იმის შესახებ, თუ როგორ შეურაცხყოფენ ერთ ახალგაზრდას ადამიანისმაგვარი სადისტები. ამ შოკის შემდეგ ძალიან გამაღიზიანებელია "ნაციონალური მოძრაობის" ლიდერების კომენტარები, ჩვენ არაფერი ვიცოდით, სადისტები შევარდნაძის ხელისუფლების დროიდან გადმოგვყვნენო. ამ დროს ყოველთვის მახსენდება მათი იმდროინდელი პოზიცია, როდესაც "ნაციონალები" ზენიტში იყვნენ და თავისუფალ მედიასაშუალებებში იწერებოდა ციხეებში თუ პოლიციის განყოფილებებში გაუპატიურებისა და გაუპატიურებით დამუქრების შესახებ. როგორც წესი, ამ საკითხზე მაშინდელი მმართველები კომენტარს არ აკეთებდნენ, ან თუ რაიმეს იტყოდნენ, ყველაფერს ადვოკატებსა და ჟურნალისტებს აბრალებდნენ, ეგენი თხზავენ ამ სისულელეებსო. ერთხელ არ შეუწუხებიათ თავი, გაზეთებში გამოქვეყნებული თუნდაც ერთი შემაშფოთებელი მასალა გადაემოწმებინათ.

თუმცა საკითხის ასე დასმა, ალბათ, გულუბრყვილობაა. საქმე იქით მიდის, რომ  სწორედ იმ პირთა ხელდასხმით აუპატიურებდნენ ადამიანებს, რომელთაც ამ სისაძაგლის აღკვეთა ევალებოდათ. ეს მაღალჩინოსნები კი, სავარაუდოდ, დაკვეთას უფრო ზემოდან იღებდნენ. ვნახოთ, დაველოდოთ გამოძიებას, თუმცა ერთი რამ ფაქტია, - 2003-2012 წლების ხელისუფლებას თავისი საპარლამენტო-საპრეზიდენტო შტოებიანად სამარცხვინო ადგილი ისტორიაში გარანტირებული აქვს. ამ მოსაზრებას ეთანხმება პოლიტოლოგი და ფსიქოლოგი რამაზ საყვარელიძე, რომელიც ასევე ესწრებოდა შსს-ში გამართულ შეხვედრას.

- მიუხედავად იმისა, რომ ციხის ვიდეოფირი ნანახი მქონდა, ასეთი საზარელი ვიდეომასალის ხილვას არ ველოდი. ერთია, როდესაც გესმის და მეორე, როდესაც საკუთარი თვალით ნახავ.

- ფირის ჩვენების შემდეგ, დარბაზშივე დაიწყო და დღესაც გრძელდება დისკუსია იმის შესახებ, უნდა გასაჯაროვდეს თუ არა ეს ვიდეომასალა და უნდა ნახოს თუ არა ის მოსახლეობამ.

- კადრების გასაჯაროების მომხრეებს თავიანთი არგუმენტები აქვთ. მათი აზრით, საზოგადოება უფრო მკაფიო დასკვნას გამოიტანს, ისე, როგორც ეს მოხდა ციხის ვიდეოფირის გავრცელების შემდეგ. თუმცა, ჩემი აზრით, ციხის ვიდეოფირისგან განსხვავებით, სამეგრელოს სამალავში აღმოჩენილი საზარელი ვიდეომასალა ხალხს არა მხოლოდ დასკვნას გამოატანინებს, არამედ ქვებითა და ჯოხებით შეიარაღებულს ქუჩაშიც გამოიყვანს

და დაუპირისპირებს მოსახლეობის მეორე ნაწილს.

- "მეორე ნაწილში" ვის გულისხმობთ?

- იმ ნაწილს, რომელიც უფრო ლოიალურია ყოფილი ხელისუფლების მიმართ. იმაზე კი უკვე ზედმეტია ლაპარაკი, რომ ქუჩაში გამოსული ხალხის უპირველესი სამიზნე "ნაცმოძრაობა" იქნება. შესაძლოა, ეს აღშფოთება ახალი უკანონობის საფუძველი გახდეს.

- "ნაციონალებმა" საზარელი ვიდეომასალის აღმოჩენის შემდეგ ასეთი ტაქტიკა აირჩიეს, უნდა დავადგინოთ, ეს ცალკეული შემთხვევა იყო თუ სისტემური მოვლენაო. ამაზე კამათი კიდევ შეიძლება?

- ნამდვილად არ შეიძლება. საზარელ ვიდეომასალაში ადამიანს აუპატიურებენ და აწამებენ იმ მიზნით, რომ მან თავზე აიღოს არარსებული დანაშაული. ეს სქემა ხომ ვიღაცამ მოიფიქრა? ეს "ვიღაც" რიგითი პოლიციელი ნამდვილად არ იქნება. სადისტებს სანქცია უფრო მაღალი ეშელონებიდან აქვთ მიღებული. ეს აზრი კიდევ უფრო გაამყარა მიხეილ სააკაშვილის განცხადებებმა.

- ალბათ, იმ განცხადებას გულისხმობთ, რომლის თანახმადაც, "სისტემას, დარღვევების ჩამდენებს აქვთ სახელები და გვარები". პრეზიდენტმა ასევე განაცხადა: "ორი მთავარი ფიგურაა კუდ-ის წარმომადგენელი ვინმე ჩხატარაშვილი და კუდ-ის ფაქტობრივი უფროსი ლევან ქარდავა, რომლებიც ჩვენს მთავრობას გადმოჰყვნენ შევარდნაძის მთავრობიდან. დღეს ორივე თანამშრომლობს საქართველოს ახალ მთავრობასთანაც. ჩხატარაშვილი არის მარჯვენა ხელი მთავრობის მთავარი მრჩევლისა და ბიზნესში მთავარი ბატონ-პატრონის, გია ხუხაშვილის. ის ერთ-ერთი მთავარი არქიტექტორია პროკურატურის მიერ განხორციელებული საქმეების. ლევან ქარდავა არის ის ადამიანი, რომელიც პარლამენტში ჩვენი ფრაქციის წევრებს ყოველდღიურად ელაპარაკება და აიძულებს, გავიდეს "ნაციონალური მოძრაობიდან"... მე ამ ორ ადამიანს არ ვიცნობდი".

- დიახ, ამ განცხადებას ვგულისხმობ.  გამოდის, პრეზიდენტს სცოდნია, რომ ასეთი საზარელი რაღაცები ხდებოდა. სააკაშვილმა გუშინ, ფაქტობრივად, ეს აღიარა. თუმცა ვნახოთ, რას დაადგენს გამოძიება.

- სააკაშვილი და მერაბიშვილი ამტკიცებენ, რომ არაფერი იცოდნენ და ცოდვის აკიდებას "შევარდნაძის დროინდელი კადრებზე" ცდილობენ.

-  თუ სააკაშვილსა და მერაბიშვილს კვლავაც ასეთი თავხედური პოზიცია ექნებათ, შესაძლოა, საზოგადოების დიდმა ნაწილმა მართლაც მოითხოვოს, რომ მოსახლეობას აჩვენონ საზარელი ვიდეომასალა. მერე უკვე ხალხის ნებაზე იქნება დამოკიდებული ყველაფერი.

- კერძოდ?

- ლინჩის წესით გასამართლებას ვგულისხმობ. თუ მოსახლეობამ ეს საზარელი ვიდეომასალა იხილა, სააკაშვილისა და მერაბიშვილის ფიზიკურ უსაფრთხოებას საფრთხე დაემუქრება. ეს, რა თქმა უნდა, დაუშვებელია, მაგრამ თავხედობასაც ხომ აქვს საზღვარი?

- დავაკონკრეტებ, დასაშვებად მიიჩნევთ იმ ვერსიას, რომ ასეთ საზარელ ქმედებებზე სანქციას უშუალოდ სააკაშვილი და მერაბიშვილი გასცემდნენ?

- არ გამოვრიცხავ. ვიმეორებ, სააკაშვილის ზემოხსენებულმა განცხადებებმა ეს ვერსია კიდევ უფრო გაამყარა.

- ალბათ, ისიც უნდა ვთქვათ, რომ "ნაციონალების" ნაწილმა (დღევანდელ საპარლამენტო გუნდს ვგულისხმობ) მართლაც არ იცოდა, რას აკეთებდა მათი ხელისუფლება. ხომ არ დადგა დრო, რომ თუნდაც პოლიტიკურად გადარჩენის მიზნით "ნაციონალთა" ეს ნაწილი გაემიჯნოს სააკაშვილს, მერაბიშვილს თუ ადეიშვილს.

- სააკაშვილისა და მერაბიშვილისაგან გამიჯვნა ერთადერთი სწორი ნაბიჯი იქნება "ნაციონალური მოძრაობის" წევრთა ნაწილისთვის.

- და ელოდებით ამგვარ ნაბიჯს, მაგალითად, დავით ბაქრაძისგან?

- სიმართლე გითხრათ, დავით ბაქრაძისგან ამგვარ ნაბიჯს დიდი ხანია ველოდები. ჩემი აზრით, ის იმდენად პატიოსანია, რომ ამ მდგომარეობაში "ნაციონალებისთვის" კვანტის გამოკვრა არ სურს. მაგრამ, ალბათ, კარგად უნდა აწონ-დაწონოს, რა უფრო უღირსი საქციელია: "ნაციონალების" ერთგულება თუ მათგან გამიჯვნა.

- ზემოხსენებულ თემას დავუბრუნდეთ. საინტერესოა, რა ფსიქოტიპთან გვაქვს საქმე?

- რა ფსიქოტიპთან გვაქვს საქმე იმ პირთა სახით, რომელთაც (ისევე როგორც მე) თავის დროზე ტელევიზიით ნახეს, დეპუტატი სააკაშვილი პარლამენტის სხდომის დამთავრების შემდეგ როგორ მიეპარა ერთ-ერთ პატივსაცემ ადამიანს ქართულ პოლიტიკაში, მიხეილ ნანეიშვილს, ყურში რაღაც ჩასჩურჩულა და გაიქცა. კადრში ჩანდა, როგორ შემოტრიალდა გაოცებული და აღშფოთებული ნანეიშვილი და თქვა, შემაგინაო. სააკაშვილმა ეს გააკეთა იმიტომ, რომ სხდომაზე ნანეიშვილმა გააკრიტიკა. მე იმ ერისა და საზოგადოების ფსიქოტიპი უფრო მაინტერესებს, ვინც ამ სტილისა და მორალის მქონე ადამიანი აირჩია ქვეყნის პირველ პირად, შემდეგ მხარი დაუჭირა მის პარტიას და განუსაზღვრელი ძალაუფლება ჩაუგდო ხელში. ჩვენ თუ ეს ყველაფერი - დაწყებული ძალაუფლების გადამეტებით და სადიზმით დამთავრებული - მხოლოდ სააკაშვილის პრობლემად მივიჩნიეთ, გამოდის, არც არაფერი გვისწავლია და ვერც ვისწავლით. სააკაშვილი ჩვენი დაუფიქრებლობისა და ამორალურობის შედეგია, რადგან სწორედ ჩვენ ვუკრავდით ტაშს, როდესაც ის კანონს არღვევდა. თუ დღეს სააკაშვილისგან გამოწვეულ ტრაგედიაზე ვსაუბრობთ, დასკვნა ხალხზე უნდა გავაკეთოთ. წინააღმდეგ შემთხვევაში, ხალხს ეგონება, მიშას გადაყენებით ის პრობლემაც მოგვარდა, რამაც სააკაშვილი მოიყვანა ხელისუფლებაში. ამიტომ არ მინდა, რომ იოლი გამოსავალი - ავადმყოფი მიშა და ავადმყოფი მერაბიშვილი თუ წავლენ ხელისუფლებიდან, პრობლემა მოგვარდებაო. საკითხი დღის წესრიგიდან მოხსნილი არ არის, რადგან ის ფაქტორი, რამაც სააკაშვილი ხელისუფლებაში მოიყვანა, კვლავ ჩვენშია.

- ზოგადი არგუმენტით შეგეკამათებით, - თავის დროზე, სააკაშვილს ხალხმა სულ სხვა მიზნით მისცა ხმა და ხალხმავე გაისტუმრა ხელისუფლებიდან "ნაცმოძრაობა".

- მე ვგულისხმობ იმას, რომ ჩვენი დაუფიქრებლობა, ლოიალურობა უნამუსობის მიმართ, გახდა იმის მიზეზი, რომ სააკაშვილი ხელისუფლებაში მოვიყვანეთ და მერე მწვანე შუქი ავუნთეთ. ეს დამოკიდებულება თუ არ გამოსწორდა, მეორე და მესამე სააკაშვილს მივიღებთ.

- და ეს დამოკიდებულება გამოსწორების გზას ადგას?

- არა, ჯერჯერობით საქმეს ამის პირი არ უჩანს, რაც ძალიან სამწუხაროა.

- ერთგვარი გამოსაფხიზლებლის როლი არც ბოლოდროინდელმა საზარელმა მოვლენებმა შეასრულა?

- არა, რადგან მხოლოდ იმაზე მსჯელობენ, სააკაშვილია დამნაშავე თუ მერაბიშვილი. გვიკვირს, ასეთი საშინელი ხალხი ხელისუფლებაში საიდან მოვიდაო. არ გვინდა საკუთარი დანაშაულის დანახვა, რომ ჩვენვე მოვიყვანეთ ისინი ხელისუფლებაში. თუ საკუთარი დანაშაული არ დავინახეთ, ისე რა გამოგვასწორებს?

- საპარლამენტო უმრავლესობის ზოგიერთი წევრი მიიჩნევს, რომ ზემოხსენებული ვიდეომასალა იმ ამერიკელმა კონგრესმენებმა და ევროპარლამენტის წევრებმაც უნდა ნახონ, რომლებიც ყოფილი მაღალჩინოსნების დაკავებას პოლიტიკურ ანგარიშსწორებად აფასებენ. თეორიულად დავუშვათ, რომ მათ ნახეს ვიდეომასალა. როგორ ფიქრობთ, შეიცვლება მათი დამოკიდებულება საქართველოში მიმდინარე პროცესებისადმი? ისე, დასავლურმა პრესამ კიდევ ერთი იერიში მიიტანა ახალ ხელისუფლებაზე, "ფორბსმა" ივანიშვილზე გამოაქვეყნა სტატია: "გაკვეთილი კრემლინოლოგიაში".

- თუ დასავლეთი დამოკიდებულებას არ შეცვლის, მაშინ კარგად ყოფილა ჩვენი და მათი საქმეც. მე ჩვენს სატკივარზე ვლაპარაკობდი, თორემ სააკაშვილის რეჟიმის ასეთად ჩამოყალიბებაში დასავლეთი არანაკლებ დამნაშავეა.

- და რასთან გვქონდა საქმე, უკანონობაზე თვალის დახუჭვასა თუ არაინფორმირებულობაზე?

- შეიძლება ორივე ამ ფაქტორზე ვისაუბროთ, მაგრამ მთავარი მაინც, ჩემი აზრით, იყო პრინციპი - ძაღლისშვილია, მაგრამ ჩვენი ძაღლისშვილიაო.

- რა ამის პასუხია და, შსს-მ კიდევ 4 სამალავი აღმოაჩინა. ბოლო დღეებში არაერთხელ უთქვამთ, რომ ასეთივე სამალავები საქართველოს თითქმის ყველა რეგიონშია.

- მეც ასე ვფიქრობ და ეს რომ დადასტურდეს, ნამდვილად არ გამიკვირდება. სხვათა შორის, "ნაციონალური მოძრაობის" წარმომადგენლები ამტკიცებენ, რომ თითქოს ეს სამალავი თავდაცვის სამინისტროს ეკუთვნოდა, რათა რუსეთის თავდასხმის შემთხვევაში პარტიზანულ რაზმებს გამოეყენებინათ. კი მაგრამ, ამ სამალავში ვიდეომასალაც ამ მიზნით იყო?

- რადგან "ნაცმოძრაობაზე" ვლაპარაკობთ, გკითხავთ, ამ ამბების შემდეგ, თუნდაც თეორიული შანსი თუ აქვს ამ პარტიას, რომ მომავალში ქმედით პოლიტიკურ ძალად იქცეს?

- ამ მასალების გავრცელების გარეშეც "ნაცმოძრაობას" შანსი არ ჰქონდა. მას მოსახლეობაში მაქსიმუმ 10%-იანი მხარდაჭერა ჰქონდა. სხვათა შორის, ძალიან სამწუხაროა, რომ არავინ, მათ შორის არც ახალი ხელისუფლება, არ ატარებს საზოგადოებრივი აზრის კვლევას, რათა გაირკვეს, საზარელი ვიდეოფირი როგორ აისახა საზოგადოების განწყობაზე და რამდენი მხარდამჭერი დარჩა "ნაცმოძრაობას".

მე, მაგალითად, ეს ძალიან მაინტერესებს, ახალი ხელისუფლება კი არანაირ ინტერესს არ იჩენს.

- და რატომ უნდა გამოიკვლიოს ხელისუფლებამ "ნაციონალური მოძრაობის" რეიტინგი? იმისთვის ხომ არა, რომ დაფიქრდეს რიგგარეშე საპარლამენტო არჩევნების მიზანშეწონილობაზე?

- როდესაც მნიშვნელოვანი მოვლენები ხდება, ხელისუფლებამ უნდა იცოდეს ხალხის განწყობა. მაგალითად, ჩვენ ვისაუბრეთ იმის შესახებ, რომ თუ მასალები გასაჯაროვდა, ხალხი ქუჩაში გავა. შესაძლოა, ზოგიერთმა მოვლენამ მართლაც შექმნას დესტაბილიზაციის საფრთხე და სწორედ ამიტომ სჭირდება ხელისუფლებას ასეთი კვლევები, რომ დესტაბილიზაცია გამოირიცხოს.