"ქართველი ხალხი სხვისი მსახური რატომ უნდა იყოს, როცა ჩვენს მიწა-წყალს ბევრი რამის მოცემა შეუძლია" - კვირის პალიტრა

"ქართველი ხალხი სხვისი მსახური რატომ უნდა იყოს, როცა ჩვენს მიწა-წყალს ბევრი რამის მოცემა შეუძლია"

"გავაშენეთ სან-ანდრეასის ჯიშის მარწყვი, რომელიც მეორე წელია მოგვყავს. გასულ წელს თითო ცალი 58-65 გრამამდე ავიდა. იმდენად დიდი იყო, გაშლილი ხელისგული

ორს თუ დაიტევდა"

ლელა ქობალია და მისი ოჯახი სოფელ დარჩელში ცხოვრობენ. დაოჯახების შემდგომ ლელამ ფარმაცევტად მუშაობაზე უარი თქვა და სოფლის მეურნეობით დაინტერესდა. თავდაპირველად შემოსავლის წყაროდ სიმინდი და თხილი ჰქონდათ, მერე კი მარწყვის მოყვანა სცადა... მისი მეუღლე, მურად შაყლანძე, აგრონომია და ლელას ყველა ინიციატივას მხარს უჭერს, მიაჩნია, რომ ნებისმიერ სფეროში, განსაკუთრებით სოფლის მეურნეობაში, ქალების აქტიურობა მნიშვნელოვანია, ოღონდ რამე იდეა ჰქონდეს მეუღლეს და მზად არის მხარდასაჭერად. ლელა ქობალია საქმიანობის შესახებ გვესაუბრა.

- თავიდან კენკროვანის მოსაყვანად ერთმა ორგანიზაციამ ნახევარი ჰექტარი მიწა დაგვიფინანსა, თუმცა ვერ გავრისკეთ და მხოლოდ 2000 კვმ-ზე გავაშენეთ სან-ანდრეასის ჯიშის მარწყვი, რომელიც მეორე წელია მოგვყავს. გასულ წელს თითო ცალი 58-65 გრამამდე ავიდა. იმდენად დიდი იყო, გაშლილი ხელისგული ორს თუ დაიტევდა. წლეულს თითო ძირმა 90-დან 120 ცალამდე ნაყოფი გამოისხა, თუმცა იმდენად დიდი აღარ იყო, თითო, ალბათ, 34 გრამს იწონიდა. ახლა დაახლოებით 60 ათასი ნერგი გვაქვს გასაყიდად. თანდათან იდეებიც მოგვდის. მაგალითად, ლურჯ მოცვს ვრგავთ და გაზაფხულზე ჟოლოსაც ვაპირებთ.

- ამჟამად რა მოგყავთ?

- ბაღჩეული და ბოსტნეული, მიწას მხოლოდ სოფლად ნაყიდი გადამწვარი ნაკელით ვანოყიერებთ. ჩვენი ბაღჩეულიც და ბოსტნეულიც ბიო უნდა იყოს, რათა თხილს ხელი არ შევუშალოთ. ხარისხიც მაღალია და გემოც სულ სხვა აქვს. გვაქვს სიმინდი როგორც თეთრი, ისე აბაშური ყვითელი. სხვადასხვა სახეობის ჰიბრიდი სიმინდი ცალკე გვაქვს. ასევე მოგვყავს საზამთრო, ნესვი, ლიმონი, ფეიხოა, კარტოფილი, კიტრი, პამიდორი, ბადრიჯანი, ლობიო, ბულგარული წიწაკა, მწვანილი...

- როგორც ვიცი, პროდუქციის ევროპაში გატანას გეგმავთ.. - დარჩელში მოყვანილ პროდუქტს ადგილობრივ ბაზარზე ვყიდით, ჯერ იმდენი არ მოგვყავს, რომ ევროპაში გავიტანოთ. ვნახოთ, რამდენად ინტენსიური იქნება დაინტერესება ბიოპროდუქტებით. გაისად აგროტურის ჩატარებას ვგეგმავთ. ჩვენი დამხმარე ქალები მეგრული კერძების მასტერკლასებს ჩაუტარებენ სტუმრებს.

- რას ურჩევთ ჩვენს ფერმერ ქალებს? - თუ ქალმა მეურნეობაში სიყვარული ჩადო, ყველაფერი გამოუვა. მთავარია, მობილიზებულად იმუშაოს და კარგი ორგანიზატორი იყოს.

მე აგროსიახლეებს მუდმივად ვეცნობი და ვცდილობ სხვადასხვა სასწავლო კონკურსში მივიღო მონაწილეობა. გრანტებსაც ვიღებ, ამისთვის ბიზნესგეგმებს ვწერ. გაერომ 5.000-ლარიანი ტრაქტორითაც დამასაჩუქრა. მოცვისა და ჟოლოს პლანტაციებსაც მიფინანსებენ. 6 ქალი და 3 კაცი მყავს დასაქმებული. გარდა იმისა, რომ მოჭრილ ხელფასს ვუხდი, პროდუქტებსაც ვჩუქნი. ყოველთვის ვცდილობ მათ წახალისებას, ისინიც თავს არ ზოგავენ.

- მეცხოველეობა-მეფრინველეობაც გაინტერესებთ... - თხები და ძროხები გვყავს. ასევე ბატები, იხვები და ქათმები... 10-ლიტრიანი წველადობის ძროხები 17-18-ლიტრიანით შევცვალეთ. რძის ნაწარმს ადგილობრივ ბაზარზე ვყიდით. ინდაურების გაზრდასაც ვგეგმავთ. 4000 კვმ ნაკვეთის ბადით გადახურვა გვინდა, რომ ყვავებმა და ფრინველებმა არ დაგვიგლიჯონ. დიდი ტერიტორია=ა და გადახურვა დიდ თანხებს მოითხოვს.

კარგი შემოსავლის მოტანა შეუძლია კიტრის პლანტაციას, ბულგარულ წიწაკას, საზამთროს. ქართველი ხალხი სხვისი მსახური რატომ უნდა იყოს? ჩვენივე მიწა-წყალს ძალიან ბევრი რამის მოცემა შეუძლია.

ნათია სიბაშვილი