ღვთისმშობლის კვართი
ღვთისმშობლის კვართი
დღეს ზუგდიდში ხალხმრავლობაა – რადგან დღეს, ვლაქერნობის დღესასწაულზე, ყოვლადწმინდა ღვთისმშობლის კვართი უნდა გამოაბრძანონ მორწმუნეებთან. კვართი, რომელიც თავად ქალწულმა მარიამმა დაუტოვა მიძინების წინ მის მომვლელ ერთ-ერთ ქალწულს და სთხოვა, სიკვდილის მოახლოებას რომ იგრძნობდა, ისევ ვინმე კეთილმორწმუნე ქალწულისათვის გადაეცა მოსავლელად. ასე გადაეცემოდა თაობიდან თაობას ეს უდიდესი სიწმინდე, რომლის შესახებაც შემთხვევით შეიტყვეს პალესტინაში მოსალოცად ჩასულმა ძმებმა, იმპერატორთან დაახლოებულმა პირებმა, გალბიუსმა და კანდიდმა. მათ მასპინძლისაგან, რომელიც იყო ღვთისმშობლის სამოსის მცველი, წამოაბრძანეს კიდობანი ამ საოცარი
სიწმინდით და კონსტანტინოპოლში გადაასვენეს.

468 წლის 2 ივლისს სამოსი ახალ კიდობანში გადააბრძანეს. კიდობანში, ასევე, ჩააბრძანეს ღვთისმშობლის ომოფორი და სარტყლის ნაწილი. ახალი კიდობანი პატივით გადააბრძანეს ვლაქერნის მონასტერში.

გავიდა წლები, საუკუნეები. კონსტანტინოპოლი დაეცა და სტამბულად იქცა, ბიზანტიის იმპერია განადგურდა. და ვლაქერნის სიწმინდეებიც, მტერს განრიდებული, იერუსალიმის ჯვრის ქართველთა
მონასტერში აღმოჩნდა. მერე დაშლილ-დაქუცმაცებულმა ქვეყანამაც ვეღარ შეძლო თავისი სალოცავის მოვლა-პატრონობა და ჯვრის მონასტრიდან წამოსულმა ნიკოლოზ ჩოლოყაშვილმა მონასტერში დაცული სიწმინდეები საქართველოში, სამეგრელოში, ჩამოაბრძანა – ნიკოლოზი ლევან II დადიანის მოწვევით ჩამოვიდა საქართველოში, რათა კორცხელის მონასტრის წინამძღვრობა ეტვირთა.

მეორე ვერსიის მიხედვით, კვართი ჩვენთან ხატმებძოლთა ერესისათვის გამოურიდებიათ და მერვე საუკუნიდან ინახება ქართულ მიწაზე, სადადიანოში. დასავლეთ საქართველოში – ყოვლადწმინდა ღვთისმშობლის კვართი, ხოლო აღმოსავლეთ საქართველოს გულში –მცხეთაში –თავად მაცხოვრის კვართი საქართველოს ერთიანობისა და განუყოფლობის სიმბოლოა. იმედია, რომ, ადრე თუ გვიან, დაშლილ-დანაწევრებული მისი სხეული კვლავ აღდგება და უფლისმიერი მადლით გაბრწყინდება.

2000 წელს კვართზე იესო ქრისტეს ხელთუქმნელი გამოსახულება აღიბეჭდა.
ყოველ წელს, ვლაქერნობას, ეს ერთ-ერთი უდიდესი სიწმინდე, მორწმუნეებთან გამოაქვთ და მისი მოლოცვა ნებისმიერ მსურველს შეუძლია.

სს
31 აგვისტო 2017 11:53
კვართი ბოლშევიკურ მისამართზე არ უნდა იყოს, არამედ სადაც ხუთასი წელი ბრძანდებოდა, ანუ ხობის მონასტერში
გოგიტა
27 ნოემბერი 2015 22:08
ყოვლადსამღვდელო ლეონიდის მოგზაურობა სამეგრელოს
ეკლესიების დასათვალიერებლად
...ჩვენი უკვდავი მგოსანი აკაკი დიდებულ ხოპის მონასტერსაც შეხებია თავის ცნობილ მოთხრობა ,,ნათელაში’’ და სწორედ ისე მომჯადოებლად გვისურათ-ხატებს მონასტრის მდებარეობის სიკეკლუცეს, როგორც მის ზეგარდამო მადლით ცხებულ კალამს შეჰფერის და მოეთხოვება. გულწრფელად ვურჩევთ ყველა მკითხველს ,,ნათელადან’’ ამ აღწერილობას და დასტკბეს პოეტური უებრო სურათით. ჩვენის მხრით, აკაკის ქმნილების შემდეგ, ხოპის მდებარეობის დახასიათება, კადნიერება იქნებიდა, ამიტომ ამაზე კრინტსაც არ ვძრავთ.
ჩვენი სამშობლოს ისტორიის მცოდნენი ხოპის დაარსებას მეათე საუკუნის წინა დროს აკუთნებენ. ხსენებულ მონასტერში ასვენია მეათე საუკუნის ქართული ხელოვნების ხატები და ისეთი ფასდაუდებელი ნაშთი, როგორიც არის დიდებული თამარ დედოფლის გულზე საკიდი ჯვარი.
ხოპის მონასტერს აბრწყინებს კვართი ყოვლად წმიდა ღვთისმშობლისა, მთელი მარჯვენა მკლავი ხელიანა ქალწულმოწამე მარინესი და მაცხენა ხელი წმ. კვირიკესი.
გაზ. ,,შინაური საქმეები'', 1912 წ.
გიორგი
27 ნოემბერი 2015 22:07
რატომ არ აღნიშნავთ, რატომ ივიწყებთ იმას რომ კვართი საქართველოში ბოლშევიკების მოსვლამდე ხობის მონასტერში მსვენარებდა!
,,ყოვლადსამღვდელო ლეონიდის მოგზაურობა სამეგრელოს
ეკლესიების დასათვალიერებლად
...ჩვენი უკვდავი მგოსანი აკაკი დიდებულ ხოპის მონასტერსაც შეხებია თავის ცნობილ მოთხრობა ,,ნათელაში’’ და სწორედ ისე მომჯადოებლად გვისურათ-ხატებს მონასტრის მდებარეობის სიკეკლუცეს, როგორც მის ზეგარდამო მადლით ცხებულ კალამს შეჰფერის და მოეთხოვება. გულწრფელად ვურჩევთ ყველა მკითხველს ,,ნათელადან’’ ამ აღწერილობას და დასტკბეს პოეტური უებრო სურათით. ჩვენის მხრით, აკაკის ქმნილების შემდეგ, ხოპის მდებარეობის დახასიათება, კადნიერება იქნებიდა, ამიტომ ამაზე კრინტსაც არ ვძრავთ.
ჩვენი სამშობლოს ისტორიის მცოდნენი ხოპის დაარსებას მეათე საუკუნის წინა დროს აკუთნებენ. ხსენებულ მონასტერში ასვენია მეათე საუკუნის ქართული ხელოვნების ხატები და ისეთი ფასდაუდებელი ნაშთი, როგორიც არის დიდებული თამარ დედოფლის გულზე საკიდი ჯვარი.
ხოპის მონასტერს აბრწყინებს კვართი ყოვლად წმიდა ღვთისმშობლისა, მთელი მარჯვენა მკლავი ხელიანა ქალწულმოწამე მარინესი და მაცხენა ხელი წმ. კვირიკესი.
გაზ. ,,შინაური საქმეები'', 1912 წ.''

რუბრიკის სხვა სიახლეები