დაიცავით თავი ოსტეოპოროზისაგან
ოსტეოპოროზის განვითარების მთავარი მიზეზია ჰორმონული დარღვევა და ორგანიზმში კალციუმის ნაკლებობა, რომელიც საჭიროა ძვლებისთვის. ოსტეოპოროზით უფრო ხშირად ქალები ავადდებიან, რადგან მათ უფრო თხელი ძვლები აქვთ, ასევე, მთავარ როლს თამაშობს ქალების ესტროგენები - ჰორმონები, მენოპაუზის დადგომამდე მონაწილეობენ ძვლების ფორმირებაში. შემდეგ კი, როდესაც ესტროგენები აღარ გამომუშავდება, ძვლები ძალიან სწრაფად კარგავს კალციუმს. იმისთვის, რომ გაიგოთ, ხომ არ გემუქრებათ ოსტეოპოროზი, ჩაიტარეთ გამოკვლევა დენსიტომეტრიით, რომელიც ზუსტად განსაზღვრავს ძვლების ქსოვილის სიმკვრივეს და ადრეულ სტადიაშივე არკვევს დაავადებას.
ოსტეოპოროზის პირველი სიმპტომებია - სიმაღლეში კლება და აღნაგობის შეცვლა, რასაც იწვევს ძვლების სიმკვრივის შემცირება, ხერხემლის შეკუმშვა, ღამით ფეხის ტერფებისა და წვივების დაბუჟება, ძლიერი გადაღლილობისა და გაღიზიანების შეგრძნება, ღრძილების ტკივილი, ფრჩხილების სიმყიფე, აჩქარებული გულისცემა. და თუ, არცთუ ისე მაღალი ადგილიდან გადმოვარდით და მოიტეხეთ ხელი ან ფეხი - ესეც საგანგაშო სიმპტომია.
ოსტეოპოროზის განვითარებას რომ ხელი შევუშალოთ, აუცილებელია ექიმის მიერ დანიშნული პრეპარატების მიღება, მაგრამ, როგორც ყველა დაავადება, უფრო ადვილია მისი თავიდან აცილება, ვიდრე მკურნალობა.
მთავარია კალციუმის შემცველი პროდუქტებით კვება (დღეში 100მგ). კალციუმით მდიდარია: რძე, ხაჭო, მაგარი ყველი, თევზი, ლობიო, ხილის ჩირი, კაკალი, შვრია, წიწიბურა, კვერცხი, კარაქი, ნიახური, ზეთისხილი. თუ საკვებში კალციუმი ნაკლებია, არ დაგავიწყდეთ კალციუმის პრეპარატების მიღება.
ოსტეოპოროზის პროფილაქტიკა ასევე ითვალისწინებს მოძრაობას - ფეხით სიარულს, დილით სირბილს, ცურვას, ნებისმიერ ფიზიკურ დატვირთვას, რომლებიც არ იწვევს ტრავმებს და ამაგრებს ძვლების ქსოვილს. გახსოვდეთ: სპორტს უნდა მისდიოთ რეგულარულად, არანაკლებ კვირაში 3-ჯერ. თუ ოსტეოპოროზი დაწყებულია, ფიზიკური ვარჯიშების დაწყებამდე მიმართეთ ექიმს.