სწორი კვების ფორმულა - კვირის პალიტრა

სწორი კვების ფორმულა

როგორ უნდა იკვებებოდნენ სხვადასხვა პროფესიის ადამიანები და აქვს თუ არა მნიშვნელობა, რას საქმიანობს პიროვნება, როდესაც მის ყოველდღიურ მენიუს განვიხილავთ - ამ და სხვა საინტერესო საკითხებზე ექიმი ლაშა უჩავა გვესაუბრება:

- ცოცხალ ორგანიზმს ნორმალური ცხოველმყოფელობისათვის განუწყვეტლივ ესაჭიროება გარემოდან საყუათო ნივთიერებების მიწოდება. ცნება "საყუათო ნივთიერებები" არ უნდა ავურიოთ ცნებაში "საკვები პროდუქტები", რადგან საყუათო ნივთიერებებს მიეკუთვნება: ცილები, ცხიმები, ნახშირწყლები, მინერალური მარილები, ვიტამინები და წყალი. ეს ნივთიერებები ამა თუ იმ ოდენობით შედის სხვადასხვა საკვებ პროდუქტში.

ძირითადი საყუათო ნივთიერებების კალორიულობა შემდეგია:

1 გრამი ცილა - 4.1 კკალ

1 გრამი ნახშირწყლები - 4.1 კკალ

1 გრამი ცხიმი - 9.3 კკალ

ადამიანისათვის აუცილებელი კალორიების რაოდენობა დამოკიდებულია სამუშაოზე, ფიზიკურ აქტივობაზე, სქესზე, ასაკსა და გეოგრაფიულ სარტყელზე (ცხელი და ცივი კლიმატი).

კვებასთან ერთად აუცილებელია სრულფასოვანი ძილი. სასურველია თავად მოვიწესრიგოთ და არა საძილე საშუალებებით, რათა ორგანიზმმა მოახერხოს სრული დასვენება და ენერგიის აღდგენა.

კვების სტილის მიხედვით შეიძლება გამოვყოთ შემდეგი ჯგუფები:

I ჯგუფი - მიეკუთვნებიან გონებრივად მომუშავე ადამიანები, რომელთა უმეტესობა დროს მჯდომარე მდგომარეობაში ატარებს. მათი დღიური მოთხოვნილება დაახლოებით 2000 კალორიას შეადგენს. მაღალია ისეთი დაავადებების განვითარების რისკი, როგორიცაა: გულ-სისხლძარღვთა სისტემის დაავადებები, ოსტეოართროზი, ვარიკოზული ვენები, მეხსიერების დაქვეითება-გაფანტულობა. ასეთ დროს საკვები რაციონი უნდა იყოს მდიდარი: ხილით, ბოსტნეულით, მცენარეული ზეთით, ბურღულეულით (წიწიბურა, დაცეხვილი ბურღულისგან დამზადებული პროდუქტები), რძის პროდუქტით, მჭლე სახეობის ხორცის და თევზის პროდუქტებით, რომლებიც მდიდარია ისეთი საყუათო ნივთიერებებით, როგორიცაა: კალციუმი, ბოჭკო, რკინა, ვიტამინები A, E, C და D. ამ დროს კვებიდან არ გამოირიცხება ნაღების კარაქიც, მაგრამ სრულად უნდა იყოს გამორიცხული სპრედი და ასევე წვრილად დაფქული მარცვლეული, არ არის რეკომენდებული დიდი რაოდენობით ყავა, ის სასურველია შეიცვალოს მწვანე ჩაით, არ უნდა დაგვავიწყდეს სუფთა წყლის სმა და რაციონში უნდა შევზღუდოთ გაზიანი და ხილის წვენები.

II ჯგუფი - მიეკუთვნებიან ის ადამიანები, რომლებიც შედარებით ნაკლებ ფიზიკურ შრომას ეწევიან. მათი დღიური ნორმა შეადგენს 2000-2500 კალორიამდე.

ფიზიკური აქტივობისას სასურველია, კვების რაციონი გაჯერებული იყოს ცილოვანი პროდუქტებით (ხორცი, რძის პროდუქტი, კვერცხი, თევზი), რათა არ გამოიფიტოს კუნთოვანი სისტემა, ასევე კუნთის ნორმალური კუმშვადობისათვის მნიშვნელოვანია მაგნიუმი და B ჯგუფის ვიტამინები, რომლითაც მდიდარია თხილეული და მარცვლეული. ნახშირწყლების მიღება, ძირითადად, დღის პირველ ნახევარში (სამუშაოს დაწყების წინ) ჯობს როგორც გონებრივად, ასევე ფიზიკურად მომუშავე პირებისთვის. დიდი მნიშვნელობა აქვს სუფთა წყლის მიღებასა და ძილს.

III ჯგუფი - მიეკუთვნებიან ის ადამიანები, რომლებიც ჯანმრთელობისთვის მავნე საქმიანობას ეწევიან, რის გამოც შესაძლებელია ინტოქსიკაცია.

საბჭოთა პერიოდში ასეთი სამუშაოთი დაკავებულ პირებს სამსახურში ურიგდებოდათ რძე, რათა ტოქსინები განეიტრალებულიყო. მაგრამ მხოლოდ რძე არ არის საკმარისი, სხვა პროდუქტებიც არსებობს ტოქსინების დეაქტივაციისთვის: ზღვის კომბოსტო, რომელიც ანეიტრალებს მძიმე მეტალებს, ასევე მნიშვნელოვანია მცენარეული ფლავონოიდები, რომლითაც მდიდარია ჭარხალი, კარტოფილი, ალუბალი და გარგარი. ასეთ დროს რაციონიდან უნდა ამოიღოთ ისეთი პროდუქტები, რომლებიც მდიდარია საკვები დანამატებით, ემულგატორებითა და გაჯერებულია კონსერვანტებით, მაგალითად, ძეხვეული, სოსისი, კონსერვირებული პროდუქტები; ვჭამოთ ახალი ხილი და ბოსტნეული, რძის პროდუქტები და მსხვილად დაფქული ბურღულეული. ტვინის გამართულად მუშაობისთვისაც აუცილებელია გლუკოზით გაჯერებული პროდუქტები: თაფლი, შოკოლადი, მარმელადი, ჯემები და ხილის წვენი.

ეკა სალაღაია