აჭარა ესტონელი ჟურნალისტების ობიექტივში ხვდება - კვირის პალიტრა

აჭარა ესტონელი ჟურნალისტების ობიექტივში ხვდება

აჭარის გაცნობა უცხოელი ჟურნალისტებისთვის გრძელდება. ამჯერად, აჭარის ტურიზმის დეპარტამენტის მოწვევით რეგიონს ესტონელი ჟურნალისტები სტუმრობენ. ისინი აჭარის ტურისტულ პროდუქტებსა და სერვისებს ეცნობიან. მედიატურის მონაწილეებმა უკვე მოინახულეს ბათუმის ძირითადი ტურისტული ღირსშესანიშნაობები, დაესწრნენ დელფინების შოუს და დააგემოვნეს ადგილობრივი კერძები ქართული ფოლკლორის თანხლებით.

"როცა ჩემმა მეგობრებმა გაიგეს, რომ პრესტურით საქართველოში, კერძოდ კი ბათუმში მოვდიოდი მითხრეს შეგიყვარდებაო. ერთი დღეა აქ ვარ და უკვე ვგრძნობ როგორ მიყვარდება ეს რეგიონი თავისი ხალხით, გემრიელი კერძებით, არქიტექტურითა და ულამაზესი ტურისტული ადგილებით. ვფიქრობ, სწორია როცა თქვენი ქვეყნისა და რეგიონის რეკლამირებას ესტონეთში ეწევით. მე დარწმუნებული ვარ, რომ ესტონელებისთვის საქართველო ერთ-ერთი ყველაზე საყვარელი ტურისტული ადგილი იქნება თუ არ არის უკვე,“ ამბობს ესტონელი ჟურნალისტი ეია უუსი.

დღეს, ესტონელი ჟურნალისტები გონიო-აფსაროსის ციხე-მუზეუმსა და ეთნოგრაფიულ მუზეუმს "ბორჯღალო“ ესტუმრებიან. შემდეგ კი გზას მთიან აჭარაში გააგრძელებენ, სადაც ადგილობრივ ღვინის მარნებს, ტურისტულ ღირსშესანიშნაობებსა და კულინარიულ მასტერკლასებს გადაიღებენ. ჟურნალისტების ობიექტივში მოხვდება ბათუმის ბოტანიკური ბაღიც.

"აჭარის რეკლამირებას სამიზნე ქვეყნებში ისევ ვაგრძელებთ. დეპარტამენტის მოწვევით რეგიონში უკვე ვუმასპინძლეთ 20-ზე მეტ ინფო და პრესტურს, რომლის შედეგადაც სამიზნე ქვეყნების რეიტინგულ მედიასაშუალებებში აჭარის შესახებ საინტერესო და მრავალფეროვანი მასალები გამოქვეყნდა. თუკი წინა წლებში, მსგავსი ტიპის ღონისძიებები აქტიურად მხოლოდ ზაფხულის წინა პერიოდში ხორციელდებოდა, ახლა ეს გრძელდება მთელი წლის განმავლობაში. ამ ყველაფრის მიზანი კი რეგიონში წლის ოთხივე სეზონზე ტურისტების მოზიდვაა,“ განაცხადა აჭარის ტურიზმის დეპარტამენტის საერთაშორისო ტურიზმის სტიმულირების სამსახურის უფროსმა მიხეილ კოპლატაძემ.

ესტონელი ჟურნალისტები აჭარაში მოგზაურობის შთაბეჭდილებებს მაყურებლებსა და მკითხველებს ივლისის განმავლობაში გაუზიარებენ. ისინი რეგიონს ხვალ დატოვებენ.