გამომწყვდეული და ჯაჭვებით დაბმული ბავშვები - რატომ დააკავეს 13 შვილის დედ-მამა?
კალიფორნიის შტატის რივერსაიდის ოლქის პოლიციამ ცოლ-ქმარი დააკავა, რომლებსაც 2-დან 29 წლამდე ასაკის 13 შვილი გამომწყვდეული ჰყავდა, ზოგიერთი კი ჯაჭვებით იყო დაბმული. ამის შესახებ რივერსაიდის ოლქის შერიფის ოფისი იუწყება.
პოლიციის ინფორმაციით, 14 იანვრის დილით, 10 წლის გოგონა სახლიდან გაიქცა და სამაშველო სამსახურში დარეკა. გოგონამ განაცხადა, რომ მის მშობლებს სახლში მისი 12 და-ძმა ჯაჭვებით ჰყავს დაბმული.
"გოგონასთან მოკლე საუბრის შემდეგ პოლიციამ იპოვა 57 წლის დევიდ ალენ ტურპინი და 49 წლის ლუიზა ანა ტურპინი იმ სახლში, საიდანაც გოგონა გაიქცა", - ნათქვამია შერიფის ოფისის განცხადებაში.
მოგვიანებით გაირკვა, რომ რამდენიმე ბავშვი სახლში, ბნელ ოთახებში საწოლებზე იყო მიჯაჭვული. ყველა დაზარალებული მძიმე მდგომარეობაში, დიდი ხნის უჭმელი იყო.
"გარკვეული დროის განმავლობაში მშობლები ვერ აყალიბებდნენ იმის ლოგიკურ მიზეზს, თუ რატომ ჰყავდათ შვილები ასეთ მდგომარეობაში", - აღნიშნულია განცხადებაში.
პოლიციის განცხადებით, დაკითხვის შემდეგ ყველა დაზარალებულს საავადმყოფოში გამოკვლევები ჩაუტარდა, მშობლები კი დააკავეს.
"ინტერპრესნიუსი"