რუსეთმა ბრიტანეთის საელჩოს 23 თანამშრომელი "პერსონა ნონ-გრატად" გამოაცხადა
რუსეთის საგარეო საქმეთა სამინისტრომ "პერსონა ნონ-გრატად" გამოაცხადა დიდი ბრიტანეთის საელჩოს 23 თანამშრომელი და მოითხოვა, რომ მათ ერთი კვირის ვადაში დატოვონ ქვეყანა, - იუწყება სააგენტო "რია ნოვოსტი" რუსეთის საგარეო საქმეთა სამინისტროზე დაყრდნობით.
ამასთანავე, რუსეთი დიდ ბრიტანეთს სანკტ-პეტერბურგში ბრიტანეთის საკონსულოს დასახურად საჭირო დროს მისცემს, მუშაობის შეწყვეტის ვადები საერთაშორისო ნორმების შესაბამისად განისაზღვრება, - იუწყება სააგენტო ТАСС რუსეთის საგარეო საქმეთა სამინისტროში წყაროზე დაყრნობით. ასევე შეწყდება ბრიტანეთის საბჭოს საქმიანობა მისი სტატუსის დაურეგულირებლობის გამო.
შეგახსენებთ, რომ დიდი ბრიტანეთის პრემიერ-მინისტრმა ტერეზა მეიმ 14 მარტს პარლამენტში სიტყვით გამოსვლისას განაცხადა, რომ რუსეთის დაზვერვის ყოფილი ოფიცრის, სერგეი სკრიპალის მოწამვლასთან დაკავშირებით, დიდი ბრიტანეთი 23 რუს დიპლომატს გააძევებს. მისი თქმით, აღნიშნული გადაწყვეტილება მას შემდეგ მიიღეს, რაც ოფიციალურმა მოსკოვმა არ უპასუხა ლონდონის მოთხოვნას, განემარტა, თუ როგორ მოხვდა რუსეთში შემუშავებული მომწამლავი ნივთიერება დიდი ბრიტანეთის ტერიტორიაზე.
"ინტერპრესნიუსი"