"ჩვენ უნდა გავუადვილოთ სააკაშვილს შეცდომების აღიარება"
"ჩვენი პოლიტიკური ძალა დაიცავს ხმებს, რომელთაც ხალხი მოგვცემს"
"50%-იანი ბარიერი ის პრინციპია, რასაც არ დავთმობთ"
პოზიცია მიხვდა, რომ გაერთიანების გარეშე სააკაშვილის მორევა გაუჭირდება და ამიტომაც დაიწერა ოპოზიციური ძალების "სოლიდარობის აქტი". ნათქვამია, "გაჭირვება მანახე და გაქცევას განახებო". მიუხედავად იმისა, შალვა ნათელაშვილი ირაკლი ალასანიას გამუდმებით ერჩოდა და გაიძახოდა, "კულინარიელებში" მართლა ნამცხვრებს კი არ აცხობდაო, ახლა უკვე მის თანაპარტიელებს მასპინძლობს თავის ოფისში.
რამდენად გამოუვა ოპოზიციას სააკაშვილის ფალავნის, გიგი უგულავას ხალიჩაზე გაგორება, მით უმეტეს, რომ ბატონმა მერმა უკვე კარგა ხანია საარჩევნო სამზადისი წამოიწყო? ამ შემთხვევაში პროგნოზის გაკეთება ძნელია, მაგრამ იმის თქმა კი შეიძლება, რომ თბილისისთვის ბრძოლა ყველაზე მძიმე იქნება. ოპოზიციისთვის ხელისუფლებაში მისასვლელი გზა თბილისის მერის სავარძელზე გადის. ოპოზიციის მერობის ერთ-ერთი კანდიდატი ირაკლი ალასანია ისეთ დაპირებას აკეთებს, აქამდე არც ერთ ოპოზიციონერს რომ არ გაუკეთებია. რას ჰპირდება "ალიანსი საქართველოსათვის" ლიდერი ირაკლი ალასანია საზოგადოებას და როგორ აფასებს ოპოზიციის შანსებს, ინტერვიუდან შეიტყობთ:
- საარჩევნო კანონმდებლობაში ცვლილებებისას ხელისუფლებამ არ გაითვალისწინა თქვენ მიერ შეთავაზებული 50%-იანი ბარიერი. 30%-იანი ბარიერის პირობებში მიიღებთ არჩევნებში მონაწილეობას?
- 50%-იანი ბარიერი ის პრინციპია, რასაც არ დავთმობთ. თუ ეს პრინციპი დღეს ხელისუფლების გამო არ გავიდა, ხვალ, ხელისუფლება რომ შეიცვლება, საკანონმდებლო ცვლილება უსათუოდ მოხდება და თბილისელებს უმრავლესობით არჩეული მერი ეყოლებათ.
ჩვენ გავაგრძელებთ ბრძოლას ყველა იმ ელემენტის შესაცვლელად, რაც საჭიროა დემოკრატიული არჩევნების ჩასატარებლად. გადასაწყვეტია მედიასთან, კერძოდ, პირველ არხთან დაკავშირებული საკითხები. ყველაზე მტკივნეულია სამართალდამცავი და უშიშროების სტრუქტურების ჩარევა და პირდაპირი მონაწილეობა საარჩევნო პროცესებში. ეს ის საკითხებია, რომელთა გადაწყვეტის შემთხვევაში პოლიტიკური ძალა არჩევნებზე უნდა გავიდეს.
- ანუ 30%-იანი ბარიერის შემთხვევაშიც გადიხართ არჩევნებზე?
- ბარიერის აწევისათვის ბრძოლა უნდა გაგრძელდეს. ის, რომ პარლამენტმა რაღაც გადაწყვეტილება მიიღო, არ ნიშნავს იმას, რომ მისი შეცვლა არ შეიძლება, თუკი საზოგადოების ზეწოლა იქნება.
- გთხოვთ, კონკრეტულად მიპასუხოთ: თუ ბარიერი არ აიწია, 30%-იანი ბარიერის პირობებში მიიღებთ არჩევნებში მონაწილეობას?
- ეს დამოკიდებული იქნება არა მხოლოდ ბარიერის ზღვარზე, არამედ ზოგად გარემოზე. თუკი მინიმალურად მაინც გვექნება იმის გარანტია, რომ ეროვნული მაუწყებლობის არხების საშუალებით ჩვენი სათქმელი ამომრჩეველთან მივიტანოთ, თუკი დავინახავთ, რომ შს და უშიშროების სტრუქტურების დისტანცირება მოხდება არჩევნებისგან, ყველა პოლიტიკურმა ძალამ უნდა გამოიყენოს არჩევნები, როგორც ხელისუფლების შეცვლის ინსტრუმენტი.
ამიტომ არჩევნებზე რაც შეიძლება ბევრი ხალხი უნდა მოვიდეს. ჩვენ აგრესიულ, პროაქტიურ საარჩევნო კამპანიას ჩავატარებთ. მისი მნიშვნელოვანი კომპონენტი იქნება კონკრეტული, თემატური დებატები ხელისუფლებასთან.
- ფიქრობთ, რომ ხელისუფლება დებატებზე დათანხმდება?
- უნდა ვაიძულოთ. სხვა შემთხვევაში გამოაშკარავდება, რომ მათი პიარკამპანია მხოლოდ ზედაპირულ გაუმჯობესებას, ფასადურ ცვლილებებს ემსახურება. ჩვენ გვაქვს კონსულტაციები სხვა პოლიტიკურ ძალებთან. ვხედავ დიდ შესაძლებლობას, რომ პოლიტიკური ძალები შეთანხმდნენ არა მხოლოდ ერთ კანდიდატზე, არამედ მოქმედების სტრატეგიაზეც. ჩვენ ვთანამშრომლობთ "ეროვნულ ფორუმთან", ოპოზიციის საპრეზიდენტო კანდიდატ ლევან გაჩეჩილაძესა და მის მოძრაობასთან. ასევე კონსულტაციები გვაქვს კონსერვატორებსა და სხვა პოლიტიკურ ძალებთან. ვეძებთ ფორმებს, როგორ გამოვიყენოთ არჩევნების ინსტრუმენტი ხელისუფლების შესაცვლელად ისე, რომ ხელი არ შევუშალოთ ერთმანეთს.
- ოპოზიციის ერთი ნაწილი საკუთარ თავს "შეურიგებელს" უწოდებს. ხომ არ უნდა ველოდოთ, რომ ერთ დღეს თქვენც შეურიგებელი გახდებით?
- ჩვენ ხელისუფლების ქმედებებთან შეურიგებლობის გამო მოვედით პოლიტიკაში. თუმც აქვე უნდა ვთქვა, რომ შეურიგებლობა არ ნიშნავს ძალადობრივ და არაკონსტიტუციურ ნაბიჯებს. ერთადერთი გზა ცვლილებებისთვის არის არჩევნებში გამარჯვება. ამ გზას დაეხმარება ყველა სხვა მეთოდი: შეურიგებლობაც, პროტესტიც და კრიტიკული აზრის გამოთქმაც. ადგილობრივ არჩევნებში გამარჯვება უფრო მიგვაახლოებს ხელისუფლების ცვლილებასთან.
თბილისში დიდი მასშტაბით გაყალბება შეუძლებელია. მინდა ვუთხრა ჩვენს ამომრჩევლებს: ჩვენი ძალა მზად არის დაიცვას ამომრჩეველთა ხმები.
- ეს მნიშვნელოვანი დაპირებაა. აქამდე ოპოზიცია ჩიოდა, რომ ვერ იცავდა ხმებს, რომელსაც მოსახლეობა აძლევდა.
- სწორედ ამან გააჩინა უნდობლობა. გაძლევთ პირობას, რომ ჩვენი პოლიტიკური ძალა დაიცავს ხმებს, რომელთაც ხალხი მოგვცემს.
- დააკონკრეტეთ, როგორ დაიცავთ ხმებს?
- ჩვენ ზონდერჯგუფებს არ ვქმნით, ჩვენი ძალა სიმართლეა. ჩვენ ვიცით იმ პირთა გვარები და მათ ვამხელთ. გარდა ამისა, არსებობს სხვა საშუალებებიც. მათ შორის საერთაშორისო თანამეგობრობის ნათლად ჩამოყალიბებული მიდგომა ამ არჩევნებისადმი. რეალურად, ეს არჩევნები რეფერენდუმია დემოკრატიაზე. ამ არჩევნებს არავინ უყურებს, როგორც მხოლოდ თბილისის მერის ან ადგილობრივ არჩევნებს. ეს იქნება გადამწყვეტი ეტაპი როგორც დასავლეთთან ჩვენი ურთიერთობის, ისე ქვეყნის შიგნით პოლიტიკური ვითარების სტაბილიზაციისათვის.
- შალვა ნათელაშვილის წინადადება გაეროს ეგიდით არჩევნების ჩატარების თაობაზე რამდენად მისაღებია თქვენთვის?
- თითქმის ყველა ოპოზიციური ძალა არ ენდობა არჩევნების არსებულ სისტემას, ამიტომაც ის აუცილებლად და სასწრაფოდ შესაცვლელია. რაც შეეხება არჩევნების ორგანიზებას გაეროს მიერ, ამ ეტაპზე არარეალურად მიმაჩნია.
- ახლაც მიიჩნევთ, რომ ხელისუფლებასთან დიალოგს აზრი აქვს?
- არ შეიძლება პოლიტიკური ძალა გამოეთიშოს მოლაპარაკების პროცესს იმის გამო, რომ რაღაც ეტაპზე შედეგი ვერ მიიღო. არადა ამ მოლაპარაკებებს შედეგი უკვე აქვს. ხელისუფლება საერთაშორისო თანამეგობრობის თვალში გაშიშვლდა, როდესაც მათმა წარმომადგენელმა მოლაპარაკების პროცესი დატოვა.
- კუბლაშვილის პროვოცირება "ალიანსს" დაბრალდა.
- აბა, ვის დააბრალებდნენ? ამ ქმედებამ საერთაშორისო თანამეგობრობა დაარწმუნა, რომ ხელისუფლებას ცვლილებების პოლიტიკური ნება არ ჰქონდა. გარდა ამისა, მცირედი დათმობები და საარჩევნო სისტემის ოდნავ გაუმჯობესება უკვე შეინიშნება. გარდა ამისა, ხელისუფლებას წავართვით არგუმენტი, რომ პოლიტიკურ ოპოზიციას არა აქვს სურვილი და უნარი პოლიტიკურ პროცესსა და მოლაპარაკებებში მიიღოს მონაწილეობა.
- რამდენადაც ვიცით, იმ რეგიონებში, სადაც ოპოზიცია იმარჯვებდა, ადგილობრივ ორგანოებს ბიუჯეტიდან ძუნწად აფინანსებდნენ. თუკი თბილისის მერი გახდით, იმედი გაქვთ, რომ სააკაშვილი ფულს მოგცემთ?
- რა თქმა უნდა. ლეგიტიმურად არჩეულ მერს სამართლებრივად შეუძლია მოითხოვოს ბიუჯეტის ის ნაწილი, რომელიც დედაქალაქშია თავმოყრილი. ჩვენ უნდა დავიბრუნოთ ის გადასახადები, რაც თბილისს სჭირდება ბიუჯეტის შესავსებად. ჩვენი გამარჯვების შემთხვევაში, დედაქალაქის დაფინანსების შეზღუდვა ხელისუფლებას კარგს არაფერს მოუტანს. თუკი ეს ნაბიჯი გადადგა, ნათელი გახდება, მოსახლეობის პრობლემებში ვინ იქნება დამნაშავე.
- თქვენი აზრით, სააკაშვილი როგორ პოლიტიკურ ფორმაშია?
- მისი საქმიანობის შედეგად ქვეყანა ჩავარდა ძალზე მძიმე მდგომარეობაში. ქვეყანამ დაკარგა ტერიტორიები, ეკონომიკა იმდენად ვერ განვითარდა, რომ ქვეყანაში დასაქმების პრობლემა გადაწყვეტილიყო.
სააკაშვილი გამოუვალ მდგომარეობაშია, ის დაპირებები, რაც მან გასცა ხელისუფლებაში მოსვლისას, მისი ხელისუფლების პირობებში არ ასრულდება. დაპირებები იმიტომ ვერ შეასრულა, რომ მძიმე პოლიტიკური შეცდომები დაუშვა. ალბათ, ამის აღიარება ძნელი იქნება. ამიტომაც საზოგადოებამ და მასთან დაპირისპირებულმა ძალებმა უნდა შექმნან ისეთი პირობები, რომ ამის გაკეთება გაუადვილდეს.
- ხელისუფლება ოპონენტებს ხშირად უკავშირებს რუსეთს. ამის საბაბად გასულ კვირას სალომე ზურაბიშვილის წიგნი "ქართული ქრონიკები" იქცა.
- ეს წიგნი ჯერ არ წამიკითხავს და ვერ შევაფასებ. არ ვიცი, რა ჩათვალა არასწორად ხელისუფლებამ. ვფიქრობ, ამ წიგნში ისეთი არაფერი იქნება, რაც ჩვენმა საზოგადოებამ არ იცის. ჩვენი ხელისუფლების ყველაზე დიდი პრობლემა სწორედ გადაწყვეტილების მიღების არასათანადო პროცესი და ამ გადაწყვეტილებების საიდუმლოების დაცვა იყო.