"ქვეყანა თავზე გექცეოდეს და კარასინს მხოლოდ პურმარილზე ელაპარაკებოდე?!" (ექსკლუზივი) - კვირის პალიტრა

"ქვეყანა თავზე გექცეოდეს და კარასინს მხოლოდ პურმარილზე ელაპარაკებოდე?!" (ექსკლუზივი)

"შეკვეთილ სტატიებში ფულის ფლანგვის ფუფუნება ჩვენ არა გვაქვს."

"მინიონმა, ალბათ, იგულისხმა, რამდენიმე თვეღა დაგრჩენიათ კოაბიტაციის რეჟიმში და, ბიჭებო, გაუძელითო"

" გირჩევთ, ონიშენკოს გამოსვლებზე თავი არ აიტკივოთ - როგორც იტყვიან, Take it Easy, ანუ გავატაროთ, რა"

საგარეო საქმეთა სამინისტროში მისულებს ხალისიანი განწყობა დაგვხვდა. იმის ფონზე, რაც შიდა ქართლში ხდება, ასეთი სიხალისე გვეუცნაურა, თუმცა საგარეო საქმეთა მინისტრმა მაია ფანჯიკიძემ აგვიხსნა: "ბავშვთა დაცვის დღის აღსანიშნავად ღია კარის, "ევროპის დღე" მოვაწყვეთ. თბილისის სხვადასხვა სკოლიდან 70 მოსწავლე (მათგან 20 იძულებით გადაადგილებული ოჯახებიდან) სამინისტროში მოვიყვანეთ. პატარები ჩავსვით ავტობუსებში, დავურიგეთ პასპორტები, რომლის ფურცლებზეც ევროკავშირის ქვეყნების ფოტოებია გამოსახული და 11 საელჩო მოვატარეთ. ეს ყველაფერი ბავშვებს ძალიან მოეწონათ და ჩვენც მათი განწყობა გადმოგვედო".

- რაკი მთელი კვირა შიდა ქართლში მავთულხლართების გაბმა და ადამიანების გატაცებაა უმნიშვნელოვანესი თემა, ამით დავიწყოთ. როგორ შეაფასებთ იმას, რაც კონფლიქტის ზონაში ხდება?

- ეს სასიამოვნო შეხვედრა ძალიან რთული კითხვით დაიწყეთ. ჩემთვის ალოგიკური და აუხსნელია, რატომ გადაწყვიტა რუსეთის ხელისუფლებამ ურთიერთობის გამწვავება მაშინ, როდესაც ვცდილობთ ურთიერთობის ნორმალიზებას. ამდენი დადებითი რამ მიდის საქართველოდან, როდესაც საქართველოს ხელისუფლების არც ერთ წარმომადგენელს არ გაუკეთებია არც აგრესიული, არც უკმეხი და არც მწვავე განცხადება რუსეთზე. ადამიანების გატაცება 2008 წლიდან =ხდებოდა და მავთულხლართების გაბმაც 2011 წელს დაიწყო, მაგრამ ამან ახლა ინტენსიური ხასიათი მიიღო და მეშინია, მეტად არ გახშირდეს ასეთი შემთხვევები. აქედან გამომდინარე, ჩვენი რეაქციაც მძაფრი და მკაცრი იყო.

- მას შემდეგ, რაც ახალი ხელისუფლება რუსეთთან ურთიერთობის ნორმალიზაციის პოლიტიკას დაადგა, იყო მათგან პოზიტიური სიგნალი, რომ ეს გამწვავება მოულოდნელად მოგეჩვენათ?

- ჩვენგან არაერთი ნაბიჯი გადაიდგა ამ ურთიერთობის ნორმალიზებისკენ და ბურთი ახლა მათ მხარესაა, ისინი კი ასე გვპასუხობენ... რუსული მხარისაგან თუკი რამეს მოველოდი, მოველოდი პოზიტივს და არა ნეგატივს. ვერ ვიტყვი იმასაც, რომ იყო რაიმე სიგნალი, რაც ოპტიმიზმის საფუძველს მომცემდა. ჩვენ ბევრი რამ გავაკეთეთ ნორმალიზებისთვის: იქნებოდა ეს რიტორიკა (რაც არ არის უმნიშვნელო რამ) თუ კონკრეტული შეთავაზებები, თუნდაც სოჭის ოლიმპიადაში საქართველოს მონაწილეობა. აქედან გამომდინარე, პასუხად ურთიერთობის გამწვავებას არ ველოდი. რა თქმა უნდა, არც იმის იმედი გვქონდა, რომ რუსეთი დღეს-ხვალ ოსეთისა და აფხაზეთის აღიარებას უარყოფდა, მაგრამ ველოდით მინიმუმ მცირე, სიმბოლურ ნაბიჯებს რუსეთის მხრიდან.

- "ნაციონალური მოძრაობის" წარმომადგენლები ნორმალიზების პოლიტიკის დაწყებისთანავე აცხადებდნენ, როგორი ენითაც უნდა ველაპარაკოთ რუსეთს, ის აგრესიულ ბუნებას და ზრახვებს არ შეიცვლისო. იქნებ რუსეთმა ჩვენი პოზიცია დათმობად ჩათვალა და უარესი გააკეთა?

- ჩვენ მათზე ნაკლებად არ ვიცით ისტორია და ის, ვისთან გვაქვს საქმე, მაგრამ იმ ურთიერთობის ფორმამ, რაც ადრე იყო, კარგი არაფერი მოგვიტანა. მისი ალტერნატივა არის დათბობა.

როდესაც აგრესიას არ მოაქვს შედეგი, მეორე ხერხი უნდა იხმარო.

- ადმინისტრაციული საზღვრის 300 მეტრით გადმოწევის შესახებ საგარეო უწყების სხვადასხვა წარმომადგენლისაგან განსხვავებული შეფასებები მოვისმინეთ. პაატა ზაქარეიშვილი ერთს ამბობდა, ზურაბ აბაშიძე - მეორეს, თქვენ - მესამეს. ისეთი შთაბეჭდილება დარჩა, რომ ხელისუფლების ცალკეულ შტოებს შორის კოორდინაცია იყო დარღვეული.

- 22-25 კილომეტრის გასწვრივ რუსეთი სხვადასხვა სიღრმეზე შემოიჭრა. თუ იმას გულისხმობთ, რომ თითქოს მე ვთქვი, - რუსები 25 კილომეტრით შემოიჭრნენო, ასე არ ყოფილა. ჟურნალისტმა არასწორად გაიგო ჩემი ნათქვამი. თუ იმ დალოცვილმა ის გაიგო, რომ რუსეთი 25 კილომეტრით შემოიჭრა, კითხვა როგორ არ გაუჩნდა, - ე.ი. უკვე თბილისში ყოფილან და აბა, სად არიანო?

- ზურაბ აბაშიძემ განაცხადა, საოკუპაციო ხაზის გადმოწევის თემა არ განიხილება ჩემი და გრიგორი კარასინის შეხვედრაზე, ეს საკითხი ჟენევის მოლაპარაკებაზეა განსახილველიო, თქვენ კი ბრძანეთ, ამ შეხვედრაზე ეს თემა თუ არ განიხილეს, აბა, სხვა რა უნდა განიხილონო. თავის მხრივ, გრიგორი კარასინმაც თქვა, ამაზე არ ვისაუბრებთო... რატომ იყო ამდენად განსხვავებული შეფასებები?

- გპირდებით, რომ მიუხედავად იმისა, რა თქვა კარასინმა, ამ თემას ზურაბ აბაშიძე დასვამს. არ მითქვამს, რომ ამ შეხვედრაზე ამ საკითხს დეტალურად განიხილავენ, მაგრამ ამ თემაზე აუცილებლად ვისაუბრებთ. საზოგადოდ, ეს საკითხი მართლაც ჟენევის მოლაპარაკების ფორმატშია განსახილველი, მაგრამ... დაზარალებული კარასინი არ არის, დაზარალებული ჩვენ ვართ და ვერ წარმომიდგენია, ქვეყანა თავზე მექცეოდეს, შევხვდე კარასინს, ღვინოსა და პურმარილზე ველაპარაკო და არ ვუთხრა, ბატონო გრიგორი,  როდესაც დათბობასა და სიტუაციის გამოსწორებაზე ვლაპარაკობთ, ასეთ რამეს რატომ აკეთებთ? აბაშიძე მხოლოდ სპეციალური წარმომადგენელი ხომ არ არის, კაცს სამშობლოზე გული შესტკივა და როგორ შეიძლება ამაზე გაჩუმდეს?

- "ღვინისა და პურმარილის" თემაზე დღეს რუსეთის მთავარმა სანიტარმა ონიშენკომაც გამოთქვა აზრი - "ბორჯომი" დაგვიწუნა და ღვინის გასაკეთებლად "ყურძნის გაფუჭება" დაგვაბრალა....

- მე ამ ადამიანის გამოსვლებს მიღმა რაციონალური აზრის დანახვა მიჭირს და თქვენც და ქართველ საზოგადოებასაც გირჩევთ, თავი არ აიტკივოთ - როგორც იტყვიან, Take it Easy, ანუ გავატაროთ.

- ევროპის საბჭოს საპარლამენტო ასამბლეის პრეზიდენტმა ჟან-კლოდ მინიონმა შეშფოთება გამოთქვა საქართველოს ტერიტორიაზე მავთულხლართების გაბმის გამო. მისი შეშფოთების მეორე მიზეზი ვანო მერაბიშვილის დაკავებაა. ევროპა, შეშფოთების გარდა, კიდევ რას აკეთებს?

- ევროკავშირის პრეზიდენტი ქვეყანა იყო საფრანგეთი, როდესაც 2008 წელს ცეცხლის შეწყვეტის შესახებ 6-პუნქტიანი ხელშეკრულების დადებას შუამავლობდა. ამ ხელშეკრულების შეუსრულებლობას რომ ახსენებს რუსეთს აბსოლუტურად ყველა, ფაქტია, მაგრამ ვერაფერს მივაღწიეთ. მიუხედავად ამისა, რუსეთმა უნდა იგრძნოს წნეხი.

- და რა რეაქცია აქვს ამ წნეხზე რუსეთს? ის ამას არც იმჩნევს.

- რუსეთის რეაქცია სხვა თემაა, მაგრამ წნეხი არ უნდა შესუსტდეს და არავის უნდა გაუჩნდეს ილუზია, რომ მსოფლიო ოდესმე შეეგუება იმას, რაც საქართველოში ხდება.  სტრატეგიას, რომ რუსეთზე არსებობდეს საერთაშორისო წნეხი, თავისი მნიშვნელობა აქვს. ეს პოლიტიკა უსათუოდ მოიტანს შედეგს.

- პრემიერმა კოსოვო ჩვენთვის მისაბაძ მაგალითად დაასახელა. ეს კონფლიქტი კი თუმცა მშვიდობიანად, მაგრამ ფაქტობრივად, კოსოვოს დამოუკიდებლობის აღიარებით დამთავრდა...

- როდესაც პრემიერმა კოსოვოს შემთხვევა მოიყვანა მაგალითად, იგულისხმა, რომ დაპირისპირებული მხარეებიც ახერხებენ შერიგებას. თუმცა ის დასასრული - დამოუკიდებლობის აღიარება ჩვენთვის მიუღებელია და დარწმუნებული ვარ, პრემიერსაც კოსოვო ამ აზრით არ დაუსახელებია. ვფიქრობ, ამგვარი "მოგვარება" მიუღებელია როგორც ჩვენთვის, ასევე მსოფლიო თანამეგობრობისთვისაც.

- თქვენ არ მიპასუხეთ, ჟან-კლოდ მინიონის შეშფოთებაზე ვანო მერაბიშვილის დაკავების გამო.

- ჩვენ ბატონ მინიონსაც ვთხოვეთ, რომ ევროპის საბჭომაც გამოგზავნოს დამკვირვებლები. ჩვენს ინტერესებშია, რომ აქ ძალიან ბევრი დამკვირვებელი იყოს. ისინი ისეთ დასკვნას დადებენ, რომლითაც გამოჩნდება, რომ ამ ქვეყანაში არც შერჩევითი სამართალია და არც ტყუილად იჭერენ ვინმეს. ერთ ჩვენს უცხოელ პარტნიორს, რომელიც ასევე შეშფოთებული იყო, ვკითხე, მე, მინისტრმა, რომელსაც მრავალმილიონიანი ბიუჯეტი მაბარია, რომ ავდგე და ბიუჯეტის ფული "შევჭამო" - შვილს გადავურიცხო სწავლისთვის, ბიძაშვილს ან სხვა ვინმეს საჩუქარი ვუყიდო და უფროსობამ დამაფაროს ხელი, რამდენიმე წლის მერე ამის გამო ოპოზიცია რომ აყვირდეს, გამოამზეუროს ეს საკითხი და  დაიდოს საბუთები, რომ ეს მიკეთებია, მოვიდეს არჩევნები და ამის გამო გადამირჩიონ, ეს  საკმარისი სასჯელი იქნება-მეთქი? ჩემს დასასჯელად ისიც საკმარისი იქნება, რომ მინისტრი აღარ ვიქნები, სამაგიეროდ, მილიონები შემრჩეს და სახლში წამოვწვე?! ასეთი მიდგომით მაძლევთ იმის საშუალებას, რომ ეს ვაკეთო. რადგან, თუ გადარჩევის მერე დამიჭერენ, თქვენ დამიცავთ და იტყვით, რომ ეს იყო პოლიტიკურად მოტივირებული დაჭერა-მეთქი. ჩემს ამ კითხვაზე უცხოელმა პარტნიორმა ვერაფერი მიპასუხა.

თუ გერმანიის ექსპრეზიდენტს (ქრისტიან ვულფი. - ავტ.) 720 ევროსთვის შეიძლება სასამართლო პროცესი გაუმართო, საქართველოში მილიონებზე რატომ არ უნდა გაიმართოს პროცესი, არ ვიცი.

ევროპაში აიტანენ, ეს რომ გაიგონ რომელიმე პოლიტიკოსზე? თანაც, არ შეიძლება ახალი ხელისუფლების მინისტრებმა იფიქრონ, თუ ბიუჯეტის ფული შევჭამე, მაქსიმუმ, შეიძლება გადამირჩიონ და ეგ არისო. არაერთხელ გამიგონია, ისინი უკვე დასაჯა ამომრჩეველმაო. Dარარჩევა სასჯელი არ არის.

ახალმა ხელისუფლებამ მოსვლიდან 6 თვეში ისეთი რამ გააკეთა, რაც არ გაუკეთებია სააკაშვილს. შს მინისტრის მოადგილე დაიჭირა, სოფლის მეურნეობის სამინისტროს თანამშრომლები დააკავეს და კიდევ მიდის სხვა საქმეების გამოძიებაც. თუ ეს შერჩევითი სამართალია, მხოლოდ ოპოზიციას უნდა იჭერდნენ.

- მინიონმა ასევე ახსენა, რომ კოაბიტაციის განვითარება აუცილებელია...

- ალბათ, იგულისხმა, რამდენიმე თვეღა დაგრჩენიათ კოაბიტაციის რეჟიმში და, ბიჭებო, გაუძელითო (იცინის).

- ქართველ საზოგადოებას აქვს განცდა, რომ დასავლურ პრესაში "ქართული ოცნებისა" და "ნაციონალური მოძრაობის" ლობისტების ომია გაჩაღებული.

- გარწმუნებთ, ჩვენ არა გვყავს ლობისტები, წინა ხელისუფლება კი არც ფიქრობს მათ მოშორებას. მათ სამი ინსტრუმენტი ჰქონდათ საგარეო ასპარეზზე ჩვენთან საბრძოლველად: საელჩოები, ლობისტები და მათი პირადი კონტაქტები. იმ სამი იარაღიდან, რაც ჰქონდა "ნაციონალურ მოძრაობას", ჩვენ არც ერთი არ გაგვაჩნდა, მაგრამ მაინც ბევრს მივაღწიეთ, რადგან სწორ პოლიტიკას სუფთა ხელებით ვაკეთებთ და რა ხრიკებიც უნდა გამოიყენონ, სიმართლე მაინც გაიმარჯვებს. რაც შეეხება უცხოურ პრესას, იმდენს დავდივარ, მეტი აღარ შეიძლება. არ ყოფილა არც ერთი ვიზიტი, სადაც 3-4 ინტერვიუ არ მიმიცია. შეკვეთილ სტატიებში ფულის ფლანგვის ფუფუნება კი ჩვენ არა გვაქვს.

- პრეზიდენტმა განაცხადა, მთავრობის წევრებს რამდენჯერმე შევთავაზე, ჩემთან ერთად იარონ ვიზიტებზე, მაგრამ არ დადიანო.

- ეს პირველად ახლახან შემოგვთავაზა: პრეზიდენტის პროტოკოლის სამსახურის უფროსმა დამირეკა, ეკვადორში ვაპირებთ წასვლას და თქვენი მოადგილე გამოგვაყოლეთო. მანამდე კი საგარეო სტრუქტურას სრულ იგნორირებას უკეთებდა.

- 17 მაისის აქციაზე თუ ისაუბრეთ ჩვენს უცხოელ პარტნიორებთან? ამ ფაქტმა საქართველოსადმი დამოკიდებულება ხომ არ შეცვალა?

- არა მგონია, ამან ჩვენდამი დამოკიდებულება შეცვალოს. Mმეც ვგმობ იმას, რაც მოხდა. ყველა დემოკრატიული ქვეყნის ვალია, ძალადობა და ჰომოფობია დაგმოს და ეს სრულიად ბუნებრივი რეაქცია იყო, მაგრამ ამის გამო გადაჭარბებული იქნება იმის თქმა, რომ  საქართველო ჩამორჩენილი ქვეყანაა, რომელსაც დემოკრატიასთან შეხება არა აქვს. იგივე რამ შეიძლება სხვაგანაც მოხდეს. ეს არ არის მხოლოდ ჩვენი პრობლემა. ევროპის ქვეყნები ნელ-ნელა მიდიან იქით, რომ ჰომოსექსუალიზმი ნორმალურ მოვლენად ჩათვალონ. ყველა ქვეყანას თავისი რიტმი აქვს, გამომდინარე მისი ტრადიციებიდან, შეხედულებებიდან და საზოგადოებრივი აზრიდან. თუმცა ძალადობა ყოველთვის უნდა დაიგმოს, მით უმეტეს, თუ ამაში ეკლესია მონაწილეობს.

- ვილნიუსის სამიტისა და ნატოს კვირეულისგან რას ელით?

- ვილნიუსის სამიტზე მოხდება ევროკავშირთან ასოცირების ხელშეკრულების პარაფირება. მასში შევა ღრმა და ყოვლისმომცველი თავისუფალი სავაჭრო ზონის შესახებ შეთანხმება. ასევე დავამთავრებთ ვიზების ლიბერალიზაციის პირველ ეტაპს. ნატოს კვირეულიც ძალიან მნიშვნელოვანია. რასმუსენთან ერთად ყველა ქვეყნის ელჩი ჩამოდის. გაიმართება ნატო-საქართველოს კომისიის სხდომაც. N"ნაკ"-ი (ჩრდილოატლანტიკური საბჭო) ასე არ დადის ყველა ქვეყანაში - ეს წინ გადადგმული ნაბიჯია ნატოსთან ინტეგრაციის გზაზე.

"ხალხის დაპატიმრება ახლა არ დაწყებულა. მხოლოდ დიცში არ ხდება ეს ამბავი. სოფლებში, სადაც ომის შემდეგ პირობითი საზღვარი გაჩნდა, რუსები ისე იქცევიან, როგორც უნდათ... 2008 წლის ომის შემდეგ სამაჩაბლოში რუსი ბატონობს, ჩვენ კი პატრონი არ გვყავს. ოკუპანტის გავლებული ზღვარი შუაზე კვეთს ეზოს, ყანას, ვენახს, საძოვარს, სახლსაც კი და ზოგჯერ გავიწყდება, რომ იქ აღარაფერი გესაქმება. გადადგამ ნაბიჯს და თავზე დაგადგება "ვანია", წაგათრევს ცხინვალში და კიდევ ერთხელ რომ დაგიმტკიცებს შენს უსუსურობას, ვითომ სამშვიდობო ორგანიზაციებისთვის ანგარიშის გაწევის გამო გაბრუნებს უკან. თუ ხასიათზე არიან, შუამავლებიც არ სჭირდებათ, ისე ათავისუფლებენ "საზღვრის დამრღვევებს".

ალბათ, დროდადრო საკუთარ თავს ახსენებენ, რომ ძალაც და უფლებაც მათია, თორემ ომის შემდეგ აღარავის კლავენ. დიცის ამბების გახმაურება მედიის დამსახურებაა. აქამდე სად იყვნენ? 2008 წლის შემდეგ აქ სულ ასეთი ამბავია. ჟურნალისტები გამოჩნდნენ და რუსმა მავნებლობას მოუხშირა. ზოგჯერ ისიც კი გვგონია, რომ შეთანხმებულად მოქმედებენ, თითქოს ჟურნალისტი იმიტომ გვეტანება, რომ რუსმა თავისი ძალა შეგვახსენოს და ხალხმა კიდევ ერთხელ დაინახოს, ვინ არის ამ მიწის ბატონ-პატრონი" - ამბობენ დიცელები და მიაჩნიათ, სანამ საზღვარი როკთან არ დაბრუნდება, სამასი მეტრით იქით და აქეთ გადაწევაზე რუსთან ლაპარაკი სიბრიყვეა.

ტერიტორიული მთლიანობის საკითხთა დროებითი საპარლამენტო კომისიის თავმჯდომარე გია ვოლსკი: - ადრე მხოლოდ გეუბნებოდნენ, თუ გადმოხვალთ, დაგიჭერთო. ახლა მავთულხლართებით ამაგრებენ ზღვარს, სათვალთვალო კამერებით იარაღდებიან, პატრულირებასაც შემოიღებენ, ალბათ და სახელმწიფო საზღვარს დაამსგავსებენ აქაურობას. მავთულხლართების გაბმა საგანგაშო ამბავია, მაგრამ ეს არის ერთ-ერთი გამოვლინება იმ დიდი უბედურებისა, რომელიც დაგვიტოვა "ნაციონალურმა მოძრაობამ" - ოკუპანტებს ძველი სამხედრო რუკები უჭირავთ და ჯიპიარესით ადგენენ ავტონომიური ოლქის ძველ ადმინისტრაციულ საზღვარს. ეს არის ამ ტერიტორიაზე 2006 წელს ჩატარებული ანტიკონსტიტუციური არჩევნების გამოძახილი. ე.წ. ალტერნატიულ პრეზიდენტს რომ ირჩევდა, მაშინ თქვა სააკაშვილმა, სამხრეთ ოსეთის ავტონომიური ოლქის ძველ საზღვრებში უნდა ჩატარდეს არჩევნებიო. ეს სულელური და ავანტიურისტული პროექტი რითაც დამთავრდა, ყველამ ვიცით! ახლა რუსები სწორედ იმ საზღვრის აღდგენას ცდილობენ...

იმ დროს რუსეთი პროვოკაციებს თავს არიდებდა. სააკაშვილი შლიდა მომლაპარაკებელ სტრუქტურებს, რასაც მოლაპარაკებების ჩაშლა მოჰყვა. ნაციონალები ამტკიცებდნენ, რომ ცხინვალი არის ამოსაღები კბილი და რუსებს ის არ აინტერესებთ. ამასთან, პრეზიდენტი სოხუმში დაბრუნების პირობას გვაძლევდა. როდესაც არ არსებობს სტრუქტურა, რომელიც მოლაპარაკებებს გამართავს, ქვეყნის მთავარსარდალი კი გვარწმუნებს, რომ ცხინვალსა და სოხუმს დაიბრუნებს, ე.ი. მან ძალა უნდა გამოიყენოს. ასეთმა განცხადებებმა მისცა საშუალება რუსეთს, გაემართლებინა თავისი სამხედრო აგრესია. სააკაშვილი ისე მოიქცა, რომ რუსეთს მიზნების მისაღწევად დიდი ძალისხმევაც არ დასჭირვებია.

- ახლაც ხომ არ არის მცდელობა, ქვეყანა კვლავ სამხედრო კონფლიქტში ჩაითრიონ?

- ყველაფრისთვის მზად უნდა ვიყოთ. როდესაც რუსეთის მოქმედებას აანალიზებ, ყველაფერი დასაშვებად მიგაჩნია. არ უნდა ვიფიქროთ ისე, როგორც სააკაშვილის დროს ფიქრობდნენ - რუსეთი როკიდან შემოსვლას ვერ გაბედავსო.

- რა უნდა გაკეთდეს, რომ საფრთხე თავიდან ავიცილოთ?

- გააგრძელო მოლაპარაკებები და დაელოდო იმ დროს, როდესაც მოსახლეობა წელში გამართვას შეძლებს, ოჯახები გადარჩება და სოფლები არ დაიცლება. ამასობაში მოლაპარაკებები გაგრძელდება ყველა თემაზე, რაზეც ხელი მიგვიწვდება ჟენევის თუ სხვა ფორმატით, მკაცრ პოზიციას გამოვხატავთ გაეროში. აბაშიძე-კარასინის შეხვედრებისასაც არ უნდა დავიშუროთ ენერგია, რომ პოლიტიკურ თემებზე ლაპარაკის საფუძველი შევქმნათ. არის მეორე გზაც, რომელსაც "ნაციონალური მოძრაობა" გვთავაზობს. დროებით დავივიწყოთ სამაჩაბლოს საკითხი, შევწყვიტოთ მოლაპარაკებები, ავაშენოთ დემოკრატიული ინსტიტუტები, განვავითაროთ ეკონომიკა. შედეგად გავხდებით ევროკავშირის და ნატოს წევრი ქვეყანა და მერე შევძლებთ რუსეთთან საჭირო ტონით ლაპარაკს.

- ეს რამდენად რეალურად გეჩვენებათ?

- რისი გაკეთებაც თვითონ არ შეეძლოთ, იმ თემებზე საუბარს თავს არიდებენ. მოლაპარაკების სისტემას ექვსი წელი ანგრევდნენ და ახლა უტიფრად აცხადებენ, "ქართული ოცნება" ამბობს, ომი ცხინვალში საქართველომ დაიწყოო. ეს უზნეობაა. ასეთი განცხადებების მიზანი თავიანთი შეცდომების გადაფარვაა. ვფიქრობ, პრობლემის მოგვარების ერთადერთი გზა არის უსაფრთხოების დაცვა, სოციალურ-ეკონომიკური მდგომარეობის გაუმჯობესება.

- ოპონენტები ამას მხდალ პოლიტიკას უწოდებენ...

- მე კი გონივრულ პოლიტიკას დავარქმევ. როდესაც მხოლოდ შენ გეხება საქმე, შეგიძლია წინდაუხედავად მამაცი იყო, ხელი შეუბრუნო მოწინააღმდეგეს, ინფორმაციული სილაც გააწნა, მაგრამ როდესაც უკან სახელმწიფო დგას, უფლება არ გაქვს, ამბიციებს და ემოციებს ქვეყანა შესწირო. ასეთ დროს გონიერი მთავარსარდალი არ გაუშვებდა თავის ემისარს რუსეთში რევოლუციური მოძრაობის მხარდამჭერად და თან დემაგოგიურად არ განაცხადებდა, თითქოს რუსეთს ამით სამაგიერო გადაუხადა. "ნაციონალები" დაიჭირეს რუსეთში, მათ ქმედებას ორგანიზებული დანაშაულის კვალიფიკაცია მიეცა. ითქვა, ეს საქართველოს მხედართმთავრის პოლიტიკააო. ამაზრზენი იყო პროვოკაციული დეტალების ჩართვაც - "რევანშისტების" მხრიდან ყოველ წუთში მეგობარი ქვეყნების ხსენება, რომ თითქოს ფული და მხარდაჭერა იქიდან აქვთ. ასეთი საქციელი, რბილად რომ ვთქვათ, უპასუხისმგებლობაა. ვიმეორებ, როდესაც მხოლოდ შენს თავზე აგებ პასუხს, რაც გინდა, ის გააკეთე, მაგრამ როდესაც პასუხს აგებ ხალხის უსაფრთხოებაზე, თან არც მაინცდამაინც ვაჟკაცობით გამოირჩევი და თვითმფრინავის ხმაზე მიწაზე წვები, ისე მოიქეცი, როგორც ეროვნული უსაფრთხოების ინტერესები მოითხოვს.

- დღეს სად უნდა გავავლოთ ზღვარი?

- თუ გვინდა, რომ სახელმწიფო გადარჩეს, ზღვარი უნდა გავავლოთ უმეცარ საქციელსა და გეგმაზომიერ მოქმედებას შორის და ყველაფერი კარგად იქნება.

იზო რიკაძე

ვაჟა თავბერიძე

ეკა ლომიძე