კვალი უგულავამდე მიდის?! - კვირის პალიტრა

კვალი უგულავამდე მიდის?!

მაშინ, როდესაც საქართველოს ნატოს გენერალური მდივანი სტუმრობდა, თბილისის მერიისა და საკრებულოს 23 თანამშრომელი ჯერ დააკავეს, მერე გამოუშვეს. თუმცა ცოტა ხანში ისევ დააკავეს მერიის 4 თანამდებობის პირი: მერის მოადგილე დავით ალავიძე, თბილისის განვითარების ფონდის თავმჯდომარე დავით ავალიანი, შესყიდვების სამსახურის უფროსი ალექსი თაბუაშვილი და მთაწმინდა-კრწანისის გამგებლის მოადგილე დიმიტრი ჩხეიძე. ფინანსთა სამინისტროს საგამოძიებო სამსახური მერიის მაღალჩინოსნებს 50 მლნ ლარამდე გაფლანგვა-მითვისებას ედავება.

ფინანსთა სამინისტროს საგამოძიებო დეპარტამენტის უფროსის მოადგილე მამუკა ვასაძის თქმით, არ არის გამორიცხული, რომ კვალი გიგი უგულავამდე მივიდეს.

50 მილიონ ლარამდე ბიუჯეტიდან მოპარვის საქმეში სამი ეპიზოდია: პირველია პლასტიკური ბარათების ეპიზოდი. ამ ეპიზოდში 15 მლნ ლარამდეა გაფლანგული; მეორე ეპიზოდია 35 მლნ ლარამდე გამოტანა "ლიბერთი ბანკიდან" და მესამე ეპიზოდი შეეხება ფურშეტების მომსახურებას. Aამ ეპიზოდში ბიუჯეტიდან 700 ათასი ლარია მითვისებული.

როგორც გამოძიების მასალებიდან ირკვევა, თბილისის განვითარების ფონდის ანგარიშზე "ლიბერთი" ბანკში" 8 თვის განმავლობაში მერიიდან 60 მლნ ლარამდე ჩაირიცხა. "ლიბერთი"ბანკში" 719 პირისთვის პლასტიკური ბარათი დამზადდა. ოფიციალური ვერსიით, პირები, ვის სახელზეც ეს ბარათები დამზადდა, რეალურად არ ირიცხებოდნენ მერიის განვითარების ფონდის კადრებში.A 30 კაცი თვეების განმავლობაში იღებდა თანხებს ბანკომატებიდან და მერე ეს ფული "ნაციონალური მოძრაობის" პარტიულ ღონისძიებებს ხმარდებოდა.

მეორე ეპიზოდი ეხება საბანკო ანგარიშიდან 35 მლნ-ის მიმთვისებელს, თბილისის განვითარების ფონდის ყოფილ ხელმძღვანელ გიორგი საბანაძეს. მას "ლიბერთი ბანკიდან" თანხა ჩეკით გაჰქონდა. საბანაძემ 35 მილიონის გასატანად 8-ჯერ ჩაატარა საბანკო ოპერაცია.

მერიის თანამშრომლების გასულ კვირას დაკავებას კი უკვე მოჰყვა უფლებადამცველების მწვავე შეფასებები და საპარლამენტო უმცირესობის პროტესტი, რომელმაც ბოიკოტი გამოაცხადა საპარლამენტო მუშაობაზე.

კახა კუკავა, საკრებულოს წევრი:

"ნაციონალური მოძრაობის" წევრები პარლამენტის სხდომას დაესწრებიან თუ არა, საკანონმდებლო ორგანოს ამით არაფერი დააკლდება

- მერიის თანამშრომლების დაკავების ფორმასა და მათ ბრალეულობაზე რას ფიქრობთ?

- ვერ ვიქნები სოლიდარული ამ დაკავებულების მიმართ, რადგან ისინი სამართლებრივად და პოლიტიკურად პასუხისმგებლები არიან მიმდინარე პროცესებზე და უნდა დაისაჯონ კანონის მთელი სიმკაცრით. თუმცა, ეს არ ამსუბუქებს იმ რამდენიმე გამომძიებლის თუ პროკურორის პასუხისმგებლობას, რომლებმაც ისინი დააკავეს კანონის უხეში დარღვევით.

ამ საქმეში კვალი უგულავამდე უკვე მისულია, მაგრამ მიიღებს თუ არა პოლიტიკურ გადაწყვეტილებას ივანიშვილი, რომ უგულავა პასუხისმგებლობაში მიეცეს, დამოკიდებულია მის სიმტკიცეზე. ივანიშვილმა ბიზნესში საკმაო პრინციპულობა გამოავლინა, მაგრამ ეყოფა თუ არა მას პრინციპულობა, რომ ეს საქმე ბოლომდე მიიყვანოს? პრემიერის ირგვლივ არაფორმალური გავლენების დიდი შრეები ყალიბდება და ის გადაწყვეტილებებს ჭორების გავლენით იღებს.

რაც მალე გათავისუფლდება ივანიშვილი ამ არაფორმალური გავლენებისა და კარისკაცებისაგან, მით უფრო ეფექტური გახდება მისი მთავრობა.