მერაბ მეტრეველის კვირის ფიქრები
05-08-2013
მერაბ მეტრეველის კვირის ფიქრები
შავი ღრუბლები

"ქართული ოცნების" თავზე ნელ-ნელა შავი ღრუბლები იკრიბება. "ოცნება" ჯერ-ჯერობით ხალხისთვის ვერც პურის და ვერც სანახაობის შეთავაზებას ვერ ახერხებს. ეკონომიკაში არცთუ მთლად კარგადაა საქმე, ხოლო ე. წ. სამართლიანობის აღდგენის პროცესი ნელ-ნელა ჩიხში შედის. ახალაიას რამდენიმე ეპიზოდში გამართლებამ მათ მომხრეებში უკვე დათესა იმედგაცრუების მარცვალი. ადამიანები ფიქრობენ, რომ ახალი ხელისუფლებისგან შეიძლება ვერაფერი მიიღონ - დამნაშავეები დაუსჯელი დარჩნენ, ხოლო ეკონომიკური კეთილდღეობა კვლავ შორეულ ოცნებად დარჩეს. ალაპარაკდნენ ხელისუფლების უნიათობაზე. ხალხს მოჰბეზრდა სიტყვა "კოაბიტაცია",
პროკურატურის თავის მართლება, სასამართლოს ვითომ დამოუკიდებლობა... ეს ხომ პროკურატურის წაგებული პირველი საქმე არ არის? რამდენიმე კვირის წინ პროკურატურამ ახალციხის სასამართლოშიც წააგო ბორჯომის პოლიციის უფროსის საქმე, რომელსაც ადამიანის წამებასა და სკამის ფეხით გაუპატიურებაში ადანაშაულებდნენ.

ორი საქმე წამებასა და არაადამიანურ მოპყრობაზე და ორივე წაგებული, - აი, პროკურატურის
მონაგარი. არადა, ეუბნებოდნენ არჩილ კბილაშვილს, შეცვალე კადრები, არ გამოგადგება ადეიშვილის დროინდელი პროკურორებიო, მაგრამ ვერაფერი შეასმინეს.
წულუკიანსაც ეუბნებოდნენ, არ გამოვა სასამართლოს რბილი რეფორმაო, მაგრამ... როგორ ფიქრობთ, მოსამართლეები, რომლებიც ამდენი ხანი მონობას იყვნენ შეჩვეული, ახლა უცებ გახდებიან თავისუფალი? გარდა იმისა, რომ მონობაში გადიდკაცებულს ვერაფერი შეცვლის, ამ ადამიანებს იმდენი დანაშაულებრივი გადაწყვეტილება აქვთ მიღებული, რომ მათი დაშანტაჟება ყოფილი ხელისუფლების წარმომადგენლებს ყოველთვის შეეძლებათ. ხელისუფლება ჯერ კიდევ მაშინ უნდა მიმხვდარიყო სასამართლო რეფორმის მარცხს, როდესაც ვითომ თავისუფლებამიცემულმა მოსამართლეებმა იუსტიციის უმაღლეს საბჭოში ისევ ის ხალხი აირჩიეს, ვინც კუბლაშვილს აწყობდა, შემდეგ კი მათი არჩეული ზაზა მეიშვილი "ნაციონალური მოძრაობის" და ევროპის სახალხო პარტიის ერთობლივ ღონისძიებაზე აღმოჩნდა.

"ოცნებამ" უსუსურად სცადა სიტუაციიდან გამოსვლა: განაცხადეს, ახალაიას საქმემ გამოაჩინა, რომ სასამართლო დამოუკიდებელიაო.
არ მეგონა, ხალხი "ოცნებასაც" თუ სულელი ეგონა. უფრო სწორად, ხალხის ასე გასულელებას თუ გადაწყვეტდნენ. ნეტავ, ვინ მოიფიქრა, რომ ეს უნდა ეთქვათ?
რომელი ჭკვიანის თავში დაიბადა ასეთი გენიალური იდეა?! ნობელის პრემია ეკუთვნის ნამდვილად...  
ამას გარდა, ახალაიას გამართლების კვალდაკვალ ხელისუფლებამ დაიწყო ასეთი განცხადებების გაკეთება: უკან ყურებას თავი დავანებოთ და წინ გავიხედოთ, ამდენი დაჭერა საჭირო არ არის, ბიზნესსა და ეკონომიკას სტაბილურობა სჭირდება და ა. შ. ეს რას ნიშნავს, რომ უარს ვამბობთ დამნაშავეების დასჯაზე? რომ ისევ ყველას ყველაფერი უნდა შერჩეს, რათა ახლებმაც იფიქრონ, რომ მათაც შერჩებათ? ჭკვიანმა კაცმა თქვა: იქ, სადაც არ არის სამართალი, არ არის მშვიდობაო, ხოლო მე დავამატებ: სადაც არ არის მშვიდობა, ვერ იქნება ეკონომიკური განვითარება.

P.S. "ნაციონალურმა მოძრაობამ" კი დღეს ორი კურდღელი დაიჭირა: მისი გუნდის წევრი გაამართლეს, ხოლო "ოცნებას" საკუთარი მხარდამჭერები შემოსწყრნენ. ხელისუფლებას ისღა დარჩენია, სასამართლოს "დამოუკიდებლობით" იამაყოს!

კობა

მახსოვს, დავითაშვილი მოსკოვში რომ წავიდა და იქ ჟირინოვსკისთან ერთად სურათი გადაიღო, მწარედ გავაკრიტიკე, თუმცა მერე იგი ჩრდილოეთში სირბილსაც შეეშვა და ქართულ პოლიტიკაში ზედაპირზე ამოტივტივებაც მოახერხა. მართალია, რომ არა ივანიშვილის გადაწყვეტილება, ის საპარლამენტო სიაში ჩაესვა, ამას ვერ იზამდა, მაგრამ კობა მაინც იმსახურებს პოლიტიკაში ყოფნას. ბოლოს და ბოლოს, მემარცხენე ფლანგზე სრული სიცარიელეა - ნათელაშვილი სათვალავში ჩასაგდები აღარაა, ამიტომ დავითაშვილი ქართული პოლიტიკისთვის საჭიროა. მის იდეებს მთლად არ ვიზიარებ, მაგრამ როდესაც "ოცნებას" აკრიტიკებს, შეუძლებელია, არ დაეთანხმო. სწორად მოიქცა თუ არა, კოალიცია რომ დატოვა? ამას დრო გამოაჩენს. იქ ის თავს მაინც უცხოდ გრძნობდა. ამასთან, დღეს ოპოზიციის ფლანგი, ფაქტობრივად, თავისუფალია. "ნაციონალური მოძრაობა" ამ ფუნქციას ვერ ასრულებს, სხვები ვინ იცის, მოახერხებენ თუ არა იმიჯის აღდგენას. ამიტომ, რაც მეტი ძალა გამოჩნდება, მით უკეთესი. კობას წასვლა "ქართულ ოცნებას" არ დააზარალებს, სამაგიეროდ, გააძლიერებს ოპოზიციურ ფლანგს.

კიდევ ერთი კობა

წინა კვირას აქტუალური ორი კობა იყო: თუ ერთი წავიდა, მეორე შეიძლება დაბრუნდეს. ამ შემთხვევაში იოსებ ჯუღაშვილზე მოგახსენებთ. გორში კვლავ მისი ძეგლის დადგმას აპირებენო. რით ვერ მოინელეს ამ გორელებმა ეს სტალინის ძეგლი! ან "ნაციონალებს" რატომ ჰგონიათ, რომ ისინი ებრძოდნენ სტალინიზმს? "ნაციონალებმა" სტალინის დამარცხება საკუთარ თავში ვერ მოახერხეს და იმდენი გამბედაობაც არ ეყოთ, მისი ძეგლი ღამე ქურდულად არ აეღოთ. თუმცა ვერც ქართველმა ხალხმა მოახერხა სტალინის დამარცხება. ისევ ბელადებს ველოდებით და ისევ მოგვწონს მკაცრი ხელი. ამიტომაც გვინდა, ისევ პიედესტალიდან დაგვყურებდეს ბელადი, ამიტომაც ვეძებთ მასში კარგს და ვცდილობთ მის გამართლებას. მთავარი პრობლემა ის კი არ არის, სტალინის ძეგლს მუზეუმში დადგამენ თუ არა, არამედ ის, ვისწავლით თუ არა ისტორიის სწორად შეფასებას. შეძლებს თუ არა ჩვენი საზოგადოება, გამოვიდეს მითების ტყვეობიდან და ავს ავი უწოდოს, კარგს კი - კარგი. მთავარი ის კი აღარ არის, რას იტყვის მიშა, რომელიც სამ სიტყვაში ოთხ ტყუილს ამბობს, რომელიც 2010 წელს თავად უჭერდა მხარს ძეგლის მუზეუმის ეზოში გადატანას და ახლა კიდევ მთელი მსოფლიო შეგვიყარა, ქართველები ძეგლს აბრუნებენო. ძეგლი მთავარ მოედანზე არ უნდა იდგეს და არც ჩვენს გულებში, მუზეუმში - კი ბატონო.
11 აგვისტო 2013 18:32
(გაგრძელება) 2. დაგვპირდა, რომ პოლიტიკაში დარჩებოდა მანანამდე, ვიდრე შესაფერის სამეულს არ მოძებნიდა. ის რომ რესპუბლიკელები ბევრს არ მოგვწონს, იმის საფუძველს არ გვაძლევს უსუფაშვილი, როგორც პარლამენტის თავმჯდომარე დავიწუნოთ (ყოველშემთხვევაში პირადად მის, რაიმე გადაცდომაზე ვერავინ საუბრობს). არც იმაზეა საუბარი, რომ მარგველაშვილი შეუფერებელი პრეზიდენტობის კანდიდატია. რაც შეეხება პრემიერმინისტრის ინკოგნიტო კანდიდატურას, როგორ ფიქრობთ ბიძინა ივანიშვილი იმის კაცია, რომ თავისი თავგანწირვით მოპოვებული ესოდენ დიდი წარმატება და მისი თანმდევი პოპულარობა დაუფიქრებლი ნაბიჯით გააცამტვეროს? კარგით, რა ხალხნო და ჯამაათნო!ქვეყანაში უამრავი პრობლემაა, რომლის გადაწყვეტისათვის ჩვენი აქტიურობაა აუცილებელი და მოდით აქ ვიაქტიუროთ, ბიძინა ივანიშვილის ჭკუისმსწავლებელი არ მგონია საქართველოში ვინმე მოიძებნოს. სწორად შენიშნა ლევან ვასაძებ, "ტროას ცხენის ჯაშუშების" თაობაზე. უკვე ყველა ვხედავთ, მათი რაოდენობა საკმაოდ დიდია და მათგან ქვეყნის გაწმენდა კი წარმოუდგელად ძნელი, ამიტომ ჩვენ, საზოგადოების ყველა შერაცხადი წევრი ვალდებული ვართ, მათ წინააღმდეგ საბრძოლველად, როგორც ერთი, დავირაზმოთ.
ბატონო მერაბ, მეც თქვენსავით ბათუმელი ვარ. განსხვავება ისაა, რომ მე ბათუმიდან თქვენ დაბადებამდე წამოვედი, ხოლო დავბრუდი თქვენი ბათუმიდან წასვლის შემდეგ. დარწმუნებული ვარ მკითხველისათვის საინტერესო იქნება, თუ ამ საკურორტო სეზონში ერთ კვირას ბათუმს დაუთმობთ და მე და თქვენ, რომ იტყვიან "ტეტ ა ტეტ" ვისაუბრებთ ჩვენს ტკივილებზე ბათუმთან დაკავშირებით.
11 აგვისტო 2013 11:45
არა ბატონო მერაბ, ვერ დაგეთანხმები. შავი ღრუბლები ქართული ოცნების თავზე კი არა საქართველოს ცაზე დომინირებს და ეს სულაც არ არის ბიძინა ივანიშვილის დანაშაული, ეს პირადად ჩემიდან დაწყებული, საზოგადოების ყველა შერაცხადი წევრის დანაშაულია. შევეცდები მოკლედ ავხსნა, თუ რატომ ვთვლი ასე. საკონცერტო დარბაზში შეკრების დღიდან, ქართული ოცნების ცხოვრებით ვცხოვრობ. მიუხედავად ხანდაზმულობისა, ერთიშეხედვით ძალღონეს არ ვიზოგავ წარმატებისათვის ბრძოლაში, მაგრამ ახლა თვალი, რომ გადავავლე ჩემს "ნამოღვაწარს" დავინახე, რომ, როგორც მე ისევე ყველა ჩემნაირი "წყლის ნაყვით" ვერთობით და ქვეყანაში სამართიანობის აღდგენას ბატონი ბიძინასაგან ველით. ბატონმა ბიძინამ გააკეთა ჩემთვის წარმოუდგენელი რამ, გაიმარჯვა საპარლამენტო არჩევნებში და ნაციონალები მთლიანად ჩამოაშორა საარჩევნო სისტემას. თავიდანვე მარტო ამას, რომ დაგვპირებოდა მაშინაც ხომ იქნებოდა სახალხო გმირი? მან კი გაცილებით მეტი დაგვპირდა: 1. საზოგადოების ურთიერთ დაპირისპირების თავიდან აცილების მიძნით, აბსოლუტურად ყველა რიგით ნაციონალს მისცა საშუალება, დანაშაულის მონანიების შემდეგ,
ქვეყნის აღმშენებლობაში მონაწილეობისა,რაც საუბედუროდ, მხოლოდ ერთეულებმა გამოიყენეს. (თავი განსაკუღებით პროკურატურისა და შსს-ს თანამშრომლებმა "გამოიჩინეს", მათმა გარანტიის მიღებისთანავე გააჩაღეს აგიტმასიური პროპაგანდა ნაციონალების უმოკლეს ვადაში ხელისუფლებაში დაბრუნების თაობაზე და უდიდეს წარმატებასაც მიაღწიეს, საზოგადოების დიდი ნაწილი ისევ ისტერიული შიშის ქვეშ მოექცა). ბატონო მერაბ, თქვენ ბათუმელი ხართ და გეცოდინებათ, რა დაემართა ბათუმელებს, როცა მხოლოდ სიტყვიერი ბრძანების აღმასრულებელი ბათუმის პროკურორი თავისი დანაშაულობების დასაფარავად, აჭარის პროკურატურის საგამოძიებო დეპარტამენტის უფროსად დააწინაურეს, ხოლო ამის საპროტესტოდ პროკურატურასთან გამოსული მოშიმშილეები სასტიკად დაარბიეს. (გაგრძელება იქნება)
12-12
06 აგვისტო 2013 11:37
სასამართლო 100 % არის დამოუკიდებელი, ოღონდ ამ ხელისუფლებიდან სულ ფეხებზე კიდია პროკურატურა და 100% არის დამოკიდებული წინა ხელისუფლებასთან. არ მინდა დავიჯერო, რომ ამას ვერ ხვდება იუსტიციის მინისტრი და ზოგადად ეს ხელისუფლება..

რედაქტორის რჩევით