"არანაირი გაცვლა-გამოცვლა თბილისსა და ქუთაისს შორის არ იგეგმება" - კვირის პალიტრა

"არანაირი გაცვლა-გამოცვლა თბილისსა და ქუთაისს შორის არ იგეგმება"

"ბევრნი არიან მთავრობაში და არ იქნებოდა ცუდი ოპტიმიზაცია"

"ნაციონალურ მოძრაობას" ძალიან ცოტა რამ ეთქმის, თუ საერთოდ ეთქმის რამე"

მთავარი პროკურორის დანიშვნის გაჭიანურება, რუსთაველის პროსპექტზე პარლამენტის ქუთაისისთვის გადაცემის ინიციატივა და შეკითხვები სოზარ სუბართან - ეს ის თემები იყო, რაზეც პარლამენტის თავმჯდომარე დავით უსუფაშვილმა პოლიტიკურ ტოქშოუ "Hard Talk - ემას შოუში" ისაუბრა. გადაცემა ყოველ პარასკევს, 21:30 საათზე, რადიო "პალიტრისა" და "პალიტრა TV"-ს ეთერში გადის.

გთავაზობთ დავით უსუფაშვილთან ინტერვიუს საგაზეთო ვარიანტს:

- ზურაბ ტყემალაძის ინიციატივით, თბილისში პარლამენტის შენობა შესაძლოა მიაკუთვნონ  ქუთაისს და ამით მარტივად მოგვარდეს ქუთაისიდან თბილისში პარლამენტის დაბრუნების საკითხი.

- ჯერჯერობით გამარჯვება ნომინაციაში "2014 წლის ხუმრობა" ზურაბ ტყემალაძეს  ეკუთვნის. მის ამ მოსაზრებას საკმაოდ საინტერესო დებატებიც კი მოჰყვა. არადა, ბატონი ზურაბი თავად ამბობს, ისეთ ხუმრობას რა ვუთხარი, ნახევარი სიმართლე რომ არ იყოსო. ამ ყველაფერში სიმართლის ნაწილიც არის - ჩვენ ვაპირებთ რუსთაველის პროსპექტზე მდებარე პარლამენტის შენობაში მუშაობას, მაგრამ არანაირი  გაცვლა-გამოცვლა თბილისსა და ქუთაისს შორის არ იგეგმება.

- თქვენ განაცხადეთ, რომ პარლამენტის წევრები ასანთის ღერებს ჭედავდნენ ხმის მიცემის პულტებში. როგორც ვიცი, კომპანია "სონის" წარმომადგენლობასაც კი მიმართეთ, რომ რამე გამოსავალი მოეძებნათ ამის აღსაკვეთად. ეს პრობლემა მოგვარდა პარლამენტში?

-  ჩვენ მართლაც მივმართეთ ასეთი მოთხოვნით კომპანიას, რომელიც რუსთაველის პროსპექტზე მდებარე შენობაში უზრუნველყოფს სხდომათა დარბაზის ტექნიკურ აღჭურვას. ახალი ტექნოლოგიით პარლამენტარები ხმას მისცემენ არა ღილაკზე, არამედ ეკრანზე თითის დაჭერით. ვფიქრობ, ეს სისტემა გამორიცხავს ყოველგვარ გაუგებრობას.

ხშირია შემთხვევა, როცა უმცირესობის წარმომადგენლები სხედან დარბაზში,  მაგრამ რეგისტრაციას არ გადიან. ამიტომ ჩვენ ორივე ტიპის პრობლემა უნდა მოვაგვაროთ - პრობლემა იმ პარლამენტარებისა, რომლებიც არ არიან დარბაზში, მაგრამ ახერხებენ ხმის მიცემას, ასევე იმ პარლამენტარებისა, რომლებიც არიან დარბაზში და რეგისტრაციას არ გადიან.

- პრემიერ-მინისტრმა ღარიბაშვილმა ჟურნალისტებთან თქვა, რომ არ აღიარებს "ნაციონალურ მოძრაობას" როგორც ოპონენტ პოლიტიკურ ძალას. თქვენთვის, როგორც პარლამენტის თავმჯდომარისთვის, რამდენად მისაღებია პრემიერის ასეთი დამოკიდებულება ოპონენტის მიმართ?

-  "ნაციონალურ მოძრაობას", როგორც პოლიტიკურად, ისე მორალურად, ძაAლიან ცოტა რამ ეთქმის, თუ საერთოდ ეთქმის რამე. მაგალითად, როცა "ნაციონალური მოძრაობა" ლაპარაკობს კანონის უზენაესობაზე, ადამიანის უფლებების დაცვაზე, რა თქმა უნდა, უმრავლესობას გვიჩნდება განცდა: როგორ, თქვენ ლაპარაკობთ იმაზე, რაც უმაღლეს სტანდარტებში აიყვანეთ? ამიტომ ვეუბნებით, რომ თქვენთან ოპონირებას არ ვაპირებთ ამ თემაზე, რადგან ვერ და არ ვხედავთ ამაში აზრს.

ეს დამოკიდებულებაა ამ ფრაზის შინაარსი და არა ის, რომ ისინი თითქოს რეალურად არ არსებობენ. რა თქმა უნდა, "ნაციონალური მოძრაობა" არსებობს, ჯერ კიდევ აქვს ნიშა საზოგადოებაში. ვინმეს წელიწად-ნახევრის წინ რომ წამოსცდენოდა, "ნაციონალური მოძრაობა" არჩევნებში 60-70%-ზე ნაკლებს მიიღებსო, ალბათ, სიცილით დაიხოცებოდნენ. ამ საპრეზიდენტო არჩევნებზე ოფიციალური შედეგი -  22% მათთვის ძალიან სერიოზული წარმატებაა. მათდამი დამოკიდებულება უფრო მეტად საზოგადოებაზეა დამოკიდებული, ვიდრე თუნდაც ჩემზე ან პრემიერ-მინისტრზე და ამას ყველა მომავალი არჩევნები უკეთ გამოაჩენს.

- თქვენ, როგორც პარლამენტის თავმჯდომარეს, რომელ მინისტრთან გაქვთ ყველაზე მეტი კითხვა?

- თუ პარლამენტს არა აქვს კითხვები მთავრობასთან, მაშინ ჯობს, პარლამენტი დავხუროთ. ვერ გამოვარჩევ მინისტრებს, ვისთან უფრო მეტი კითხვა მაქვს და ვისთან - ნაკლები, შეიძლება ერთი კითხვა მქონდეს, მაგრამ ძალიან მნიშვნელოვანი. პარლამენტს აქვს თავისი წესი და რიგი კითხვის დასმისა. ეს კონსტიტუციით არის რეგლამენტირებული და ჩემი თანამდებობრივი მდგომარეობიდან გამომდინარე, მე არა მაქვს უფლება, ტელეეთერიდან დავუსვა კითხვები მინისტრებს.

- არა გაქვთ უფლება, დაურეკოთ რომელიმე მინისტრს და ჰკითხოთ თქვენთვის საინტერესო თემაზე? მაგალითად, არ გინდათ ჰკითხოთ სოზარ სუბარს, რატომ არ ინახება  ვიდეოჩანაწერები 24 საათზე მეტხანს, მაშინ როცა ჩვეულებრივ სავაჭრო ობიექტშიც კი სულ მცირე, 10 დღე ინახავენ?

- ამას ვაკეთებ კიდეც. მაგალითად, სანამ თქვენთან მოვიდოდი, მქონდა საუბარი მინისტრთან ევროინტეგრაციის საკითხებში ალექსი პეტრიაშვილთან. კონკრეტული კითხვები მქონდა და მივიღე პასუხები. კიდევ მომიწევს მასთან დარეკვა. ორიოდე დღის წინ მქონდა სატელეფონო საუბარი კახი კალაძესთან. ასევე ველაპარაკე საგარეო საქმეთა მინისტრს.

- ყველა ჩამოთვალეთ სუბარის გარდა...

- არა, რატომ ყველა, 18 მინისტრია და ჯერ სამი დავასახელე. ვფიქრობ, ბევრნი არიან მთავრობაში და არ იქნებოდა ცუდი ოპტიმიზაცია, თუმცა ეს არ არის ხვალ-ზეგ გადასაწყვეტი საკითხი. მხოლოდ სამინისტროების რაოდენობაში არ არის საქმე. ჩვენ საარჩევნოდ დავპირდით საზოგადოებას, რომ ოპტიმალური საჯარო სამსახური გვექნება. ადგილობრივი თვითმმართველობის რეფორმის პროცესშიც მოხდება გარკვეული ოპტიმიზაცია.

რაც შეეხება შეკითხვას სუბართან: ამ თემაზე მე კითხვა რამდენჯერმე დავსვი და მინდა კიდევ ერთხელ ვკითხო სოზარ სუბარს:

ხომ არ ჯობდა, ბატონო სოზარ, ის, რომ ჩანაწერები 24 საათის შემდეგ უკვე წაშლილი იყო, რადგან ასეთია სისტემა, საზოგადოებისთვის გვეთქვა შემდეგი 24 საათის განმავლობაში ან იმ დროს, როცა ეს თავად მინისტრისთვის გახდა ცნობილი?

მგონი, ჯობდა, რადგან ამით თავიდან ავიცილებდით აურზაურს ამ თემაზე.

- გაჭიანურდა მთავარი პროკურორის დასახელება.

-  დაკვირვებით მიმდინარეობს კანდიდატურების  შერჩევა.  მეტს ვერაფერს გეტყვით, არა იმიტომ, რომ რამეს გიმალავთ, არამედ იმიტომ, რომ არ ვიცი. ეს იუსტიციის მინისტრისა და პრემიერ-მინისტრის გადასაწყვეტი საკითხია.

- ტალინში ყოფნისას განაცხადეთ, რომ საქართველოს მაპ-ის მოლოდინი აქვს და თუ ეს შედეგი არ დადგება, შესაძლოა, პრობლემები ევროინტეგრაციის კუთხითაც გამოიკვეთოს.

- ნატოში ინტეგრაციისთვის საქართველოს სჭირდება მუდმივი პროგრესი. ერთი ადგილის ტკეპნა ნიშნავს იმას, რომ ჩამოვრჩით პროცესებს და თუ ჩვენ ჩამოვრჩით, ე.ი. სხვა წინ მიდის. სხვა კი არის ის ძალა, რომელსაც საქართველოს მომავალი სხვაგვარად წარმოუდგენია. კონკრეტულად ჩვენი ჩრდილოელი მეზობელი - რუსეთი.  ნატო ჩვენი უსაფრთხოების ინსტრუმენტია და ამ ინსტრუმენტის მისაღებ პროცესში სასურველია პროგრესი. ერთ ადგილას ყოფნა ამ პროცესის შეფერხებას ნიშნავს. მე ეს ვთქვი ტალინშიც და ამას ვამბობ თბილისშიც.