"კვირის პალიტრა" ზურაბ ჟვანიას საქმესთან დაკავშირებით მამუკა არეშიძეს, გოგლა ჟვანიას, გიგი წერეთელსა და ხათუნა ხოფერიას ესაუბრა.  

მამუკა არეშიძე: "პირველ სერიაში გარდაცვალების ადგილი გაირკვევა, შემდეგ სერიაში კი დამნაშავეები"

"ოფიციალურ ვერსიაზე მეტი ინფორმაცია არ მქონია და ჩემი ეჭვები სხვა ფაქტებმა ჯერჯერობით ვერ გადაწონა"

"მიშა მაჭავარიანს და მისნაირ მატყუარებს ისტერიკა აქვთ"

გოგლა ჟვანია: "გავრცელებული ფოტოების გარდა, სხვა მნიშვნელოვანი ფოტოებიც და მასალაც არსებობს"

ხათუნა ხოფერია: - გამკვირვებია იმ პირთა არაადეკვატურობისა, რომლებიც თავს ზურას მეგობრებად მიიჩნევენ.…თუკი სიმართლის მხარეს დგანან, რატომ იბრძვიან "სიცოცხლის უკანასკნელ წუთამდე" იმის დასამტკიცებლად, რომ ზურა იმ ძუნძგლიან სახლში გაზით გაიგუდა? მით უფრო, რომ გამოქვეყნდა ფოტოები და მათ გასაქარწყლებლად არავითარი არგუმენტი არ მომისმენია. მნიშვნელოვნად მიმაჩნია, იუსუპოვის სხეულზე ორი ნაჩხვლეტი. რაულზე ბევრი კითხვის ნიშანია...

ზურას თავის ქალაზე აღენიშნება სისხლჩაქცევა, რომელიც შესაძლოა ბლაგვი საგნით არის მიყენებული. დაცემით ეს სისხლჩაქცევა ვერ განვითარდებოდა, რადგან ეს თავის ზედა ნაწილია. რასაკვირველია, ეს სიცოცხლეში მიყენებული ტრავმაა. სხვათა შორის, ამ ფოტოზე ჩაცმულია ზურაბ ჟვანია. მაია ნიკოლეიშვილმა კი დაადასტურა, რომ საქმეში ზურას ტანსაცმელი არ ფიგურირებს, ე.ი. მასზე  ექსპერტიზაც კი არ ჩატარებულა. არადა, მახსოვს, თავიდან გამოძიებამ გაავრცელა ვერსია, რომ გარდაცვლილი პრემიერი სავარძელში იჯდა და პიჯაკი ეცვა. ამ ფოტოებში კი ზურა იატაკზე წევს და თანაც პერანგში.

როგორ უპასუხებს შეკითხვებს სააკაშვილი, რომელიც ძალიან მშიშარაა. დარწმუნებული ვარ, მის გარეშე ვერავინ ვერაფერს გაბედავდა. პროკურატურას ვთხოვ, დაინტერესდეს,
იმ ავბედითი დილის 4 საათზე რატომ დაურეკა სააკაშვილმა გიორგი ბარამიძეს, ავარიაში მოვყევი და მოდიო.

ამით არ მისცა საშუალება, ჟვანიას სანახავად წასულიყო. უნდა დაჰკითხონ შავნაბადის დაცვის სამსახურის თანამშრომლები, რომლებიც ზუსტად აღწერენ, იყო თუ არა იმ ღამეს სააკაშვილი შავნაბადაზე. უნდა დადგინდეს მისი იმღამინდელი მარშრუტი. თუკი გამოძიებამ არ იცის, ვინ იყვნენ შავნაბადის დაცვის ეს წევრები, მკითხონ და დავუსახელებ...

- ეჭვობთ, რომ პრემიერი შავნაბადაზე მოკლეს?
- მაქვს შეკითხვები და მათზე პასუხის გაცემას ვითხოვ.

- ხომ არ დაგვისახელებთ შავნაბადის დაცვის სამსახურის იმ წევრთა გვარებს, ვის დაკითხვასაც ითხოვთ?
- გამოძიებას ვეტყვი...

მამუკა არეშიძე: - ჟვანიას ვაი-მეგობრებს დაუჟინიათ, დელიკატური თემებიაო. ასეც რომ იყოს, არავის აქვს საქმის შეკერვის უფლება. ერთი რამ ცხადია: ეს ხალხი იმ ბინაში არ დახოცილა. ჩემი ინფორმაციით, ფაქტი სხვაგან მოხდა, მაგრამ შემთხვევის ადგილი რომ არ დაფიქსირებულიყო, საჭირო გახდა გვამების გადატანა. პირველი სერია სწორედ ეს იქნება. გაირკვევა, სად გარდაიცვალნენ, შემდეგ სერიად გვაჩვენებენ, ვინ არიან კონკრეტული დამნაშავეები.

- მერაბიშვილმა პირველი კომენტარისას ახსენა, რომ გაზით გარდაცვლილი პრემიერი სავარძელში იჯდა, პიჯაკი ეცვა და თავი გვერდით ჰქონდა გადაგდებული. სურათებში კი ცხედრები იატაკზეა. ეს ორი ფაქტი ერთმანეთს არ გამორიცხავს?
- მახსოვს ეს განცხადება, სწორედ ეს მიმყარებს აზრს, რომ ჟვანია და იუსუპოვი იქ არ დახოცილან. ცხედრებს ძალადობის კვალი აშკარად ემჩნევა. ამ საქმეში სააკაშვილს ცენტრალური როლი აკისრია. გასარკვევია, რატომ მიიტანეს გვამები მაინცდამაინც ამ ბინაში, რა მიზანი ჰქონდა მათ გადაადგილებას?

- ფიქრობთ, რომ სააკაშვილს შეეძლო, ადამიანი, პოლიტიკური ფიგურა საკუთარი ხელით მოეკლა?
- მეეჭვება, უფრო შეკვეთის ვერსიას ვემხრობი. ერთ-ერთი მოწმე ამბობს, რომ ჟვანია იარაღით მოკლეს და სავარაუდო მკვლელზეც საუბრობს. სააკაშვილი ბევრი რამის გამკეთებელია, მაგრამ ჟვანია რომ მოეკლა, ძალიან აფექტურ მდგომარეობაში უნდა ყოფილიყო. მას ყოველთვის ერჩია სხვისი ხელით რამის კეთება.

- იმასაც ამბობენ, ჟვანიასა და თემურ ალასანიას შორის ბიზნესწილების გამო რაღაც უკმაყოფილება იყოო...
- ვიცი, რომ აეროპორტთან დაკავშირებით ნამდვილად გადაიკვეთა მათი ინტერესები. ჟვანიას სხვებთანაც უხსენებია ეს საკითხი, შესაძლოა, ეს ცუდად დამთავრდესო.

გიგი წერეთელი: - ეს ფოტომასალა საქმეში იყო და, ოჯახის წევრების გარდა, სხვებსაც ჰქონდათ ნანახი. რამდენიმე დაზიანებაზე წლების განმავლობაში საუბრობდნენ, მაგრამ სენსაციური და მნიშვნელოვანი ფაქტები რომ ყოფილიყო, ვინმე იტყოდა. ექსპერტ ლევან ჩაჩუას დაკავებაც ეჭვს ბადებს. აიძულებენ, ათქმევინონ, რომ რაღაც გამოეპარა, ან სწორად არ ასახა...

ეს ამბავი ამერიკაში გავიგე და შოკში ჩავვარდი. წარმოუდგენლად მეჩვენა პრემიერის ასეთ ვითარებაში დაღუპვა. ვიფიქრე, რუსეთის სპეცსამსახურების ჩადენილია-მეთქი, მაგრამ ოფიციალურ ვერსიაზე მეტი ინფორმაცია არ მქონია და ჩემი ეჭვები სხვა ფაქტებმა ჯერჯერობით ვერ გადაწონა.

- არასოდეს გიკითხავთ გუნდში, როგორ აღმოჩნდა მათ სხეულებზე ძალადობის კვალი და რატომ იყო ეს ფაქტები დღემდე დამალული?
- მე ამას ვერ ავხსნი. გამოძიებამ უპასუხოს, რატომ იყო ვიღაცის შარვალი დასვრილი ან დაზიანებები სხეულზე.

- ეს თუ გიკითხავთ ოდესმე თქვენი ლიდერებისთვის და რა უპასუხიათ?
- რა თქმა უნდა, მაგრამ პასუხი იყო: დასკვნები არსებობს და დევს ოფიციალურ ვერსიად. ამ საკითხზე დისკუსია არ გამიმართავს.

გოგლა ჟვანია: - ბევრი მტკიცებულება  მოგროვდა, რის შესახებაც საუბარს ჯერ არ ვაპირებ. გავრცელებული ფოტოების გარდა, სხვა მნიშვნელოვანი ფოტოებიც და მასალაც არსებობს.

- ამ ფოტოებზე ზურაბ ჟვანიასა და რაულ იუსუპოვს ზუსტად ის აცვიათ, რაც წესით უნდა სცმოდათ, თუ ახალი ტანისამოსით არიან შემოსილი?
- არ მინდა, ამაზე საუბარი.

- არც იმას გვეტყვით, იუსუპოვს ორივე ფეხსაცმელი აცვია თუ არა რომელიმე  ფოტოზე?
- თავს შევიკავებ, რადგან ეს არ შედის გამოძიების ინტერესებში. მე არ მსურდა, რომ ეს ფოტოები გამოქვეყნებულიყო. ახლა ისტერიული ფონი შეიქმნა, რაც სავარაუდოდ, მცირე კორექციას მაინც შეიტანს გამოძიების მსვლელობაში, რომელიც უკვე დასკვნით სტადიაზეა.  

- როგორ შეაფასებთ ზურაბ ჟვანიას თანამოაზრეების განცხადებებს, რომლებსაც დღესაც სჯერათ პრემიერ-მინისტრის გაზით გაგუდვის ვერსია?
- სამარცხვინოა, როცა ვისმენ ტყუილებს, რომლებიც 5 წუთში იშიფრება. ახლახან მერაბიშვილი რომ დაჰკითხეს, მანაც თქვა, როცა  ბინაში შევედი, გაზის სუნი ვიგრძენიო. ნუთუ მას ვახო კომახიძის ფილმი მაინც არ უნახავს, რომ მისი ნათქვამი შეუსაბამო არ გამოსულიყო? დავუშვათ, არ იცოდა, რომ სამის ნახევარზე, როცა მან (ჩვენების მიხედვით) სუნი იგრძნო, ბინაში ბუნებრივი აირი გამორთული იყო, მაგრამ დავიჯერო, ზურას დაცვის წევრის, ძაძამიას ჩვენებაც არასდროს წაუკითხავს?! ის აღწერს, რომ ფანჯარა ჩატეხა და ისე შევიდა ბინაში - თუკი ფანჯარა ჩატეხილი იყო, ბუნებრივი აირის სუნი იქ ხომ ვეღარ იქნებოდა?!

ყოფილი ხელისუფლების წარმომადგენელთა უმრავლესობა შოკირებულია და აღარ იციან, რას ლაპარაკობენ.

მიხეილ მაჭავარიანმა ბუნებრივი აირით გაგუდვის ვერსიის განსამტკიცებლად მოწმედ გარდაცვლილი თამარ დეკანოსიძე მოიყვანა, არადა, მაშინვე გაირკვა, რომ ეს ქალი ექსპერტიზას საერთოდ არ ესწრებოდა. ახლა მაჭავარიანს და მისნაირ მატყუარებს ისტერიკა აქვთ.

- თუ გაქვთ ინფორმაცია, სად, რა ვითარებაში მოკლეს ზურაბ ჟვანია?
- ჩემი ვარაუდი მაქვს, თუმცა გამოძიება დასრულდება და  ყველაფერს ნათელი მოეფინება. პროკურატურას სააკაშვილთან ამ საქმეზე აქვს კითხვები...

უტა ბიწაძე