ახალ-ახალი კორუფციული სქემები - ჯოკია ბოდოკიას გზას მალე ბევრ სხვასაც გაუყენებენ?!
23-02-2015
ახალ-ახალი კორუფციული სქემები - ჯოკია ბოდოკიას გზას მალე ბევრ სხვასაც გაუყენებენ?!
"შესაძლოა, დავით შავლიაშვილს მალე მინისტრის პოსტი დაატოვებინონ"

"არა მგონია, "წყალმომარაგების კომპანიაში" საკითხი მხოლოდ ცოლ-ქმრის დონეზე გადაწყვეტილიყო, გამოძიება
გარიგებაში სხვა მაღალჩინოსნების როლითაც უნდა დაინტერესდეს..."


თბილისის მერიის ზედამხედველობის სამსახურის აპარატის უფროსის, ჯოკია ბოდოკიას, ქრთამის აღების ბრალდებით დაპატიმრებას დიდი რეზონანსი მოჰყვა. მისი დაკავებიდან რამდენიმე დღეში ანტიკორუფციულმა სამსახურმა კორუფციული სქემა რეგიონული განვითარებისა და ინფრასტრუქტურის სამინისტროს ბალანსზე არსებულ "გაერთიანებული წყალმომარაგების კომპანიაშიც" გაშიფრა.

რა პრეტენზიები გამოძიების ცნობით, კომპანიის ფინანსური დეპარტამენტის ხელმძღვანელმა თამარ ფხოველიშვილმა და მისმა მეუღლემ,
ზურაბ ნუცუბიძემ, "გაერთიანებული წყალმომარაგების კომპანიის" ანგარიშიდან პირად ანგარიშებზე 2.227.887 ლარი უკანონოდ გადარიცხეს, მითვისებული თანხით კი ძვირად ღირებული ბინები და ავტომობილები შეიძინეს, რომლებიც ამ ეტაპზე დაყადაღებულია. შს სამინისტრომ ზურაბ ნუცუბიძე დააკავა, თამარ ფხოველიშვილზე კი ძებნა გამოაცხადა. გამოძიება დანაშაულში სხვა პირთა გამოსავლენადაც გრძელდება.

კორუფციული სქემის გამოვლენის შემდეგ,
პრემიერ-მინისტრის ბრძანებით რეგიონული განვითარებისა და ინფრასტრუქტურის მინისტრის მოადგილე გიორგი კობერიძე თანამდებობიდან გათავისუფლდა.  
ლევან ალაფიშვილი, იურისტი: - ანტიკორუფციული სამსახურის გააქტიურება იმას ნიშნავს, რომ ხელისუფლებაში მიხვდნენ, თუ დროულად არ მიიღეს ზომები, შემდეგ გვიან იქნება. ჩემი აზრით, კიდევ არაერთ სკანდალურ დაკავებას ვიხილავთ. სანამ სახელმწიფო და ადამიანები არსებობენ, კორუფციული გარიგებების ცდუნებაც მუდმივად იქნება, მთავარია, მთავრობამ კანონდარღვევის პრევენციისთვის სწორი პოლიტიკა შეიმუშაოს.
საერთოდ, რეგიონული განვითარებისა და ინფრასტრუქტურის სამინისტრო ხელისუფლებაში ერთ-ერთ საკვანძო რგოლს წარმოადგენს, ამიტომ მინისტრის თანამდებობაზე შემთხვევითი პირები არ უნდა ინიშნებოდნენ.
"წყალმომარაგების კომპანიაში" არა მგონია, საკითხი მხოლოდ ცოლ-ქმრის დონეზე გადაწყვეტილიყო, გამოძიება გარიგებაში სხვა მაღალჩინოსნების როლითაც უნდა დაინტერესდეს.
ეს დანაშაული ლოკალური ხასიათისაა, მაგრამ თუ სახელმწიფო პრევენციულ ზომებს არ მიიღებს, დანაშაულის მასშტაბიც გაიზრდება.

- მინისტრის პასუხისმგებლობის საკითხის დაყენება პრევენციული ღონისძიება იქნება?

- შესაძლოა, დავით შავლიაშვილს მალე მინისტრის პოსტი დაატოვებინონ, მაგრამ თუ "წყალმომარაგების კომპანიაში" ჯგუფური დანაშაული გამოვლინდა, მისი პასუხისმგებლობის საკითხი გარდაუვალია. მსგავსი ფაქტების პრევენცია პროფესიონალი კადრების მოზიდვა და მათთვის სათანადო პირობების შექმნაა. განათლება - მაღალ თანამდებობაზე დასანიშნად ამ მთავარი კრიტერიუმით უნდა ვიხელმძღვანელოთ...

რუსუდან შელია

ana
24 თებერვალი 2015 20:39
კომპეტენციის სრული დეფიციტია ყველა სახელმწიფო სტრუქტურაში.რატომ დაინიშნა საავტომობილო გზების დეპარტამენტის თავჯდომარედ მხოლოდ გამომძიებლად ნამუშავარი ვაჟა ფანჩულიძე? იმიტომ რომ ის ახლო ნათესავია ტენდერებში დაინტერესებული .თბილისის მერისა და ,,გეო ევროკატის“ საკონტროლო პაკეტის მფლობელის მამუკა ფანჩულიძის. რა ესმის მას საინჟინრო საქმის, რა საქართველოში არ მოიძებნებოდა მეგზევე? თან გაავსო იქაურობა თავის ცოლის დაქალებით და ნათესავებით, რა თქმა უნდა არა სპეციალისტებით.ყველა ახლადდანიშნულს ნახავთ მისი ცოლის ანა დევსურაშვილის ფეის მეგობრებში.ცოლიც კარგად მოაწყო თავდაცვის სამინისტროში მინისტრის მოადგილის მრჩევლად.თუმცა მარტო ბაკალავრიატის ცოდნა აქვს
marina
23 თებერვალი 2015 18:02
ეს ის კომპანია, რომელიც რეგიონებში თანამშრომლებს 240 ლარზე ამუშავებს, ასეთი დაბალი ანაზღაურება არც ერთ საბიუჯეტო ორგანიზაციაში არ არის და ასეთი დაბალი ხელფასების ფონზე მართლა საგანგაშოა ეს ფაქტი, ამაზრზენია
d
23 თებერვალი 2015 17:35
ცაბუტაშვილის დროს რომ მუშაობდნენ ისინი სად წავიდნენ? მაშინდელი კოლექტივი სად გადანაწილდა? სადმე სოფლის მეურნეობის სტრუქტურებში ხო არა?

რედაქტორის რჩევით
რუბრიკის სხვა სიახლეები