"ხელისუფლებაშიც არ­ი­ან პირები, რომლებიც ანტიე­ვრ­ოპული განწყობების გაღვივებას­ ცდილობენ" - კვირის პალიტრა

"ხელისუფლებაშიც არ­ი­ან პირები, რომლებიც ანტიე­ვრ­ოპული განწყობების გაღვივებას­ ცდილობენ"

"მალე ყველა ნორმალურ ადამიანს მოუწევს აღიარება, რომ არ სურს ისეთ ქვეყანაში ცხოვრება, სადაც ადამიანებს თვალს ადევნებენ, ამგვარ მასალას ქმნიან და ავრცელებენ. არც ერთ საზოგადოებაში არ უყვართ ის, ვინც ყველას და ყველაფრის წინააღმდეგ არის შეთქმული და ასეთი მეთოდებით ცდილობს განწყობების მართვას"

ფილოსოფოსი და ექსპერტი ზაზა ფირალიშვილი "თავისუფალი დემოკრატების" წევრი გახდა. რატომ აირჩია ეს პარტია და როგორ აფასებს ბოლო დროს განვითარებულ მოვლენებს, ამ საკითხებზე ის "კვირის პალიტრას" ესაუბრა.

- ქართულ პოლიტიკურ სპექტრში მხოლოდ პუტინისტები არიან და მათთან ურთიერთობა ჩემს ძალას აღემატება. რაც შეეხება "თავისუფალ დემოკრატებს", ეს არის პოლიტიკური ძალა, რომელიც ქვეყნის მოდერნიზაციისკენ მიისწრაფვის ყოველგვარი ძალადობრივი მეთოდების, პიარხრიკებით მოსახლეობის გაბითურებისა თუ სხვა უკადრისი ხერხის გარეშე. ისინი ყველა სიტუაციაში წონასწორობისა და ბალანსის დაცვას ცდილობენ, რადგან ესმით, რომ ამის გარეშე რადიკალურად გაღვივებული ვნებების ფონზე ქართული სახელმწიფოს აშენება და დამკვიდრება შეუძლებელია.

- "თავისუფალი დემოკრატები" რესპუბლიკელებს რატომ ამჯობინეთ?

- უსუფაშვილი ჩემთვის ერთ-ერთი ყველაზე გაწონასწორებული პოლიტიკოსია. მისმა პარტიამ წლების მანძილზე მნიშვნელოვანი როლი შეასრულა, მაგრამ ხშირად მაწუხებდა მათი ერთგვარი ელიტიზმი და ზოგ შემთხვევაში იდეოლოგიური რადიკალიზმი. ჩემთვის კულტურასა და სულიერებასთან თუნდაც უნებური თამაში დაუშვებელია! ამით შეიძლება საზოგადოებაში არასასურველი ვნებების გაღვივებას შევუწყოთ ხელი. ჩვენ, ყველამ, ჩვენი მოსახლეობისთვის ადეკვატურ ენაზე ლაპარაკი უნდა ვისწავლოთ.

- ირაკლი ალასანიამ თავდაცვის მინისტრის სავარძლის დატოვებისთანავე განაცხადა, რომ ქვეყნის პროდასავლურ კურსს საფრთხე შეექმნა. თქვენ რას ფიქრობთ?

- ეს საფრთხე დღემდე არსებობს. ჩვენ ვხედავთ, ევროატლანტიკური კურსის რამდენი მოწინააღმდეგე ყოფილა არა მხოლოდ პოლიტიკურ წრეებში, არამედ მმართველ კოალიციაშიც.

- საქართველოში ამერიკის ელჩისა და ჩვენი დასავლელი პარტნიორების განცხადებით, საქართველოს საგარეო კურსი არ შეცვლილა. ნუთუ მეჭიაურის ან სხვა რომელიმე პარლამენტარის მოსაზრება ასეთი საფრთხის შემცველია?

- ერთმანეთში ნუ აურევთ დიპლომატიურ განცხადებებს და რეალურ პოლიტიკურ ვითარებას. დასავლური პოლიტიკა მხოლოდ უკიდურეს შემთხვევებში იძლევა რადიკალურ შეფასებებს.

- მაშინ სხვაგვარად გკითხავთ, ირაკლი ალასანიას თინა ხიდაშელით ჩანაცვლება პროდასავლური კურსისთვის საფრთხის შემცველი იყო?

- ჯერ ერთი, თინა ხიდაშელამდე სხვა მინისტრი გვყავდა. მისი სწრაფი შეცვლა უთუოდ არის რაღაც გარემოებებზე, თუნდაც ჩვენი საერთაშორისო პარტნიორების აზრზე მიმანიშნებელი. ცხადია, ჩანაცვლება სრულფასოვანია, მაგრამ ისიც აშკარაა, რომ მავანთათვის ხიდაშელის დანიშვნა ნიშნავდა არა იმას, რომ კურსი უცვლელია, არამედ იმას, რომ ახალი სამიზნე მიეცათ და კოალიციიდან "თავისუფალი დემოკრატების" გასვლის შემდეგ შეუძლიათ რესპუბლიკელების განდევნაზე ზრუნვა. კოალიციიდან რესპუბლიკელების გასვლის მოლოდინი ნამდვილად არსებობს, მაგრამ ერთი წუთით წარმოვიდგინოთ, რა სახეს მიიღებს ამის შემდეგ კოალიცია. აღარაფერს ვამბობ საერთაშორისო კავშირებზე. კარგ შთაბეჭდილებას ტოვებს გიორგი კვირიკაშვილი, მაგრამ ისეთი აზრი მექმნება, რომ მას არა აქვს დამოუკიდებელი საკადრო გადაწყვეტილებების მიღების საშუალება. როგორც ჩანს, არიან ძალები, რომლებიც ცდილობენ, ეს ადამიანი კოალიციის ფასადად აქციონ.

- ნუთუ ევროკავშირთან ვიზალიბერალიზაციის პროცესი ამ ხელისუფლების საგარეო კურსის უცვლელობის დადასტურებად არ მიგაჩნიათ?

- ეს დადასტურებაც არის და წარმატებაც, მაგრამ არა მხოლოდ ხელისუფლების... უნდა გადავეჩვიოთ, რომ წარმატებები მხოლოდ ხელისუფლებას მივაწეროთ. ყველა ჩვენგანის წარმატებაა, როდესაც ცივილიზებული სამყარო ქართველ საზოგადოებას სრულფასოვან პარტნიორად აღიარებს... ხელისუფლებაშიც არიან პირები, რომლებიც ანტიევროპული განწყობების გაღვივებას ცდილობენ. ყველაზე ნათლად ეს ერთნაირსქესიანთა ქორწინების პრობლემასთან დაკავშირებით გამოჩნდა.

წლების განმავლობაში შინაურიც და გარეულიც განმარტავდა, რომ მსგავსი მოთხოვნა დასავლეთს არა აქვს. ამან არ გაჭრა. არც იმან გაჭრა, რომ სამოქალაქო კოდექსში ქორწინება განსაზღვრულია, როგორც მამაკაცისა და ქალის კავშირი. მოითხოვენ, რომ კონსტიტუციურად იყოს ეს დაკანონებული და ვერ გრძნობენ, თუ რა უხერხულ მდგომარეობაში აყენებენ ქვეყანას. "თავისუფალი დემოკრატები" ამ საკონსტიტუციო ცვლილებას მხარს უჭერენ არა იმიტომ, რომ რეალური საფრთხე არსებობს, არამედ იმიტომ, რომ შეწყდეს ეს უაზრო აჟიოტაჟი და გარკვეულ ძალებს ისტერიის დათესვის საშუალება არ მიეცეთ. თუმცა ეს ძალები სხვა საბაბს მოძებნიან. უკვე გამოიკვეთა რამდენიმე თემა, ერთნაირსქესიანთა ქორწინება, ამერიკის მიერ საქართველოს ტერიტორიის 80%-ის ოკუპირება, მართლმადიდებლობის დევნა... ხოლო როდესაც აღმოჩნდება, რომ რეალურად პრობლემა არც არსებულა, ქვეყნიერებას თავისი დიდი გამარჯვების შესახებ ამცნობენ.

ეს გათვლილია იმგვარ ადამიანებზე, ვისშიც იოლად შეიძლება გააღვივო შიში და რადიკალური განწყობილებები, იოლად შეიძლება დაანახო მისი შეჭირვებული მდგომარეობის ერთი კონკრეტული მიზეზი. დარწმუნებული ვარ, ჩვენი მოსახლეობის დიდი ნაწილი არ განეკუთვნება ამ კატეგორიას.

- კვლავ მოუგვარებელ პრობლემად რჩება პირადი ცხოვრების ამსახველი მასალების გავრცელების გამოვლენა...

- შესაძლოა ვინმეს თავისი გულუბრყვილობით ჰგონია, რომ ბინძური მასალის გამოქვეყნებით მიზანს აღწევს. შესაძლოა თავიდან ამას მართლაც ჰქონდეს რაღაც ეფექტი, მაგრამ მალე ყველა ნორმალურ ადამიანს მოუწევს აღიარება, რომ არ სურს ისეთ ქვეყანაში ცხოვრება, სადაც ადამიანებს თვალს ადევნებენ, ამგვარ მასალას ქმნიან და ავრცელებენ. არც ერთ საზოგადოებაში არ უყვართ ის, ვინც ყველას და ყველაფრის წინააღმდეგ არის შეთქმული და ასეთი მეთოდებით ცდილობს განწყობების მართვას.

- მახსოვს, თქვენ ალასანიასა და "თავისუფალ დემოკრატებს" გააქტიურებისკენ მოუწოდებდით. აცხადებდით, რომ დასავლელი პარტნიორები ამ პოლიტიკური ძალისგან უფრო მეტს ელიან...

- ჩვენ ახლა შევდივართ აქტიურ ფაზაში. არავინაა ისეთი გულუბრყვილო, ეგონოს, რომ სახელისუფლებო კოალიციის ან სხვა პარტიების პოლიტიკური გაკოტრება აუცილებლად მას მოუტანს ქულებს. ამომრჩევლისთვის მისი ნებისა და იმედის გამომხატველად რომ იქცე, ბევრი მუშაობაა საჭირო.