"დასავლეთს ჯერ კიდევ სათანადოდ არ ეშინია­ რუსეთის" (ექსკლუზივი)
18-08-2017
"დასავლეთს ჯერ კიდევ სათანადოდ არ ეშინია­ რუსეთის" (ექსკლუზივი)
"დასავლეთმა მკაცრი ზომები უნდა მივიღოთ რუსეთის ე.წ. მშვიდობისმყოფელების მიერ ჩადენილი უმსგავსობების ფონზე. მეტიც, ვფიქრობ, ძალიან დავაგვიანეთ რეაგირება"

"მოვუწოდებ რუსეთს, შეწყვიტოს დესტრუქციული ქმედებები უკრაინასა და... სხვაგანაც!" - ასე გაკიცხა ვარშავაში ჩასულმა დონალდ ტრამპმა რუსეთი, მეორე დღეს კი ჰამბურგში პუტინს შეხვდა, სადაც ისევ ისაუბრეს უკრაინაზე, სირიაზე, ირანზე... სამხრეთ კავკასია და მისი პრობლემები კი არსად გახმიანებულა. ქრება თუ არა საქართველო მსოფლიო პოლიტიკის დღის წესრიგიდან? ჟურნალ "ეკონომისტის" რედაქტორ ედვარდ ლუკასს ვარშავაში ტელეფონით დავუკავშირდით.

-
ბოლოდროინდელი მოვლენების შემხედვარე, ვიტყოდი, რომ ნამდვილად არსებობს საში­შროება, საქართველო დასავლეთის­ დღის წესრიგიდან ამოვარდეს. ჩემი აზრით, რუსეთის ქმედებები ისეთივე მიუღებელია დღეს, როგორიც ხუთი წლის წინ იყო და ჩვენ, დასავლეთმა, მკაცრი ზომები უნდა მივიღოთ რუსეთის ე.წ. მშვიდობისმყოფელების მიერ ჩადენილი უმსგავსობების ფონზე. მეტიც, ვფიქრობ, ძალიან დავაგვიანეთ რეაგირება. მეორე
მხრივ, დასავლეთს უამრავი თავსატეხი აქვს და საქართველო კი არა, უკრაინაც კი - ქვეყანა, რომელიც საქართველოზე თითქმის ათჯერ დიდია - ძლივს რჩება დღის წესრიგში.

- ტრამპმა ასევე განაცხადა,­ რომ სანამ უკრაინის საკითხი არ გადაწყდება, სანქციებიც არ გადაი­ხედება. საქართველო ამ ფორმულაში საერთოდ არ ფიგურირებს...

- საქართველოს, მისი გეოგრაფიული მდებარეობიდან გამომდინარე, ყოველთვის ექნება პოლიტიკური წონა. ნავთობსადენები, რომელიც ქვეყანაზე გაივლის, გარანტიაა იმისა, რომ დიდი დასავლური ენერგოკომპანიები დაინტერესებული იქნებიან საქართველოს უსაფრთხოებით. მაგრამ, მეორე მხრივ, გიწევთ ურთულეს სამეზობლოში ცხოვრება. თუმცა, ხდება კარგი რაღაცებიც: მაგალითად, უვიზო რეჟიმი... საინტერესო იქნება, რა კურსს აირჩევს ევროკავშირის ახალი ფრანკო-გერმანული ხელმძღვანელობა საქართველოსთან დაკავშირებით. ფაქტია, მაკრონსა და მერკელს რუსეთის ბოლოდროინდელი პოლიტიკა კარგს არაფერს უქადის. იმედი მაქვს, სამხრეთი კავკასია იქნება ერთ-ერთი ადგილი, სადაც მოხდება დემონსტრირება, რომ ევროკავშირს ჯერ კიდევ შეუძლია იყოს აქტიური მოთამაშე რუსეთთან დაკავშირებით.

- თქვენს სტატიაში აღნიშნეთ, რომ რუსეთი დასავლეთის სანქციებს "სტოიკური შეუპოვრობით" უძლებს. რატომ ვერ ამჟღავნებს ასეთივე ნებისყოფას დასავლეთი?

- ვფიქრობ, მთავარი პრობლემა ის არის, რომ დასავლეთს ჯერ კიდევ სათანადოდ არ ეშინია­ რუსეთის. ჩემთან საუბარში ბრი­ტანელი­ სამხედროები აგდებით ჰყვებიან, რა საშინელ დღეშია რუსეთის ჯარი, რომ მათ ფული არ ჰყოფნით და რუსეთის სამხედრო ძალაზე გადაჭარბებული წარმოდგენა არ უნდა გვქონდეს. არ ვდაობ იმაზე, რომ რუსეთს უამრავი პრობლემა აქვს, მაგრამ საჭიროა, შევიგნოთ, რომ რუსეთს დასავლეთისთვის არა - ტრადიციული, არამედ ჰიბრიდული ომი აქვს გამოცხადებული... რაში გვჭირდება რუსეთთან სამხედრო დაპირისპირება, როდესაც ჩვენს არსენალში სხვა, უფრო ეფექტური იარაღიც არსებობს? მაგალითად, დასავლეთის ფინანსური სისტემა, რომელიც რუსებს ძალიან ეძვირფასებათ. განვუცხადოთ რუსეთს, რომ თუ თავს დაესხმებიან ბალტიისპირეთს, საქართველოს, არ შეწყვეტენ­ ომს უკრაინასთან, მათი დიდი კომპანიები­ დასავ­ლეთში საკუთარ ანგარიშებსა და ქონებას უნდა დაემშვიდობონ, ეს კი რუსე­თის­თვის კატასტროფა იქნება. ვგულისხმობ სახელმწიფოსთან დაკავშირებულ გიგანტ კომპანიებს, როგორიც არის "როსნეფტი", "გაზპრომი", ვი-თი-ბი ბანკი. ერთადერთი, რაც ამის განხორციელებას უდგას წინ, ისევ დასავლური კომპანიების ფინანსური ინტერესებია, მაგრამ ვფიქრობ, დროა, ამ ნაბიჯის გადადგმაზე ვიფიქროთ.

- დაბოლოს, უნდა ველოდოთ­ თუ არა დასავლე­თისგან მსგავს რეაქციას, თუ ცხინვალმა მართლაც გამართა ე.წ. რეფერენდუმი რუსეთთან შეერთებაზე?

- მოდით, ამ პოლიტიკურ თეატრს რეფერენდუმს ნუ დავარქმევთ. ეს სხვა არაფერია, თუ არა პოლიტიკური ცირკი, სადაც წარმოდგენას არა - ცხინვალი, არამედ კრემლი დგამს. თუ ეს მართლაც მოხდება, ეს იქნე­ბა მინიყირიმი. და მინდა, დავიჯერო, რომ ამაზე დასავლეთს სათანადო რეაქცია ექნება. თუმცა, მგონია, რომ კრემლი ამას არ გააკეთებს და ამ სცენარს მხოლოდ საქართველოს მთავრობის დასაშინებლად გამოიყენებს. მწარე სიმართლე ის არის, რომ ცხინვალი უკვე რუსეთის დე ფაქტო ტერიტორიაა, 90-იანი წლებიდან მოყოლებული. ვფიქრობ, აფხაზეთისა და ე.წ. სამხრეთ ოსეთის დასაბრუნებლად დიდხანს ლოდინი მოგიწევთ, ალბათ, 15-20 წელიწადი მაინც და ამას დასჭირდება რეჟიმის შეცვლა მოსკოვში...

ვაჟა თავბერიძე
glaxuna
18 აგვისტო 2017 21:30
არაბულ-ჩინურ სამყარო უ ნ დ ა დაოკდეს,
21-ე საუკუნეწშიც შუა საუკუნეობრივი ა ვ ა დ მ ყ ო ფ ი ღრუსეთი უ ნ დ ა დაიშალოს და კაცობრიობამ მით მოიპოვოს- უ ფ ლ ე ბ ა და შ ე ს ა ძ ლ ე ბ ლ ო ბ ა ...ადამიანთა საყოველთაო მშვიდობისა და საყოველთაო კეთილდღეობისათვის,სადაც ძირითადი საზრუნავი შეიქმნა არა თავისუფლება,სამართლიანობა,მზრუნველონა,პასუხისმგებლობა,თანადგომა-რაც ცხოვრების წ ე ს ა დ იქცევა... არამედ : ე კ ო ლ ო გ ი ა,ბუნებრივი კატაკლიზმებისაგან თავის დაცვა და ბიოლოგიურად სუფთა პროდუქტის წარმოება,მედიცინის ძლიერ განვითარება და სამყაროს დ ღ ე გ რ ძ ე ლ ო ბ ა!
თორნიკე
18 აგვისტო 2017 16:33
alex ვაი ექსპერტობას შენვე ცდილობ.. როგორ გგონია რუსეთს უფრო ჭირდება დასავლეთი თუ პირიქით?
alex
18 აგვისტო 2017 14:56
ეეჰ, ასე მარტივად რომ იყოს საქმე კარგია. გაყინონ დიდი რუსული კომპანების ანგარიშებიო, სამაგიეროდ რუსეთმა რომ თქვას ჩავკეტოთ საზღვარი და დასავლეთს არ მივაწოდოთ ნედლეულიო, მერე რას იტყვის დასავლეთი? სსრკ იმისთვის დაშალა დასავლეთმა რომ იაფად მიეღო ნედლეული, მერე ამ ნედლეულით დამზადებული პროდუქცია ისევ რუსეთისთვის მიეყიდა ხელსაყრელ ფასად. ეს პროცესი რომ გაწყდეს, დასავლეთი თვითონ გააქრობს იმას, ვინც ასეთ გადაწყვეტილებას მიიღებს. ამნაირ ვაი ექსპერტებს, რედაქტორებს და პოლიტიკოსებს რომ ვუსმენთ ქართველები, იმიტომ დავრჩით 25 წელიწადში 5 მილიონიდან 3 მილიონი.

რედაქტორის რჩევით
რუბრიკის სხვა სიახლეები