მოსამართლის ოჯახური მდგომარეობის გამო, უკრაინაში სააკაშვილის პროცესი გადაიდო
საქართველოს ექსპრეზიდენტისა და ოდესის ყოფილი გუბერნატორის, მიხეილ სააკაშვილის განცხადებით, კიევში მისი საქმის სააპელაციო განხილვა 26 იანვრამდე გადაიდო, - ამის შესახებ "რია ნოვოსტი" იუწყება.
"მათ საქმის განხილვა გადაიტანეს ერთი კვირით, პარასკევისთვის, ერთ-ერთი მოსამართლის ოჯახური მდგომარეობის გამო," - განუცხადა ჟურნალისტებს სააკაშვილმა.
სააკაშვილი დანაშაულებრივ ორგანიზაციასთან თანამშრომლობის გამო სისხლის სამართლის გამოძიების ფარგლებში კიევში, 2017 წლის 8 დეკემბერს დააკავეს. მან წინასწარი დაკავების იზოლატორში სამი დღე გაატარა, შემდეგ კი სასამართლომ გაათავისუფლა, მიუხედავად პროკურატურის მოთხოვნისა მისთვის შინა პატიმრობის მისჯის თაობაზე.
ბრალის დამტკიცების შემთხვევაში საქართველოს ექს-პრეზიდენტს თავისუფლების სამიდან ხუთ წლამდე აღკვეთა ემუქრება.
"ინტერპრესნიუსი"