"ბეჟუაშვილს ახლა სხვა მიზეზით უნდა ჩემი კომპანიის ხელში ჩაგდება" - "ბეჟუაშვილის სამართლით" ქონების წართმევა გრძელდება? - კვირის პალიტრა

- რა გამოდის, რომ 2012 წელს ივანიშვილის დახმარებისთვის დაგსაჯეს?

- რა თქმა უნდა, ზუსტად ასეა. 2012 წელს ნამდვილად ასე იყო. მტერს როგორ ეხმარებიო, მუქარები მოდიოდა ყველა მხრიდან, შინაგან საქმეთა სამინისტროდან, თვითონ ბეჟუაშვილის კანტორიდან. მე ვთქვი, სხვებს თუ ვავრცელებ, "ტვ9" რატომ არ უნდა გავავრცელო -მეთქი? გავაგრძელე ის, რაც უნდა გააკეთოს ჩვეულებრივმა მოქალაქემ, ამათ ეს არ მოეწონათ, მაშინ ადეიშვილი და ბეჟუაშვილი ძმები იყვნენ, ახლა ბეჟუაშვილს სხვა მიზეზებით უნდა კომპანიის ხელში ჩაგდება.

მოგვიანებით, იტალიის ელჩისა და საერთაშორისო საზოგადოების დიდი წნეხით, დაახლოებით 3 კვირაში, უკან დაგვიბრუნდა სრულიად განადგურებული "სტერეო +".

ამის შემდეგ მომხდარზე აღიძრა სისხლის სამართლის საქმე. პროკურატურამ შემართებით დაიწყო გამოძიება, იყო მოწმეების ჩვენებები, შემსრულებლების აღიარებითი ჩვენებები და საქმე მზად იყო სასამართლოსთვის გადასაცემად, თუმცა უცებ მთავარმა პროკურატურამ გამოიწვია ეს საქმე და შეაჩერა. შემდეგ ძალიან ბევრმა წყალმა ჩაიარა. ბოლოს ადვოკატებთან ერთად ვნახეთ ეს საქმე, ოთხი ტომიდან დარჩენილია რამდენიმე ფურცელი, ჩვენებები განადგურებულია.

დაუსჯელობით გათამამებულმა პირებმა სრულიად დაუსაბუთებელი სარჩელით მიმართეს სასამართლოს. თუმცა არც საქალაქო და არც სააპელაციო სასამართლომ სარჩელი არ დააკმაყოფილა, მაგრამ უზენაესმა სასამართლომ გამოიტანა ჩემი საწინააღმდეგო გადაწყვეტილება და ისევ დამიყადაღეს ყველაფერი.

- თქვენი აზრით, როგორ მოხდა, რომ პირველი და მეორე ინსტანციის სასამართლოებმა თქვენს სასარგებლოდ გამოიტანა გადაწყვეტილება, უზენაესმა კი არა?

- არც ცივილიზებულ და არც არაცივილიზებულ სამყაროში, უზენაესს არ გამოაქვს შეცვლილი გადაწყვეტილება, მაქსიმუმ დააბრუნოს საქმე წარმოებაში, მაგრამ შეცვალოს და თან არ მიგიწვიოს, ეს პირდაპირი მინიშნებაა კორუფციულ გარიგებაზე. ეს არის ფაქტი იმისა, რომ უზენაესმა სასამართლომ ყოვლად უსაფუძვლო გადაწყვეტილება მიიღო.

ეს ხდება იმის მიზეზითაც, რომ სასამართლოში კვლავაც წამყვან პოზიციებზე რჩებიან სააკაშვილის კადრები. ბეჟუაშვილი ყოველთვის კორუფციონერი იყო და ყოველთვის ჰქონდა ურთიერთობა მოსამართლეებთან.

- რა სურს დავით ბეჟუაშვილს?

- ბეჟუაშვილს სურს თავისი მოპარული მილიარდების გაპრავება. ერთი მხრივ მას უნდა, რომ ბომბზე არ იჯდეს და იმიტომ გაანადგურებინა ეს საქმე პროკურატურაში. მეორე მხრივ კი უნდა დაამტკიცოს, რომ თვითონ მტაცებელი კი არ არის, უბრალოდ, მე მქონდა ვალი... არადა, ეგ მართლაც მტაცებელია და საქართველოში ძალიან ბევრი ბიზნესმენი ჰყავს გამწარებეული. მას სურს დიდი გავლენის მოპოვება.

- ამ განაჩენის პირობებში რა ელის "სტერეო +"-ს?

- უზენაესმა სასამართლომ დამაკისრა 900 000 ლარამდე თანხის გადახდა, რადგანაც ანგარიშზე არ მაქვს 900 000 ლარი, უკვე მომივიდა შეტყობინება, რომ ჩემს კომპანიას 3 კვირაში აუქციონზე გაიტანენ და ბეჟუაშვილი იყიდის.

ვაპირებ ყველა ცივილიზებული წესით ბრძოლას. სტრასბურგს არ გამოვრიცხავ, მაგრამ ხომ ხვდებით ეს როგორ გაიწელება. მოვითხოვ, რომ უსაქმურმა პროკურატურამ ის სისხლის სამართლის საქმე მიიტანოს სასამართლომდე და იქ გამოჩნდება ვინ არის ბეჟუაშვილი, ვის აქვს ფული გადასახდელი იმ ზარალისთვის, რაც წლების წინ დარბევის დროს მოგვაყენა.

წარმოიდგინეთ უზენაესი სასამართლოს მოსამართლემ დაწერა სარეზოლუციო ნაწილი, დამიყადაღეს ყველაფერი და ისიც კი არ ინებეს, რომ დასკვნა დაეწერათ, ანუ არ ვიცით რა მიზეზით, რატომ მიიღეს ეს გადაწყვეტილება, ამის ნებას თურმე კანონი იძლევა, მოკლედ, ჩალით არის დაფარული მთელი ჩვენი მართლმსაჯულება.

თეა ბეჟიტაშვილი (სპეციალურად საიტისთვის)

იხილეთ ვიდეო